Read Khumi Chin 1 ARENG KEH 19 Bible Online

1 ARENG KEH 19 - Khumi Chin bible

1 ARENG KEH 19

¹Samrang Ahab ly Aju Jezabela teng y Elija i sa nai cheaungkhangchi hawi, bala amo bawibawichi ai padei nai saichi py amti pi.

²Jezabela ly Elija teng y, “Kai ly khawndam hini neng tym nai khala y amochi ai nang i sa nai kamta nang i tlang tleaung y kaso y lawh baly, tameuhchi my kai ai dei ai nai pa-rei pajeng sy,” nanai khumi pato iy thui hai bo.

³Elija ly jei nai deaungkho y lawira nga ai nai preang vui bo. Ni ly my i miseaung ai hawi iy, Juda pri Baraseba mary mang y tako jo nai ne. Miseaung ai ly huni mary y daw jo iy,

⁴mymy ly kani khengrei daichi ka-vym theung y tako nai ne. Ni ly dengkeaung ka-khui hareira y tym nai khala ateh i, dei nai ly hawi keh alam ai, nanai thui iy, “Aw ARENG, hina nai ly hawi y parai bo; Kai i phailo ai lo veng ba; kai ly dei nai hawi keh alam ai!” nanai chiu sa.

⁵Ni ly dengkeaung keung anui y aseaung iy i bo. Kani pri amtaw thau leaungrei ly ni ai kiu hawi tabi i, “Angthau ly cho ba,” napi.

⁶Elija ly khen aki prei iy luleung mang y tako phirei hawi tui adym py niu i, cha nei chum baly i teang bi.

⁷Kani pri amtaw thau nai ly pa-nyh jeu bi iy, “Nang i chei ai nai khuleaung ly palo nai deaungkho y, ang thau ly cho ba,” napi.

⁸Naibaly Elija ly ang thau iy cha chum baly Sinai mawi kachai mang y kani 40 rei tako ai nai atho awm bo.

⁹Ni ly huni mawi y tym nai khala, tapiu theung y kun iy i nai ne. Hunaibaly ARENG my ni teng y, “Elija awi, nang ly hini meingtym y ati sa nai mo?” nanai deng.

¹⁰Elija my, “Aw ati cheaungkhang sa thai nai ARENG Tameuh, kai ly nang leaungrei ai naini avawrei kang chiu nai ne. Na i py Israela mipuichi ly nang hawi asa nai Leu Maikawm ai taphra iy, nang i maicham ai panawi nai hawi nang i amo bawibawichi ai py padei u bo. Kai leaungrei naini tleaung i, nichi my kai ai padei ai nai hau u bo!” napi.

¹¹Naibaly ARENG my ni teng y, “Tapiu theung i nai theu iy, mawi saleung kai i mo y angdo ba,” napi. Hunaibaly ARENG ly ni i sahawi mang tako prei i, ali kamchai aho hai bo. Hunai deaungkho y mawichi ly ako i, lengseaungchi py kawi phro pawn nai ne. Na i py ARENG ly huni ali kamchai theung y awm nai ny y; ali aho nai anawn nai khala y kaleih theu; na i py huni kaleihra y awm nai ny y.

¹²Kalei theu chum baly mai angveaung bo. Na i py huni mai kangveaung theung y ARENG ly awm nai ny y; mai kangveaung chum baly raawi kamsyhchy theu nai ne.

¹³Huni raawi thai nai khala y Elija ly my i meimai y ateaung amyn naimy theu i, tapiu pa-khora angdo bo. Huna nai khala, “Elija awi, nang ly hini meingtym y ati sa nai mo?” nanai deng nai raawi thai bo.

¹⁴Elija my, “Aw ati cheaungkhang sa thai nai ARENG Tameuh, kai ly nang leaungrei ai naini avawrei kang chiu nai ne. Na i py Israela mipuichi ly nang hawi asa nai Leu Maikawm ai taphra iy, nang i maicham ai panawi nai hawi nang i amo bawibawichi ai py padei u. Kai leaungrei naini tleaung i, nichi my kai ai padei ai nai hau u bo,” napi.

¹⁵ARENG my, “Nang ly Damaska mary sahawi daichi ka-vym mang y ali teang ly huni mary theung y kun iy Hazael ai Suria samrang y palyn nai asitui leih pi.

¹⁶Nimshi i chapo Jehu ai py Israela samrang y palyn nai asitui leih pi. Abel Meholah mary i awm nai Shaphat i chapo Elisa ai nang i meingtym amtym ai nai asitui leih pi.

¹⁷Hazael my padei ai naira i tleaung nai khumi ai ly Jehu my padei ai; Jehu kiu i tleaung nai khumi ai ly Elisa my padei ai.

¹⁸Na i py kai ai ka-ym awm iy bala ai lu meung y nai, ni i myn y pachawm y nai khumi leaung 7000 reichi ai Israela pri y daw pi ai,” napi.

¹⁹Elija ly hu i nai theu nai khala y, si katai nyhrei hawi li thawn nai Elisa ai avum; ni i mo y si katai bom holai nyhrei awm i, ni ly kangkhym mang si bomrei hawi li thawn nai ne. Elija ly my i ateaung aleng iy, Elisa i tlang tleaung y chang bo.

²⁰Huna nai khala Elisa ly my i si kataichi ai khai su iy, Elija nithun angpreng naimy, “Kaimy i nei ngaai teng y vawi iy chibai so rai si; hunaibaly nang hawi vanrei abang ai,” napi. Elija my, “Hawi mang, chei ba; kai ly nang ai kam y leang,” napi

²¹Hunaibaly Elisa ly my i si nyhrei tleh iy li thawnra kateang ai theng palawn i theaung bo. Naibaly mawi an ly khumichi ai pacho; huni chum baly Elija nithun abang jo nai ne.