Read Khumi Chin 1 ARENG KEH 15 Bible Online

1 ARENG KEH 15 - Khumi Chin bible

1 ARENG KEH 15

¹Israela samrang Jeroboam my peang nai saneng holai tajarei khala y, Abijah ly Juda pri samrang y lyn i,

²Jerusalem mary y saneng thomrei peang bo. Ni i amhm ly Abasalom i chaniu Maakah ne.

³Abijah ly ampo i kamngo sa nai kamta sa teang; ni ly my i ARENG Tameuh ai pajo Davida kamta ly ka-ym by y.

⁴Na i py my i ARENG Tameuh ly Davida i meimai y dawn i, Abijah by y nai bo y Jerusalem mary ai peang ai nai hawi, Jerusalem mary ai chymme naimy kry ai nai chapo leaungrei ai pei bo.

⁵Ati mana nai mo nabaly Davida ly ARENG i kangai naini sa khyh nai deaungkho y ne. Samrang Davida ly Uriah i molam y ny y baly, ati takhra mana khala py, mymy i leu pei naichi taphra vai y.

⁶Rehoboam hawi Jeroboam nini tavai atiu nai ly Abijah i deung tem pa-rei atiu bo.

⁷Naibaly Abijah i sa nai cheaungkhangchi ly Juda samrangchi i razavang cha-iu theung y tajiu typ nai ne.

⁸Abijah dei nai khala y ni ai ly Davida i mary y up bo. Naibaly chapo Asa ly ampo i meingtym amtym i, samrang y lyn nai ne.

⁹Israela samrang Jeroboam i peang nai saneng apomrei awm nai khala y, Asa ly Juda pri y samrang lyn i,

¹⁰Jerusalem mary y saneng 41 rei peang nai ne. Ni i amsichy ly Abasalom i chaniu Maakah ne.

¹¹Asa ly my i amsi pajo Davida kamta ARENG i kangaichi sa.

¹²Ni ly myn chiu nai meingtymra y kamthu kamleaung sa nai neampacho neampachychi ai, pri i dengdairei patheu pawn iy, my i amsi pajo samrangchi i sa nai mynchi ai py, taphra pawn nai ne.

¹³Mymy i amsichy Maakah ai py samrangnura i nai pala vui bo. Ati mana nai mo nabaly amti amjang thawn ai nai molam Aserah tameuhnu ai chiu ai nai i vui y, amso ngai nai mynchi sa nai deaungkho y ne. Asa ly huni mynchi taphra piu iy Kidron leaunghawi y mai leang pawn nai ne.

¹⁴Asa ly myn chiu nai meingtymchi ai taphra bawi y teu i py, mymy deungrei ARENG ai ka-ym awm nai ne.

¹⁵Ni ly ARENG teng y ampo i talam nai vawnsai bawibawichi hawi, my i talam nai muku, tangka, ateaung alangchi ai Achura Yhm theung y khai bo.

¹⁶Juda samrang Asa hawi Israela samrang Baasa nini ly myni i samrang deungrei tavai atiu nai ne.

¹⁷Baasa ly Juda pri theung y kun iy, huni pri theung y kun theu nai lam paka hai ai nai Ramah mary y lengseaung apai tapang bo.

¹⁸Hunai deaungkho y samrang Asa ly Achura Yhm hawi samrang yhm theung y awm rai nai muku, tangka ngierei la iy, my i bangtang phyreichi dengdairei Damaska mary y awm nai, Suria samrang Benhadad teng y syn hai bo. Benhadad ly Hezion i katu, Tabrimmon i chapo ne.

¹⁹Asa ly ni teng y, “Ani ly ani i ampochi kamta amnai aso hawi sina; huni muku, tangkachi ly nang i vui langseaung ne. Israela samrang Baasa ly my i tavaimichi ai kai i khu ka-peang theung i dengdairei anaw pawn ai nai, nang ly ni hawi amnai asa nai taphra veng ba,” nanai leu taviu bo.

²⁰Samrang Benhadad ly Asa i tau pei nai kamta sa ai nai ngai nai deaungkho y, my i tavai luchi hawi tavaimichi ai pato iy, Israela marychi ai tiu hai bo. Nichi ly Naphtali khu ka-peang verei bo y Ijon mary, Dan mary, Abel Beth Maaka mary hawi Kalili khuchi ai nga vui bo.

²¹Samrang Baasa ly hini satang thai nai khala y, Ramah mary lengseaung apai sa nai ly anawn vui iy, Tirzah mary y vawi u teang bo.

²²Naibaly samrang Asa my Juda pri verei y leu pei nai ly mipui bawibawichi ai leaungrei py takhawi y naimy Baasa i Ramah mary apai sa naira teaung nai lengseaung hawi dengkeaungchi ai tawn hai bo. Samrang ly hunichi hawi Mizapa mary, Keba maryra y apai sa nai ne.

²³Samrang Asa i sa nai sai ngiereichi hawi ni i vam nai saichi, marychi ai apai sa nai satangchi ai Juda razavang cha-iu theung y tajiu pi typ bo. Na i py ni ly miteaung cheang nai khala sengleang man i,

²⁴dei nai khala Davida i mary samrangchi i tapreaung y up bo. Naibaly chapo Jehoshapha ly ampo i meingtym samrang y lyn nai ne.

²⁵Juda samrang Asa i peang nai pa-nyh saneng y Jeroboam i chapo Nadab ly Israela samrang y lyn i, saneng nyhrei peang.

²⁶Ni ly ampo kamta atawm teang nai ne i, ARENG i tlang tleaung y kamngo sa bo. Israela mipuichi ai py kamngo lam mang y pahawi nai ne.

²⁷Nadab hawi ni i tavaimichi ly Philistin pri Kibethon ai katanmeuh nai thym khala y, Isakhah nupai theung i Ahijah i chapo Baasa ly kangviu y Nadab ai tleh vui nai ne.

²⁸Hina nai sa nai ly Juda samrang Asa my peang nai pa-thom saneng y ne. Naibaly Baasa ly Israela samrang Nadab i meingtym samrang y lyn bo.

²⁹Huni bo y Baasa ly Jeroboam i yhm dengtheung bawibawichi ai tleh pawn nai ne. Siloh mary i awm nai amo Ahijah dengdairei ARENG i leu pei nai kamta ly Jeroboam i dengtheungchi ai leaungrei py tleaung y pa-rei, tleh chauchau bo.

³⁰Hina nai kamta tym nai ly Jeroboam ly kamngo neangneang sa iy Israela chengchi ai kamngo lam mang y pahawi naimy, Israela chengchi i ARENG Tameuh ai kado theu hai nai deaungkho y ne.

³¹Nadab i sa nai cheaungkhangchi ai Israela razavang cha-iu theung y tajiu pi typ bo.

³²Juda samrang Asa hawi Israela samrang Baasa ly myni samrang sa nai deungrei tavai atiu hawi nai ne.

³³Juda samrang Asa i peang nai pa-thom saneng y, Ahijah i chapo Baasa ly Israela samrang y lyn i, Tirzah mary y saneng apomphai palyhrei peang.

³⁴Samrang Jeroboam kamta ly ni py ARENG i tlang tleaung y kamngo sa iy, Israela mipuichi ai kamngo lam mang y pahawi nai ne.