Read Khumi Chin 1 ARENG KEH 21 Bible Online

1 ARENG KEH 21 - Khumi Chin bible

1 ARENG KEH 21

¹Jezarela mary y awm nai samrang Ahab i yhm sahawi y, Naboth napi nai khumi i kreip akho awm.

²Kanirei nai khala y Ahab my Naboth teng y, “Nang i kreip akho ai kai aly ngai; huni akho ly kai i yhm hawi py kasa nai ne i, huni khaileaungra y amti amjang bai sa ai nai ngai. Nang ai tuni akho bai tleaung y hawi keh nai kreip akho kang pei ai, ti y naimy nang ngai nabaly vang i py kang pei ai,” napi.

³Naboth my, “Kai ly hini akho ai amsi pajochi teng i amtym nai deaungkho y, nang teng y pei ai nai ly ARENG my paka na sy!” napi.

⁴Ahab ly Naboth i leu molam y paleung ka-dawn hawi y; kado theu naimy yhm mang y vawi bo. Ni ly angpang mang y engleng i, ira tleaung y aseaung iy biu py cho y bo.

⁵Ni i aju Jezabela ly ni teng y jeu iy, nang ly ati deaungkho y hina tanrei paleung hawi y nai awm lawh mo? Ati mana nai molam y cho nei y nai pa-rei awm lawh mo?” nanai deng.

⁶Samrang my, “Ati mana nai mo nabaly kai ly Naboth teng y, nang i kreip akho kaimy van si, ti y baly ni i kreip akho jeng y takhra kreip akho hawi angtheung ai nai thui pi i py Naboth my, ‘hini akho ai ly nang teng y kang pei pajau y leang,’ ang napi lawh. Hunai deaungkho y kai ly paleung ka-dawn hawi y nai ne!” napi.

⁷Jezabela my, “Nang ly Israela samrang ny y a? Aseaung naira i ang thau iy amo theu naimy cho nei ba; Naboth i kreip akho ly nang i kiu y kaimy kang-au ai!” napi.

⁸Naibaly Jezabela ly cha tajiu iy Ahab i amyn y lamai nip i, samrang i pajawp typ nai ka-ma-ra hawi pajawp hai typ chum baly, Jezarela mary i khumichi ai lu sa nai keungchi hawi bangtangchi teng y pei.

⁹Huni cha theung y ly “Nangchi ly kanirei biu hai iy khumi mipuichi ai palau achu; Naboth ai ly tahm asang nai atehra meingtym pei pi u.

¹⁰Khumi hawi y nai leaung nyhrei ai Naboth i mo y ateh hai iy, ‘hini khumi ly Tameuh hawi samrang ai thui tamawn nai keung ne,’ nanai seu hawi na sy; naibaly huni khumi ai mary angam mang y patheu iy lengseaung hawi aphi u ka,” nanai ne.

¹¹Bangtangchi hawi Jezarela mary i khumichi ai lu sa nai keungchi ly Jezabela i leu pei nai kamta sa u bo.

¹²Nichi ly biu hai ai nai kanirei thai hai chum baly mipuichi angym iy, Naboth ai tahm asang nai meingtym pei u bo.

¹³Khumi hawi y nai leaung nyhrei my py, Tameuh hawi samrang ai thui tamawn nai molam y, Naboth ai mipuichi mo y seu u. Naibaly khumichi ly ni ai mary angam mang y patheu iy, lengseaung hawi aphi u ka nai ne.

¹⁴Naibaly Jezabela teng y satang thai hai nai ly “Naboth ai padei veng bo,” napi.

¹⁵Huni satang nga phai nga baly Jezabela ly Ahab teng y, “Naboth ly dei bo i, vai, nang chei ly nimy jo ai ngai y nai kreip akho lo vui jau,” napi.

¹⁶Ahab my py huni akho peang vui ai nai, vaimy ang thau praw iy chei bo.

¹⁷Naibaly ARENG ly Tishbe mary y awm nai amo Elija teng y,

¹⁸“Nang ly Samari mary i samrang Ahab teng y chei; ni ly Naboth i kreip akho la vui ai sa nai akho theung y ni ai avum ai mang.

¹⁹Kai ARENG my, ‘nang ly khumi ai padei nai bo y, ni i vawn la pi vui ai a?,’ nanai ni teng y thui pi; ‘Naboth i thi uichi my palei nai meingtym y, nang i thi py palei u ai,’ nanai thui nai leu py ni teng y amti pi!” napi.

²⁰Ahab ly Elija ai niu nai khala, “Kai i paleung ka-e awi, nang ly kai ai ka-vum sa nai a?” nanai deng. Elija my, “Avum bo, nang ly ARENG i mei ka-niu y kamngo sa ai nai, nangmy ai nangmy akhai takhra nai deaungkho y, avum ai nai kang jeu nai ne,” napi.

²¹Hunai deaungkho y ARENG my, “Kai ly nang i tlang tleaung y patang naira tym hai ai; nang ai kang pasyn vui iy nang i dengtheung katheang kalen neampacho ngiereichi ai py tamyh pawn ai.

²²Nang ly Israela mipuichi ai kamngo sa ai nai pahawi nai ne iy, nang i yhm dengtheungchi ly Neba i chapo samrang Jeroboam i yhm dengtheungchi hawi, Ahija i chapo samrang Baasa i yhm dengtheungchi kamta lawm ai.’

²³Jezebela i molam y ARENG my, Jezarela mary y huni neampachy i veu ly uichi i teicha lawm ai.

²⁴Ni i amjo amnau bawibawichi py mary theung y dei baly uichi i teicha, mary angam mang y dei baly langnachi i teicha lawm u ai, nanai leu ang pei,” napi.

²⁵(ARENG i mei ka-niu y khri pa-rei kamngo sa nai Ahab kamta ly leaungrei py by y; ni i sa nai sai bawibawichi ly samrangnu Jezabela i pachei nai leu molam y ne.

²⁶Ahab ly Amori pri khumichi i sa nai kamta, mynchi y chiu nai molam y khri pa-rei jei kaji ai hawi nai kamngochi sa bo. Amori khumichi ly Kanan pri y Israela chengchi kun u nai thym khala, ARENG my patheu nai khumichi ne.)

²⁷Elija my hini leu thui pi pajau nai khala y Ahab ly mymy i ateaungchi sei vui iy, paisiu amchiu bo. Ni ly teicha py cho y naimy paisiu amchiu iy i bo. Aleaung ali nai khala py meimai takhuisui nai ne.

²⁸ARENG ly amo Elija teng y,

²⁹“Kai i mei ka-niu y Ahab ly mana tanrei paleung apanem mo, nanai niu a? Ni ly nina tanrei apanem nai deaungkho y kai ly ni i deung y patang naira tym hai ai ny y. Ni i chapo deung, ni i yhm dengtheungchi i tlang tleaung y patang naira katym hai ai,” napi.