Read Khumi Chin 1 ARENG KEH 14 Bible Online

1 ARENG KEH 14 - Khumi Chin bible

1 ARENG KEH 14

¹Huni neng khala y samrang Jeroboam i chapo Abijah ly no nai ne.

²Jeroboam ly mymy i aju teng y, “Nang ly samrangnu, nanai apany y pa-rei mo ataphra iy, kai ai Israela samrang lawm ai, nanai ang thui pi nai keung, Siloh mary y awm nai amo Ahijah teng y chei.

³Ni i vui tako tlip horei, tako phi phyrei hawi khawihang palangrei syn iy ani i chapo ly ati mana lawm ai mo, nanai deng cham; ni my ang thui pi ai mang,” napi.

⁴Naibaly samrangnu ly Siloh mary y awm nai amo Ahijah i yhm y chei bo. Ahijah ly miteaung cheang nai deaungkho y mei niu y.

⁵ARENG my, “Jeroboam i aju ly chapo no nai molam y deng ai nai nang teng y ang jeu ai. Naibaly ni teng y hina nai kamta thui pi,” napi. Jeroboam i aju ly Ahijah teng y tym nai khala, takhra khumi amlawn iy jeu nai ne.

⁶Na i py Ahijah ly katheu pa-khora y ni i kheutyn thai baly, “Kun ba. Nang ly Jeroboam i aju ne, nanai kai pany; ati mana nai nang ly nangmy ai takhra khumi amlawn lawh mo? Kai teng y nang i vui satang hawi y nai awm.

⁷Jeroboam teng y Israela chengchi i ARENG Tameuh my leu pei nai ly hini ne he: ‘kai ly nang ai khumi mipuichi theung i vawi takhra iy, kai i khumi Israela chengchi ai peang nai keung y kang khai bo.

⁸Kaimy Davida kangpreangchi teng i pri la vui iy, nang teng y kang pei nai ne. Na i py nang ly kai i tlang tleaung y ka-ym awm iy leu pei naichi tangai nai keung, kai i miseaung Davida kamta ny y lawh; kai i mei kangai py so y lawh ly.

⁹Nang ly nangmy ny rai khala i peang nai samrangchi tleaung y py, khri pa-rei kamngo len naichi sa bo. Nang ly kai ai hi vui iy tameuh takhra ai chiu naimy mynchi sa nai molam y, kai ai kado patheu lawh ly.

¹⁰Hini molam y kai ly nang i samrang kangpreang phra hai ai; katheang kalen patleh takhra y naimy, nang i katu chanauchi i neampacho ka-so ngierei ai ly katamyh vui ai. Nang i yhm dengtheungchi ai py kaimy pasyn vui ai; nichi ai siei kamta pasyn pan vui ai.

¹¹Nang i yhm dengtheungchi theung i ami py mary theung y dei baly ui teicha, mary angam mang y dei baly langna teicha lawm ai; hini ly kai, ARENG i leu pei nai ne,’ ” napi.

¹²Huni bo y Ahijah ly Jeroboam i aju teng y thui pi bi nai ly “Vai ly yhm mang y vawi teang ba. Nang ly mary theung y kun phai kun baly, nang i chapo dei ai.

¹³Israela mipui bawibawichi ly ni i vui y paleung si vo tangam nai ka-ma-ra sa iy, ni i veu ai ly up ai. Jeroboam i yhm dengtheungchi theung y, huni deaungdi leaungrei ai naini hawihai palai up ai. Ati mana nai mo nabaly Israela chengchi i ARENG Tameuh ly huni deaungdi leaungrei ai naini khrei khyh nai deaungkho y ne.

¹⁴ARENG ly Jeroboam i samrang kangpreang myh hai ai nai, samrang leaungrei ai Israela pri peang hai ai.

¹⁵ARENG my pajeng nai deaungkho y, Israela pri ly tuiry y samji keung ahyn nai kamta anghyn u ai. Amsi pajochi teng y mymy i pei nai tlamsa nai, hini pri kahawira i nai Israela chengchi ai tangjyn raurei akyn vui iy, Euphrat tavo vai mang y tym pa-rei ahei hai ai. Ati mana nai mo nabaly nichi ly Aserah tameuhnu mynchi sa iy, mymy ai kado patheu lawh nai deaungkho y ne.

¹⁶Jeroboam ly kamngo sa i, Israela chengchi ai py kamngo lam mang y pahawi nai deaungkho y, ARENG ly Israela pri khai su ai,” napi.

¹⁷Jeroboam i aju ly Tirzah mary y vawi teang. Ni ly yhm y kun phai kun baly chapo ly dei ryp bo.

¹⁸ARENG ly mymy i miseaung amo Ahijah my thui pi nai kamta khyp, Israela mipuichi ly deaungdi i vui paleung si nai ka-ma-ra sa iy, ni i veu ai ly up nai ne.

¹⁹Samrang Jeroboam i sa nai cheaungkhangchi, tavai atiu naichi hawi pri peang nai saichi py, Israela samrangchi i razavang cha-iu theung y tajiu typ nai ne.

²⁰Jeroboam ly saneng apom phai nyhrei samrang sa iy dei i up bo. Naibaly chapo Nadab ly ampo i meingtym samrang y lyn bo.

²¹Solomon i chapo Rehoboam ly Juda samrang lawm nai khala y, saneng vui palyh pa-ngo harei awm; ni ly Tameuh ai chiu naira meingtym Israelachi i khu ka-peang verei theung i, ARENG my vawi takhra nai Jerusalem mary y, saneng holai saryhrei peang. Rehoboam i amhm ly Ammon cheng neampachy Naamah ne.

²²Juda mipuichi ly ARENG i tlang tleaung kamngo sa u bo. Nichi ly amsi pajochi tleaung y malawn py, ARENG kado theu ai nai kamngo sa tleaung sa ra nai ne.

²³Nichi ly teng y nai tameuhchi ai chiu ai nai meingtymchi sa u; mawi saleungchi hawi ka-khui hawi nai dengkeaung keungchi anui y chiu ai nai leungchengchi, Aserah myn leungchengchi py leng u bo.

²⁴Hawi y keh nai sa nai ly myn y chiu nai meingtymra y neampacho hawi neampachychi ly kamthu kamleaungchi sa u nai ne. Hini pri theung y Israela chengchi kun u nai thym khala y, ARENG my patheu pi pawn nai khumichi i sa nai amso ngai nai cheaungkhangchi ai Juda khumichi ly sa u nai ne.

²⁵Rehoboam my peang nai saneng pangrei awm nai thym khala, Aikupta samrang Shishak ly Jerusalem mary y tiu i,

²⁶Solomon i sa nai muku khopuichi, Achura yhm hawi samrang yhm i yhmtheaung katui bawibawichi ai py la pi pawn.

²⁷Samrang Rehoboam ly muku khopuichi i jeng y kheupaja khopuichi sa iy, samrang yhm katheu pa-kho typ nai keungchi teng y au.

²⁸Achura Yhm mang y samrang chei nai tleirei, tamcheaungchi ly huni khopuichi syn u. Huni bo y khai nai meingtymra khai u teang nai ne.

²⁹Samrang Rehoboam i sa nai saichi ly Juda samrangchi i razavang cha-iu theung y tajiu pi typ nai ne.

³⁰Huni neng khala y Rehoboam hawi Jeroboam ly avawrei atiu hawi nai ne.

³¹Rehoboam dei nai khala y ni ai ly Davida i mary, samrangchi i tapreaung y up bo. (Ni i amhm ly Ammon pri neampachy Nimah ne.) Ni i chapo Abijah ly ampo i meingtym amtym i, samrang lyn nai ne.