Read Khumi Chin 1 ARENG KEH 18 Bible Online

1 ARENG KEH 18 - Khumi Chin bible

1 ARENG KEH 18

¹Huni bo kani kra kyh nai khala y, kani khang nai py saneng thomrei awm i, ARENG my Elija teng y, “Nang ly chei iy samrang Ahab i mo y kun; kai ly kani nai hai ai,” napi.

²Hunaibaly Elija ly chei bo. Huni neng khala Samari pri y kani khang nai ly khri pa-rei ty nanai ne.

³Hunai deaungkho y Ahab ly samrang yhm kry nai keung Obadia ai palau. (Obadia ly ARENG my khri pa-rei tahm khai nai deaungkho y,

⁴ARENG i amochi ai padei nai thym khala y, Obadia ly amo leaung chungvaireichi ai kamkawm nyhrei sa i, kamkawm harei y leaung vui pangrei, tapiuchira y heu iy teicha teinei hawi tui py pei pi nai ne.)

⁵Ahab ly Obadia teng y, “Keaungngo hawi keaungngo kaneaung kasauchi dei y ai nai acha bai avum teu na mo, nanai pri verei y awm nai tui sampum hawi, tavo micheaung tleirei y achi chei iy khen hawi sina,” napi.

⁶Nini ly chei ai nai meingtymchira y paleung ka-dyh naimy, lam ha harei mang y chei hawi akyhkyh bo.

⁷Huna nai chei hawi i Obadia ly Elija hawi avum tlui nai ne. Ni ly Elija ai ma nai deaungkho y lu meung nai chiu iy, “Nang ly kai i areng Elija ne a?” nanai deng.

⁸Elija my, “Ne, kai ly Elija ne na a; nang ly nangmy i samrang teng y chei iy, kai ly hi y awm, nanai thui pi,” napi.

⁹Obadia my, “Kai ly ati hawi y nai kasa lawh nai y, nang ly kai ai samrang Ahab i kiu y dei hai ai nai pato nai a?

¹⁰Samrang ly nang ai khaileaung pri verei y hau hai nai ne, nanai Tameuh kangheng, nang i ARENG amyn y kai, vaineng abeu bo. Mani pri y py Elija ly by y leang bo, nanai thui nai ly teng khyp nanai Ahab my vaineng abeu hai nai ne.

¹¹Vai, nang ly kai ai samrang Ahab teng y chei iy, hini meingtym y nang awm, nanai pato lawh bo.

¹²Naibaly kai ly hu y chei phai chei baly ARENG i phailo my nang ai, kai pany y nai meingtym y hawi veng lawh baly, kai mana kasa ai mo? Hini meingtym y nang awm, nanai samrang teng y amti pi chum nai khala, samrang ly nang ai avum y lawh baly kai ai ang tleh ai. Kai ly deaungdichy khala i dengdairei ARENG ai khri pa-rei tahm khai nai ne, nanai pany pi bo.

¹³ARENG i amochi ai Jezebeli my padei nai thym khala y, kai ly amo leaung chungvaireichi ai kamkawm nyhrei sa iy, kamkawm ha harei y leaung vui pangrei, tapiu theung y kaimy heu vui iy teichachi hawi tui pei pi nai ly nang thai y nai sai a?

¹⁴Hunaibaly nang ly ati mana nai y, kai ai samrang teng y pato iy hini meingtym y nang awm, nanai thui hai pajau ai mo? Ni ly kai ai padei ai!” napi.

¹⁵Elija my, “Vaini kai ly samrang i mo y amteng pi ai, nanai kai i chiu nai ati cheaungkhang sa thai nai ARENG i amyn y kai adeu mang,” napi.

¹⁶Hunai deaungkho y Obadia ly samrang Ahab teng y chei iy amti pi i, Ahab ly Elija hawi avum ai nai chei bo.

¹⁷Ahab ly Elija ai avum nai khala ni teng y, “Israela pri y patang hai nai keung ai kai avum bo!” nanai thui.

¹⁸Elija my, “Patang hai nai keung ly kai ny y, patang hai nai keungchi ly nang hawi nangmy i ampo naini ne. Nang ly ARENG i leu pei naichi tangai y naimy, bala i mynchi ai chiu bo.

¹⁹Vai ly Israela mipui bawibawichi ai Karamela mawi saleung y kai hawi avum ai nai leu pei ba. Samrangnu Jezabela my sabawm nai amo leaung 450 reichi hawi, Aser tameuhnu i amo leaung 400 reichi ai py palau iy hawi kalau ba,” napi.

²⁰Hunaibaly Ahab ly Israela cheng bawibawichi hawi, bala amochi ai Karamela mawi saleung y angym hai bo.

²¹Elija ly mipuichi teng y chei iy, “Nangchi ly mana tanrei paleung adi adiu naimy awm u ai mo? ARENG ly Tameuh ne, nabaly ni ai chiu u. Bala ly Tameuh ne, nabaly ni ai chiu u!” napi. Na i py khumichi ly ati sa py pathang u y.

²²Naibaly Elija my, “ARENG i amochi theung y kai leaungrei awm khyh bo. Na i py bala i amo ly leaung 450 rei awm.

²³Si katai amai nyhrei jeu hai ly harei ai nichi teng y pei pi u; nichi ly huni si katai tleh iy abai piupa chum baly, thengchi salo y khai u sy; na i py mai patawi u moh sy. Kai py takhra si katai harei ai hunai kamta sa teang ai.

²⁴Hunaibaly bala i amochi ly mychi i tameuh teng y chiu so u sy; kai py ARENG teng y chiu kasa ai. Kaichi bawibawi i chiu sa hnei takeng nai pathang pi iy mai pala pi nai keung ly Tameuh tatang ne ai,” napi. Mipuichi ly Elija i thui nai leu ai ngai u i, aeu u sau na bo.

²⁵Naibaly Elija my bala i amochi teng y, “Nangchi ly khumi nawi nai deaungkho y si katai la iy, amteaung u man ba; naibaly nangmychi i tameuh teng y chiu so u; theng ai ly mai patawi u moh,” napi.

²⁶Nichi py mychi teng y tym hai nai si katai ai apathyp ai nai sa u chum baly, bala tameuh teng y kani thun teng na pa-rei chiu sa u bo. Nichi my, “Aw bala tameuh! kaichi i chiu sa nai tangai pi kyh ba,” nanai aeu u chum baly, mychi i sa nai maicham ai taki teungtareung iy lam u. Na i py bala tameuh teng i ati sai py pathang y.

²⁷Kani thun bo nabaly Elija ly nichi teng y, “Nangchi ly hini tleaung y aeu iy chiu so u! bala ly tameuh ne! Ni ly atiti dawn vui lawh mo, sakhawn maikawm thau vui lawh mo, khuleaung chei vui lawh mo, ti y baly i vui lawh i, nangchi my palaw u!” nanai panui hai bo.

²⁸Hunaibaly bala i amochi ly vaichi i tleaung y aeu iy chiu sa u i, mychi i reita kamta acho akeichi hawi, thi leaung na pa-rei tlang y a-ohja bo.

²⁹Nichi ly kani dym nanai pa-rei tao pajeng parai naimy, aeu u teu i py pathang pi y, ati katyn py thai u y nai ne.

³⁰Naibaly Elija my khumichi teng y, “Kai i sahawi y jeu u,” napi i, khumichi ly ni i sahawi y akachu u nai khala, Elija ly taphra veng nai ARENG i maicham ai palum teng bo.

³¹Ni ly ARENG my Israela amyn pathi nai Jakob i kangpreang cheng holai nyhreichi jeng y, lengseaung holai nyhrei la.

³²Huni lengseaungchi hawi ARENG ai chiu ai nai maicham sa palai nai ne. Ni ly huni maicham kamki tui palang apom phai palyhrei chei nai angawm leaunghawi tai.

³³Naibaly maicham tleaung y thengchi pajyn hyh naimy khai chum baly, si katai abai piupa iy theng salo y khai bo. Elija my, “Chy-y palyhrei tui deu iy kapathyp mawi hawi theng salo y leih u,” napi. Khumichi ly leih u nai khala,

³⁴Elija my, “Leih u bi rai,” napi. Khumichi ly leih u bi nai khala y Elija my, “Leih panawi bi rai,” napi bi. Khumichi my py leih panawi bi bo.

³⁵Tui ly maicham kamki leaung iy leaunghawira y tui kawi na bo.

³⁶Kani ka-reu apathyp nai neng tym nai khala y, amo Elija ly maicham sahawi y chei i, “Aw Abraham, Isaka, Jakob i ARENG Tameuh, nang ly Israela chengchi i Tameuh ne, nanai hawi, kai ly nang i miseaung ne i, hini sa nai bawibawichi ly nang i leu pei nai saho y sa nai ne, nanai py vaini pany u sy.

³⁷Aw ARENG, nang ly deungtasa Tameuh ne, nanai hawi, hini khumichi ai nangmy teng y palau teang bo, nanai py hini khumichi pany ai nai, kai ai pathang pi kyh ba. Aw ARENG, pathang pi kyh ba,” nanai chiu sa bo.

³⁸Naibaly ARENG my mai pala pi nai deaungkho y apathyprachi hawi raurei, theng hawi lengseaungchi py, kang pawn nai chang y i, khaileaung malawn py kang iy, leaunghawira i tuichi py kang pawn nai ne.

³⁹Hina naichi niu nai khala y khumichi ly khaileaung y atlym u i, “ARENG ly Tameuh ne; ARENG leaungrei naini Tameuh tatang ne!” nanai aeu u bo.

⁴⁰Elija my, “Bala i amochi ai patiu u; leaungrei py tleaung moh sy!” nanai leu pei bo. Khumichi ly amo bawibawichi ai patiu iy, Elija ly nichi ai Kishon micheaung mang y pahawi i, tleh chau chau nai ne.

⁴¹Naibaly Elija ly samrang Ahab teng y, “Vai ly nang chei iy teicha teinei cho ba; kani pajyh nai katyn thai bo,” napi.

⁴²Ahab ly cha nei ai nai chei nai thym khala y, Elija ly mawi saleung y lyn kalau i, my i kheukhu nyhrei sala khaileaung y lu meung bo.

⁴³Ni ly miseaung teng y, “Chei ly pangli mang y khen angdeang cham,” napi. Miseaung ly chei i khen nai vawi teang i, “Kai ly ati sai py niu y be,” napi. Elija ly huna nai kamta tlen saryhrei chei hai iy angdeang hai bo.

⁴⁴Miseaung ly tlen saryhrei chei i, khen nai vawi teang nai khala, “Pangli mang dengdairei ang teang kalau nai, kiu padawi phei tirei py by y nai khupanymchy kaniu,” napi. Elija my miseaung teng y, “Nang ly samrang Ahab teng y chei ly kani nai y rai khala y ka-ri tleaung atang iy samrang i yhm mang y vawi ai nai thui pi,” nanai leu pei bo.

⁴⁵Neng kra y nai sala y my kani khusang ly khupanym my khiu iy ali aho i, kani khri pa-rei taawi nai ne. Ahab ly keaungngo ka-ri tleang y atang i, Jezarela mary mang y theu jo bo.

⁴⁶ARENG i sa thai naira ly Elija i tlang tleaung y tym nai deaungkho y, my i ateaung ai akeng y akawm cheng iy, Jezarela mary y tym pa-rei Ahab i mo mang angpreng nai ne.