Read Khumi Chin 1 ARENG KEH 2 Bible Online

1 ARENG KEH 2 - Khumi Chin bible

1 ARENG KEH 2

¹Davida ly mymy dei ai nai kasa nai khala y chapo Solomon ai palau i, kangkhym i taviu nai leuchi thui pi bo.

²Samrang my, “Kai ly dei ai nai neng tym bo; nang ly nangmy ai a-ym iy ham parai naimy,

³nang i ARENG Tameuh my leu pei nai kamta so; Mosi i reita cha-iura y tajiu nai kamta, mymy i reitachi hawi leu pei nai ngiereichi tangai ba. Hunaibaly nang i sa naira tleirei y hawi, chei naira tleirei y eaung ai.

⁴Nang ly ARENG i kangai sa baly, mymy ly kai teng y ang pei nai leu ka-deu ly khaw hai ai. Mymy ly ‘nang i katu chanauchi ly kai i leu pei naichi ai, paleung hawi phailo verei, takhawi y pa-rei tangai iy dawn patyp nai ryrei ly kaimy nichi ai Israela pri peang ai nai pei ai,” nanai leu ang pei.

⁵“Huni bo y kang taviu ai nai harei awm rai; Juaba ly Israela tavailu areng leaung nyhrei ne nai, Nera i chapo Abana hawi Jetha i chapo Amasa nini ai padei nai molam y, kai ai mana ang sa mo, nanai nang pany ai. Tavai keung y tleh naichi molam y vawitheung tha nai kamta, nini awmnem nai thym khala, ni ly mana tleh mo, nanai py nang pany ai. Ni ly kamngo by y nai khumichi ai padei bo. Ni i sa nai sai molam y kai teng y tym i, ni i hawi y nai ly kai i tlang tleaung y tym bo.

⁶Nang ly nangmy i sa ai nai kalop pany; ni ai ly dei kari dei hai moh sy.

⁷“Na i py Kilead pri y awm nai Bazilai i chapochi ai ly pahen ly kry ba. Ati mana nai mo nabaly ngamjo Abasalom teng i nai kapreang nai thym khala y, nichi ly kai ai ang pahen u nai deaungkho y ne.

⁸“Benjamin pri Bahurim mary y awm nai Kera i chapo Shimei py awm rai; kai Mahanaim mary y chei nai khala y, ni ly kai ai ang pasawi kheih bo. Na i py ni ly Jordan tavo y ang jeu iy, kai ai lamchung nai khala, kai ly ni ai padei y ai nai ARENG i amyn y vaineng abeu kheih bo.

⁹Na i py nang ly ni ai pajeng y naimy awm moh; sa ai nai kalop ai nangmy pany nai kamta, ni ai padei ai nai tla,” nanai leu taviu bo.

¹⁰Davida dei nai khala, ni ai Davida i mary y up bo.

¹¹Ni ly Hebron mary y saneng saryhrei, Jerusalem mary y saneng phai palyh thomrei peang; ni ly saneng vui palyhrei Israela samrang lawm nai ne.

¹²Solomon ly ampo i meingtym amtym i, samrang lyn bo; ni i sa thai naira ly khaw tleaung y khawra nai ne.

¹³Naibaly Hakith i chapo Adonijah ly Solomon i amhm Bathaseba teng y chei; Bathaseba my, “Vai, nang jeu nai ly ahawi ka-dawi kamta jeu nai a?” nanai deng. Adonijah my, “Ne na a,” nanai pathang.

¹⁴Huni bo y ni ly “Kai ly nang teng y sairei takeng ai nai ngai,” napi. Bathaseba my, “Ati mo?” napi.

¹⁵Adonijah my, “Kai ly samrang lawm ai nai avo nai ne; lawm ai, nanai py Israela chengchi my athang khai nai ly nang pany. Na i py ARENG i kangai ly kai, samrang lawm y naimy, kai i amnau naini samrang lawm nai ne.

¹⁶Vai, kai ly nang teng y sairei takeng ai nai ngai; pahen parai naimy akhi vui moh kyh ba,” napi. Bathaseba my, “Ati amjy mo?” nanai deng.

¹⁷Adonijah my, “Shunem mary i neampachy Abisha ai kai hawi apom hai ai nai, pahen parai naimy samrang Solomon teng y takeng pi kyh; ni ly nang i leu akhi ai ny y, nanai kai pany,” napi.

¹⁸Bathaseba my py, “Hawi mang, nang i vui kaimy samrang teng y thui pi ai,” napi.

¹⁹Hunai deaungkho y Bathaseba ly Adonijah i vui takeng pi ai nai, samrang teng y chei bo. Samrang py amhm ai lamchung ai nai ang thau i, lu meung chum baly samrang atehra y ateh teang bo. Naibaly takhra atehra harei la hai iy, amhm ai mymy i lamtang mang y ateh haibo.

²⁰Amhm my, “Kai ly theangchichy nai amtheaungra harei, nang teng y hnei ai nai ngai; akhi vui moh ba,” napi. Samrang my, “Ati ngai mo nei awi, kai akhi y leang mang,” napi.

²¹Naibaly amhm my, “Abisa ai ngamjo Adonijah teng y deaung paseng pi kyh ba,” napi.

²²Samrang my, “Ati mana nai y Abisha ai naini hnei lawh khyh mo? Samrang atehra phai hnei sy bei; ni ly kai i amjo ne. Pathyp pi nai keung Abijatha hawi Juaba py, ni teng y abang nai ne! " napi.

²³Naibaly Solomon my, “Hinai kamta hnei lawh nai y, Adonijah ai kai padei y lawh baly, Tameuh my kai ai padei sy!

²⁴ARENG ly kai ai ngaai Davida i atehra salo y, khaw parai naimy ang khai bo. Mymy ly mymy i leu adeu nai kamta, kai hawi kai i katu chanauchi teng y pri pei nai ne. Adonijah ly vaini my dei ai nai tla ai, nanai heng nai ARENG i amyn y kai, vaineng abeu bo!,” nanai hawihai adeu kheng bo.

²⁵Naibaly samrang Solomon my leu pei nai deaungkho y, Benaja ly chei iy Adonijah ai tleh vui bo.

²⁶Naibaly samrang Solomon ly pathyp pi nai keung Abiatha teng y, Anatho mary nangmy i awm nai avang saleaung y chei; nang ly dei ai ataing nai khumi ne. Na i ly nang ly kai i ampo Davida deung y, ARENG i Leu Maikawm Pawm kry nai khumi, Davida hawi vanrei patang ahawi nai khumi ne nai deaungkho y vai, kai ly nang ai kang padei y leang bo,” napi.

²⁷Naibaly Solomon ly Abiatha ai ARENG i kalop, pathyp pi nai keungra i nai anawn hai vui bo. Hina nai kamta samrang ly Siloh mary i pathyp pi nai keung Eli hawi katu chanauchi molam y, ARENG i leu pei naichi angym hai nai ne.

²⁸Hini satang ai Juaba thai nai khala, ni ly ARENG i taichy yhm mang y preang iy, maicham takichi amkhaw cheng bo. (Ni ly Adonijah ai asa hai teu i py, Abasalom ai ly aso hai y leang.)

²⁹Ni ly Adonijah awm nai taichy mang y preang iy, maicham sahawi y angdo naimy awm, nanai satang nga nai khala, samrang ly Juaba teng y, ati mana nai maicham mang y preang lawh mo, nanai khumi pato iy deng hai bo. Naibaly Juaba my, kai ly Solomon ai jei nai deaungkho y, ARENG teng y preang nai ne, nanai pathang bo. Hunai deaungkho y samrang Solomon ly Benaja ai pato iy, Juaba ai padei hai bo.

³⁰Benaja ly ARENG i taichy yhm mang y chei iy Juaba teng y, “Angam mang y theu, samrang i leu pei nai awm,” napi. Juaba my, “Kangjeu pajau y; kai ly hi y my kadei ai,” nanai pathang. Benaja ly samrang teng y vawi teang iy, Juaba i thui nai leu amti pi.

³¹Samrang Solomon my py, “Juaba i thui nai kamta so; ni ai padei iy up veng ryp. Huna nai khala kamngo by y nai khumichi ai Juaba my padei nai i kamngo ly kai teng y py, Davida i takhra katu chanauchi teng y py tym hai ai ny y.

³²Kai i ampo Davida pany y naimy sa nai, khumi ai padei nai molam y, ARENG ly Juaba y pajeng ai. Juaba ly mymy tleaung y hawi keh nai Israela tavailu areng Abana hawi, Juda tavailu areng Amasa napi nai, kamngo by y nai khumi leaung nyhrei ai padei nai ne.

³³Hini pajeng naira ly khumi ai padei nai keung Juaba hawi, ni i katu chanauchi teng y tym jojo ai. Na i py Davida i meingtym y amtym nai katu chanauchi teng y ly ARENG my eaung naira nga hai jojo ai,” napi.

³⁴Hunai deaungkho y Benaja ly ARENG i taichy yhm mang chei iy, Juaba ai tleh vui chum baly, avang y awm nai mymy i yhm y up bo.

³⁵Naibaly samrang ly Benaja ai Juaba i meingtym, tavailu areng ra y khai iy, pathyp pi nai keung Zadok ai py, Abiatha i meingtym y khai nai ne.

³⁶Naibaly samrang ly Shimei ai palau i ni teng y, “Nang ly Jerusalem mary y yhm harei sa iy awm ba; hini mary i nai theu moh.

³⁷Nang ly theu vui iy Kidron tavo kan vui lawh baly dei takengkei ai. Huna nai khala amymy ai tamang bo, nanai adawn vau ai,” napi.

³⁸Shimei my py, “Hawi mang, samrang awi, nang i leu pei nai kamta tangai ai,” nanai pathang chum baly, Jerusalem mary y neng kra parai pa-rei awm bo.

³⁹Na i py saneng thomrei bo y Shimei i miseaung leaung nyhrei ly Maaka i chapo kath samrang Akhi teng y preang hawi bo. Shimei ly kath mary y nini awm, nanai satang thai nai khala,

⁴⁰keaungngo kano kasau tleaung y atang iy, miseaung ni ai hau ai nai samrang Akhi teng y chei. Ni ly my i miseaung ni ai avum baly, yhm mang y hawi teang bo.

⁴¹Solomon ly Shimei i sa nai saichi thai nai khala,

⁴²ni ai palau teang i ni teng y, “Kai ly nang ai Jerusalem mary i dengdairei theu y ai nai, ARENG i amyn y vaineng adeu hai bo. Theu vui lawh baly dei takengkei ai nai tla, nanai kang pany hai chum bo. Nangmy py kai i leu tangai ai, nanai adeu nai ny y a?

⁴³Na i py ati mana nai y amy i adeu nai leu taphra iy, kai i leu pei nai tangai y lawh mo?

⁴⁴Nang ly kai i ampo tlang tleaung y sa tamang nai bawibawi ly pany nai ne. Hunichi molam y ARENG my nang ai pajeng ai.

⁴⁵Na i py kai ai ly amtheaung hai ai i, Davida i pri deungtasa khaw hai ai,” napi.

⁴⁶Naibaly Benaja ly samrang my leu pei nai kamta, Shimei ai tleh vui bo. Vai ly samrang Solomon ly mymy i pri ai, hawihai palai peang nai ne.