Read Khumi Chin 1 ARENG KEH 13 Bible Online

1 ARENG KEH 13 - Khumi Chin bible

1 ARENG KEH 13

¹Juda pri i amo leaungrei ly ARENG i leu pei nai kamta Bethela mary y chei i, apathyp ai nai maichamra y Jeroboam angdo nai neng khala tym nai ne.

²ARENG i leu pei nai kamta amo ly “Aw maicham, maicham, ARENG my, Josia amyn pathi ai nai deaungdi ly Davida i yhm dengtheungra y tapen ai. Kapathyprachi nang i tlang tleaung y khai iy, tapawp nai maichamra kalop sa nai pathyp pi nai keungchi ai, ni ly nang i salo y padei iy apathyp ai. Khumi i hiuchi py nang tleaung y khai iy leng patlum ai,’ nanai leu pei bo,” napi.

³Naibaly amo my thui bi nai ly “Hini maicham ly anawi vui ai i, maicham salo i maiphuchi py ahei phro ai; hunaibaly kai i molam y hini leu ai ARENG my pei nai ne, nanai nang pany ai,” napi.

⁴Samrang Jeroboam ly huni leu thai nai khala, amo ai kiu takhi iy, “Huni khumi ai patiu u!” nanai leu pei bo. Naibaly ni i kiuban ly vaimy dei vui i, pakhym ali teang thai y bo.

⁵Amo my ARENG i leu pei nai thui yb nai kamta, maicham py vaimy anawi seaungkhrang iy, maiphuchi py khaileaung y ahei phro bo.

⁶Samrang Jeroboam ly amo teng y, “Pahen parai naimy kai i kiuban hawi teang ai nai, nang i ARENG Tameuh teng y chiu so pi ba!” nanai takeng. Amo ly ARENG teng y chiu sa pi i, samrang i kiuban ly hawi ali teang bo.

⁷Naibaly samrang my amo teng y, “Kai hawi vanrei samrang yhm mang y abang iy teicha teinei cho rai; nang i sa nai sai molam y langseaung kang pei ai,” napi.

⁸Amo my ly “Samrang nang i nang chawn nai yhmtheaung ka-hyhrei pei i py, kai abang y leang; ati sai py cha nei ai nai kangai y.

⁹ARENG my kai ai ati sai py cho nei y ai nai hawi, kang jeu nai lam mang vawi ali teang y ai nai py leu ang pei bo,” napi.

¹⁰Hunai deaungkho y ni ly jeu nai lam mang vawi teang y naimy, takhra lam mang vawi nai ne.

¹¹Huni neng khala Bethela mary y amo miteaung pui leaungrei awm; ni i chapochi ly huni kani Bethela mary y Juda amo i sa nai sai hawi, samrang teng y thui pi nai leuchi ampo teng y amti pi bo.

¹²Amo miteaung pui my nichi teng y, “Huni khumi ly mani lam mang vawi mo?” nanai deng i, chapochi my Juda amo i vawi nai lam thui pi bo.

¹³Amo miteaung pui my, “Kai i keaungngo kano kasau salo y atangra khai pi u, nanai leu pei i, chapochi my sa pi.

¹⁴Naibaly ni ly keaungngo kano kasau atang iy, Juda amo nithun hui jo bo. Huni amo ai ly ngopraibiu keung anui y ateh nai niu i, amo miteaung pui my, “Nang ly Juda pri i jeu nai amo ne a?” nanai deng. Huni khumi my, “Ne na a,” napi.

¹⁵Amo miteaung pui my, “Kai hawi vanrei abang ly teicha teinei cho nei hawi sina,” nanai palau bo.

¹⁶Na i py Juda amo my, “Kai ly nang hawi vanrei abang pajau y, nang i angvyn ai kawn nai py kai ngai y; Nang hawi vanrei hini meingtym y ati teicha teinei py, cho nei pajau y leang.

¹⁷Ati mana nai mo nabaly ARENG my kai ai, ‘ati teicha teinei py cho nei moh,’ nanai leu pei nai deaungkho y ne,” napi.

¹⁸Hunaibaly Bethela mary i amo miteaung pui ly ka-chawi naimy ni teng y, “Kai py nang kamta amo ne teang chybo; ARENG i kani pri amtaw thau leaungrei my, nang ai yhm y palau iy pacho panei ai nai kai teng y ang thui pi,” napi.

¹⁹Naibaly Juda pri i amo ly amo miteaung pui hawi vanrei, yhm mang y abang iy cha nei bo.

²⁰Nini ly sabawi y ateh hawi nai thym khala, amo miteaung pui teng y ARENG i leu tym i,

²¹Juda amo teng y, “ARENG my nang ly kai i leu tangai y, kai i leu pei nai kamta so y.

²²Naibaly teicha teinei cho y ai nai leu pei i py, hini meingtym y jeu iy cha nei nai deaungkho y, nang ly dei ai. Nang i veu ai ly ngamsi pajochi i tapreaung y up ai ny y,” nanai amti pi bo.

²³Nini cha nei pajau hawi nai khala, amo miteaung pui ly Juda pri i amo atang ai nai keaungngo kano kasau pei pi i,

²⁴Juda amo ly keaungngo kano kasau tleaung y atang iy, vawi nai lam y khrangsi my kei i dei bo.

²⁵Ni i veu ly lam y atlym su i, keaungngo kano kasau hawi khrangsi ly veu sahawi y angdo nai ne. Huna nai lam y atlym nai veu hawi, sahawi y angdo nai keaungngo kano kasau hawi khrangsi ai py, khuleaung chei nai khumi phyreichi my niu u. Nichi ly Bethela mary y chei iy, nichi i niu naichi amti pi bo.

²⁶Amo miteaung pui ly huni satang thai nai khala y, “Huni ly ARENG i leu pei nai tangai y nai amo teu bo tu ly! ARENG ly mymy i leu pei nai kamta, khrangsi pato iy kei hai nai bo,” napi.

²⁷Naibaly ni ly chapochi teng y, “Kai i vui keaungngo kano kasau salo y atangra so pi u,” napi i, nichi my sa pi bo.

²⁸Naibaly amo miteaung pui ly keaungngo kano kasau atang iy theu i, lam y dei nai amo hawi, sahawi y angdo naimy awm rai nai keaungngo kano kasau hawi khrangsi ai py niu bo. Khrangsi ly khumi veu ai py cho y, keaungngo kano kasau ai py kei y.

²⁹Amo miteaung pui ly veu ai kalawm iy keaungngo kano kasau tleaung y tang i, paleung si nai ka-ma-ra amteng hai ai nai hawi, veu up ai nai Bethela mary y syn bo.

³⁰Ni ly huni veu ai my i yhm dengtheung tapreaung y up chum baly, my i chapochi hawi vanrei, “Aw kai i bechy, kai i bechy!” nanai thui iy vo u bo.

³¹Hunaibaly amo miteaung pui ly my i chapochi teng y, “Kai dei nai khala y hini tapreaung, ni i angawm sahawi y up teang ba.

³²Bethela mary i maicham molam y hawi, Samari marychi theung y awm nai chiu sa nai meingtymchi molam y py, ARENG i leu pei naichi ly meitang khyp tym angym ai,” napi.

³³Israela samrang Jeroboam ly vai khrairei kamngo uikheih y naimy, my i sa nai maichamra y kalop sa ai nai pathyp pi nai keung kalop sa ai avo naichi theung i ny y nai, khumi humchi theung i vawi takhra reng nai ne. Ni ly pathyp pi nai kalop sa ai ngai nai amimi py ne sy, ngai baly khai takhra pi bo.

³⁴Ni ly hina nai kamta kamngo sa nai deaungkho y, ni i samrang kangpreang ly myh kang vui nai ne.