Read Khumi Chin 1 ARENG KEH 10 Bible Online

1 ARENG KEH 10 - Khumi Chin bible

1 ARENG KEH 10

¹Sheba pri i samrangnu ly Solomon i amyn amthang nai sai thai i, rai parai nai leuchi hawi samrang ai cham ai nai Jerusalem mary y jeu bo.

²Samrangnu ly mui katui cheaungkhangchi, vang kateng lengseaungchi hawi muku neangneangchi kula-iuchi tleaung y tang iy tym. Ni ly samrang i mo y tym nai khala y, my i adawn yb nai leusaichi deng bo.

³Naibaly samrang my ha py takhawi y pa-rei pathang pi. Samrang pathang pajau y ai nai pa-rei deng nai leusaichi abawi y nai ne.

⁴Sheba samrangnu ly Solomon i cheng nai saichi, samrang i yhm sa nai saichi,

⁵samrang i pacho panei nai teicha teineichi, samrang i bangtangchi awm ai nai yhmchi, samrang yhm i miteaungkehchi hawi amsi amtlau naichi ai kalop pacheang naichi, nichi i ateaung ka-tawm riri ateaung naichi, cha nei pawira y samrang ai pasawm patau nai miseaungchi, Achura yhm y talam nai kapathyprachi, hunichi ai niu nai khala ly lyh nai sai mynkym vui nai ne.

⁶Ni ly samrang Solomon teng y, “Kai ly Sheba pri y awm nai khala, nang hawi nang i cheng nairachi thai nai ly teng khyp bo!

⁷Na i py kai ly nang ai niu y rai khala, huni satang ly ka-ym y; huni thym khala y kai i thai nai satangchi ly vai, niu nai leaungsaichi ka-hyhrei malawn py by y. Nang i cheng naira hawi nang nai sai ly kai i thai nai tleaung y ka-teng ka-tang ny y nanai ne.

⁸Nang i aju ly khri pa-rei taham hawi na ly! Nang teng y kalop sa nai tarawi y nang i cheng nai saichi thai nai, nang i miseaungchi py khri pa-rei taham hawi na ly!

⁹Nang i ARENG Tameuh ly nang parai nai awm sy! Mymy ly nang ai khri pa-rei tamen nai deaungkho y, Israela samrang y tahm pasang bo. Israela chengchi ai deungtasarei tamen nai deaungkho y, nichi ai leu meitang adyh adawi naimy peang ai nai, nang ai samrangra y palyn nai bo,” napi.

¹⁰Hunaibaly Sheba samrangnu ly samrang Solomon teng y muku kaji sie 7375 virei, rimui neangneangchi hawi vang kateng lengseaungchi py talam pi nai ne. Solomon i nga reng nai rimuichi tleaung y, Sheba samrangnu i pei nai rimuichi ly nawi keh nai ne.

¹¹Ophira mary i mukuchi tang nai Hiram i sampho kamkawm ly Sendaku keung hawi vang kateng lengseaung neangneangchi py syn u.

¹²Solomon ly Sendaku keung ai Achura yhm hawi samrang yhm i saiphynchi sa naira y hawi, taro beu kawp nai keungchi i vui, taro katheang kalen sa naira py teaung nai ne. Huna tanrei hawi nai Sendaku keung ly Israela pri y, jangni mana khala py tym hai vai y.

¹³Samrang Solomon ly tlen tlangrei pei reng nai langseaungchi ai, Seba samrangnu teng y paleung hawi parai naimy pei pi nai bo y, samrangnu i ngai naichi py, pei pi nai ne. Naibaly samrangnu ly abang naichi hawi vanrei, Sheba pri y vawi u ali teang bo.

¹⁴Samrang Solomon ly saneng tleirei muku kaji sie 224,25rei nga nai ne.

¹⁵Huni bo y ka-sum ka-pai kalen sa nai khumichi teng i akeu nga naichi, ka-sum ka-pai sa naira i kamranchi, Arap samrangchi hawi Israela khu peang nai keungchi my pei nai kahmchi py nga nai ne.

¹⁶Solomon ly khupui kalen chungvai nyhrei sa i, ha harei ai muku kaji sie 17rei hawi mawm hai typ bo.

¹⁷Muku kaji sie 5rei riri mawm typ nai khupui katheang chungvai thomrei py sa i, huni khupui bawibawichi ai Lebanon Hallra y khai hai nai ne.

¹⁸Solomon ly muku tangcheng hawi mawm typ nai kasai nuh bailang pui py sa.

¹⁹Huni bailang tleaung y lyn ai nai khailei kheubyn tariurei awm; khailei kheubyn tleirei y khrangsi mynchi khai i, khrangsi myn bawibawi ly holai nyhrei awm. Bailang i nithun mang y si katai lu myn harei awm iy, kiu kheangra nyhrei sahawi y ly khrangsi myn ha harei khai nai ne. Huni bailang ka-tawm ly mani pri y py by y leang.

²¹Solomon i tui nei nai khau bawibawichi py muku hawi sa naichi ne i, Lebanon daichi napi nai Hall theung y awm nai ateaung alang bawibawichi py, muku tangcheng hawi sa naichi ne. Solomon i deung y tangka ai ly vang kateng palawn y nai deaungkho y, teaung py teaung y.

²²Samrang ly Hiram i sampho kamkawmchi hawi vanrei, ka-sum ka-pai sa ai nai pangli samphochi awm. Huni samphochi ly saneng thomrei y tlenrei mychi pri y vawi teang iy muku, tangka, kasai nuh, khumi kalai hawi kalaichi py syn pi reng nai ne.

²³Samrang Solomon ly samrang bawibawichi tleaung y nang py nang, cheng py cheng keh.

²⁴Naibaly khaileaung pri verei i khumichi ly samrang teng y Tameuh my pei nai cheng nai leu katheu naichi tangai ai nai tym u bo.

²⁵Saneng tleirei jeu u nai khumi bawibawichi ly muku ateaung, baichu ateaung, tavai ateaung, rimui cheaungkhang, keaungngo hawi keaungngo kano kasauchi langseaung talam u nai ne.

²⁶Solomon ly tavai ka-ri 1,400 rei hawi keaungngo 12,000 rei awm nai tavaimi kamkawm py sa; phyreichi ai ly Jerusalem mary theung y khai iy, phyreichi ai ly mary takhra takhrachi mang y khai nai ne.

²⁷Ni i peang nai deung y Jerusalem mary theung y tangka ai ly lengseaung kamta palawn iy, saitleang keung ly Juda mawi kheutangra y prau nai po kalang keungchi kamta, neangneang prau nai ne.

²⁸Musari pri hawi Kilikia pri[4]mang i keaungngochi, Aikupta pri mang i ka-richi pakun ai nai samrang i ka-jo ka-van keungchi my amkhaw u.

²⁹Nichi ly Hiti hawi Suria samrangchi teng y keaungngo harei y tangka chang chungvai tariurei, ka-ri harei y tangka chang chungvai atlo vui pangrei y jo nai ne.