Read Khumi Chin 1 ARENG KEH 20 Bible Online

1 ARENG KEH 20 - Khumi Chin bible

1 ARENG KEH 20

¹Suria samrang Benhada ly my i tavaimi bawibawichi ai pangym hai chum baly, takhra samrang leaung 32 reichi hawi amkawm iy, nichi i keaungngo kamkawm, ka-ri kamkawmchi hawi vanrei tavai keung y theu i, Samari mary ai katanmeuh bo.

²Ni ly savaichi ai mary theung y pato i, Israela samrang Ahab teng y, “Samrang Benhada ly

³nang i muku tangka, aju hawi cho chanauchi ai ni teng y au ai nai hnei nai ne,” nanai amti pi.

⁴Huna nai khala Ahab my, “Kai hawi kaimy i peang nai yhmtheaung bawibawichi kai i areng Benhada teng y au ai nai ngai mang, nanai kai i areng samrang teng y amti pi u,” napi.

⁵Huni bo y savaichi ly Ahab teng y tym u bi i, “Samrang Benhada my, ‘nang i muku, tangka, aju hawi cho chanauchi ai kai kang hnei bo.

⁶Vai, kai ly nang i samrang yhm hawi bangtangchi i yhmchira hau iy, vang kateng vawnsai cheaungkhangchi la ai nai tavaimi miteaung kehchi kang pato ai; nichi ly khawndam, hini neng y nang teng y ang tym u ai,’ nanai leu kang pei,” napi.

⁷Samrang Ahab ly pri verei y awm nai miteaung kehchi ai palau iy, hini khumi ly achi ai phra hai ai ngai nai khumi ne. Kai teng y savai pato iy muku, tangka, aju hawi cho chanauchi ang hnei nai thym khala, kai akhi y leang,” napi.

⁸Miteaung kehchi hawi mipuichi my, “Ni i leu ai tangai pi moh, pei py pei pi moh,” napi.

⁹Hunai deaungkho y Ahab ly Benhada i savaichi teng y, “Kai ly angchei i hnei naichi kangai teu i py, pa-nyh i hnei naichi ai ly ngai y leang bo, nanai kai i areng samrang Benhada teng y thui pi u,” napi. Savaichi ly vawi u i, tym u taleang bi iy

¹⁰samrang Benhada my, “Nang i mary taphra iy lengseaung katleu kiu hawi tawn pajau ai nai, khumi neangneang kanghawi eung ai. Hina nai kaso y lawh baly tameuhchi my kai ai dei pa-rei pajeng sy, nanai leu ang pei,” napi.

¹¹Samrang Ahab my py, “Sorai risa tatang nabaly atiu chum khala y amlyh reng; atiu pajau y rai khala ly amlyh vai y, nanai samrang Benhada teng y thui pi,” napi.

¹²Samrang Benhada ly mymy hawi amsawi amnai asa nai samrangchi hawi vanrei, nichi i kanih yhmchira y nei cha u nai thym khala, Ahab teng i pathang pi nai leu thai nai ne. Hunaibaly ni ly my i tavaimichi teng y Samari mary ai tiu ai nai leu pei i, nichi ly angvei u rym bo.

¹³Huna nai thym khala y amo leaungrei ly samrang Ahab teng y tym i, “ARENG my, ‘huni tavaimi kanghuchi ai niu iy jei moh! Vaini nang teng y huni tavaimichi ai eaung ai nai kang pei ai; kai ly ARENG ne, nanai nang pany ai,’ nanai leu ang pei bo,” napi.

¹⁴Ahab my, “Ami my lu sa iy tiu ai mo?” nanai deng. Amo my, “Khu peang nai keungchi anui y awm nai tavaimi thawndeangchi ai lu sa hai ai nai ARENG my leu ang pei,” napi. Samrang my, “Tavaimi kamkawm ai ami my lu sa pi ai mo?” nanai deng. “Nangmy lu sa ai nai tla ai,” nanai amo my pathang.

¹⁵Hunaibaly samrang ly khu peang nai keungchi i anui y awm nai tavaimi thawndeang leaung 232 reichi ai palau iy, tavaimi leaung 7,000 rei awm nai Israela tavaimi kamkawm angym hai bo.

¹⁶Kani thun teng nai khala y Benhada hawi amsawi amnai asa nai samrang leaung 32 reichi ly mymychi i kanih yhmchira y nei cha pavui u nai thym y,

¹⁷Ahab ly tiu amteaung bo. Khu peang nai tavailu arengchi i tavaimi thawndeangchi my, mo mang y amtheung iy amsa u. Benhada my pato yb nai khen paviu naichi py, Samari mary i dengdairei tavaimi kamkawm harei amsa nai satang ly samrang teng y thui pi bo.

¹⁸Samrang my, “Tavai atiu ai nai ang jeu nai py ne sy, ka-dyh ka-dawi asa ai nai ang jeu nai py ne sy, nichi ai kangheng patiu iy hawi u,” nanai leu pei.

¹⁹Khu peang nai tavailu arengchi i tavaimi thawndeangchi ly Israela tavaimi kamkawm mo y lu sa iy tiu u.

²⁰Nichi bawibawi ly leaung leaungrei kangnga tleh u bo; huna nai khala Suria tavaimichi ly angpreng pawn nai deaungkho y, Israela tavaimichi ly hui u kaliki. Naibaly Benhada ly keaungngo tavaimichi hawi vanrei keaungngo atang iy preang nai ne.

²¹Samrang Ahab py tavai keung y chei teang i, keaungngochi hawi keaungngo ka-richi ai patiu iy, Suria chengchi ai khri pa-rei sum hai bo.

²²Huna nai khala amo ly samrang Ahab teng y chei i, “Suria samrang ly mo mang kaseih tym en nai neng khala y ang tiu bi ai. Hunai deaungkho y nang ly nangmy i tavaimichi ai atho awm pa-rei, hawihai palai so teang ba,” napi

²³Samrang Benhada i bangtangchi my, “Israela chengchi i tameuhchi ly mawi peang nai tameuhchi ne nai deaungkho y, Israela chengchi my achi ai pajau nai ne; achi ly nichi hawi adym y atiu ai nai tla lawh teu i khyly, nichi ai pajau takengkei ai.

²⁴Vai ly samrang leaung phai palyh leaung nyhreichi ai, mychi i tavaimichi ai peang hai y naimy, nichi i meingtym y tavai luchi ai khai takhra ba.

²⁵Naibaly vaichi khala y nang ai ang khai su iy angpreng pawn nai tavaimichi kamta nawi i, jangni i kamta nawi parai nai keaungngo kamkawm, ka-ri kamkawmchi abawi nai tavaimi kamkawm pui harei so teang; achi ly Israela chengchi ai adym y tiu ai i, hini tlenrei ly nichi ai eaung ngaw ai,” napi. Huna nai kamta tau pei nai ai samrang Benhada ly ngai nai deaungkho y, nichi i tau pei nai kamta sa.

²⁶Nisa theu en nai khala y samrang ly my i tavaimichi ai angym hai iy, Aphek mary mang y tavai thau u bo.

²⁷Israela chengchi py akachu u i, teicha teineichi hawi, mary angam mang y theu u. Naibaly nichi ly mychi i tavaimi kamkawm ai phy nyhrei phy iy, Suria tavaimi kamkawm mang y motha i, meingtym la u bo. Adym verei kawipri nanai Suria chengchi hawi khen pata baly, Israela chengchi ly mi-i kanghuchy nyhrei hawi atawm nai ne.

²⁸Amo leaungrei ly samrang teng y chei iy, “ARENG my, ‘kai ly mawi peang nai tameuh ne; adym ai ly peang y leang, nanai Suria chengchi my thui nai deaungkho y, nichi i khri pa-rei nawi nai tavaimi kamkawm ai, nang i kiu y kang-au ai; kai ly Tameuh ne, nanai nang hawi vanrei nang i khumichi pany u ai,’ nanai leu ang pei,” napi.

²⁹Suria chengchi hawi Israela chengchi ly kani saryhrei mo atha leungtang naimy awm u bo. Saryh kani atiu amteaung u nai khala ly Israela chengchi my Suria cheng leaung tasengreichi ai padei u nai ne.

³⁰Dei kamthun khumichi ly Aphek mary mang y angpreng u i, khumi leaung 27,000 reichi ai ly mary apai my anawi hai bo. Benhada my py mary theung y angpreng i, yhm harei i takun theung y aheu vui nai ne.

³¹Ni i miteaung kehchi ly ni teng y jeu u iy, “Israela samrangchi ly tamen naira awm, nanai kaichi thai; hunai y kaichi ai Israela samrang teng y chei ai nai pei ba. Kaichi ly akeng y paisiu apam iy, kaneaung y vuinawnchi api naimy chei u ai; ni ly nang ai padei y naimy ang khai lym ai,” napi u.

³²Huni bo y nichi ly akeng y paisiu apam iy, kaneaung y vuinawnchi api naimy samrang Ahab teng y chei u i ni teng y, “Nang i miseaung Benhada my, ni ai padei y ai nai molam, nang teng y ahui nai ne,” napi u bo. Ahab my, “Ni ly vai khrairei heng jo rai a? Ni ly kai i amjo ne!” napi.

³³Benhada i miteaung kehchi ly leu kahawi pathang pi na mo, nanai ajeng u bo. Naibaly Ahab my, “Amjo,” nanai thui nai khala nichi ly pathang praw i, “Nangmy thui nai kamta, Benhada ly nang i amjo ne!” napi u. Huna nai khala Ahab my, “Ni ai kai teng y jeu hai u,” napi. Benhada tym nai khala Ahab ly ni ai my i keaungngo ka-ri tleaung y atang ai nai palau bo.

³⁴Benhada my, “Nang i ampo teng i nai kai i ampo my la vui nai marychi ai, nang teng y kang pei teang ai. Kai i ampo ly Samari mary y ka-sum ka-pai, ka-jo ka-van sangum meingtym sa nai kamta, nang py Damaska mary y ka-sum ka-pai, ka-jo ka-van sangum meingtym sa pajau mang,” napi. Ahab my, “Hina nai adyh adawi nai molam y, nang ai kang padei y ai,” napi. Naibaly ni ly Benhada hawi amsawi amnai asa hawi chum baly, Benhada ai vawi ai nai pei bo.

³⁵Amo kamkawm theung i amo leaungrei ly ARENG i leu pei nai molam y takhra amo leaungrei teng y, “Kai ai pakhau,” napi. Na i py amo my akhi vui i,

³⁶ni ai, “Nang ly ARENG i leu pei nai akhi vui nai deaungkho y, kai teng i nai theu phai theu baly, khrangsi my kei iy dei ai,” napi. Huna nai thui nai kamta hu i nai theu phai theu baly huni amo ai ly khrangsi my kei i dei bo.

³⁷Naibaly pakhau ai nai leu pei nai amo ly takhra amo leaungrei teng y chei iy, “Kai ai pakhau,” napi i huni khumi ly no pa-rei pakhau i, tamo nga hai bo.

³⁸Amo ly my i meimai y kanih hawi bam chum baly, mo ama y pa-rei sa iy, lam teng y samrang Ahab jeu nai ajeng bo.

³⁹Samrang jeu nai khala amo my, “Tahm awm parai nai keung awi, kai ly tavai atiu nai thym khala, risa leaungrei my paleung ka-e leaungrei ai kai teng y au i, ‘hini khumi ai kry ba, preang veng lawh baly nang ly ni i jeng y nangmy tlang a-au ai nai tla ai; ti y baly tangkacho sang thomrei pe ai nai tla ai,’ nanai leu taviu bo.

⁴⁰Na i py kai ly takhra kalopchi hawi kalop nawi nai thym khala y, huni khumi ly preang veng bo,” napi. Samrang my, “Nang ly nangmy ai tara chih chum nai ne i, nang ly kamngo pajeng naira avum ai,” napi.

⁴¹Huna nai khala amo ly my i meimai i nai kanih sei vui nai khala, samrang ly amo ne, nanai pany bo.

⁴²Amo my py, “ARENG my, ‘paleung ka-e ai tleh ai nai kaimy leu kang pei i py, ni ai patleaung veng nai molam, ni i jeng y nang i tlang heung ai nai tla ai; nang i tavaimi kamkawm my py, huni paleung ka-e i tavaimi kamkawm ai tleaung hai vui nai deaungkho y, nangchi ly taphra naira avum ai,’ nanai ang thui pi bo,” napi.

⁴³Naibaly samrang ly paleung bi paleung mawn naimy, Samari mary yhm y vawi jo bo.