Read Khumi Chin 1 ARENG KEH 22 Bible Online

1 ARENG KEH 22 - Khumi Chin bible

1 ARENG KEH 22

¹Israela pri hawi Suria pri ly saneng nyhrei sala y tavai atiu u y bo.

²Na i py pa-thom saneng y Juda samrang Jehoshapha ly Israela samrang teng y pavai ai nai tym.

³Ahab ly my i bangtangchi teng y, “Achi ly Kilead pri Ramoth mary ai Suria samrang teng i nga ali teang ai nai ati mana nai y, ati sai py so y naimy awm u lawh mo? Huni mary ai achi my peang nai ny y a?,” napi.

⁴Naibaly Ahab ly Jehoshapha teng y, “Nang ly Ramoth mary ai tiu ai nai kai hawi vanrei chei ai a?,” nanai deng. Jehoshapha my, “Nang angveirym baly kai py angveirym bo; kai i tavaimichi hawi keaungngo atang nai tavaimichi py, angveirym nai ne.

⁵Na i py hini molam y ARENG teng y deng man rai ba,” napi.

⁶Hunai deaungkho y Ahab ly amo leaung 400 virei ai palau iy, “Kai ly Ramoth mary y tiu ai nai avo a, avo y a?,” nanai deng. Amochi my, “Huni mary ai tiu ba; Areng my nang ai eaung hai ai mang,” napi u.

⁷Na i py Jehoshapha my, “Achi i vui ARENG teng y deng pi ai nai takhra amo by y bo a?,” nanai deng.

⁸Ahab my, “Takhra amo leaungrei awm rai; ni ly Imala i chapo Mikha ne. Na i py ni ly achi i vui y mana khala py kahawi thui pi vai y; hawi y naichi ai naini avawrei thui pi khyh nai deaungkho y, kai ly ni ai ngai y,” napi. Hunaibaly Jehoshapha my, “Tuni leu ly thui ngau y!,” napi.

⁹Naibaly samrang Ahab ly samrang yhm kry nai miteaung keh leaungrei ai palau iy, Mikha ai vaimy palau ai nai pato bo.

¹⁰Samrang leaung nyhrei ly samrang ateaungchi amthyp naimy, Samari mary apai katheu angam mang choh atyhra meingtym, samrang atehrachi tleaung y ateh hawi. Nini i mo y amo bawibawichi my ly mo mang i satang thui pi bo.

¹¹Nichi theung i amo leaungrei Khenanah i chapo Zedekiah ly tamo meaung kamsuichi sa chum baly Ahab teng y, “ARENG my, ‘nang ly hini kamsuichi hawi Suria chengchi ai tiu i, eaung ai mang,’ ang napi,” napi.

¹²Takhra amo bawibawichi my py, hunai kamta samrang teng y thui pi u bo. Nichi my, “Ramoth mary y tavai thau hawi; ARENG my nangni ai eaung hai ai mang,” napi.

¹³Hunai thym y Mikha teng y chei nai samrang yhm miteaung keh ly Mikha teng y, “Takhra amo bawibawichi my samrang ly eaung naira nga ai, nanai thui pi bawibawi bo; nang ly huna nai kamta thui pi teang ai nai hawi,” napi.

¹⁴Na i py Mikha my, “Kai ly ARENG i leu pei nai kamta thui pi ai, nanai Tameuh kang heng i amyn y kathui bo!” napi.

¹⁵Mikha ly samrang i mo y tym nai khala samrang my, “Mikha awi, samrang Jehoshapha hawi kai ly Ramoth mary y tiu ai nai avo a, avo y a?,” nanai deng. Mikha my, “Ramoth mary ai tiu, eaung ai! ARENG my nangni ai eaung hai ai,” napi.

¹⁶Na i py Ahab my, “ARENG i amyn y leu thui nai khala, leu meitang naini teaung ai nai nang ai tlen majirei kang thui pi ai mo?,” napi.

¹⁷Huna nai khala Mikha my, “Israela mipuichi ly typ nai keung by y nai beramchi kamta, mawi saleungchira y ahei phro nai kai kaniu. ARENG my, ‘hini khumichi ai lu sa nai keung by y; nichi ai mychi i yhm mang y tlamsa naimy vawi ai nai phai pei pi,’ nanai leu ang pei,” napi.

¹⁸Ahab ly Jehoshapha teng y, “Hini khumi ly mana khala py kai i vui kahawi thui vai a?, hawi y naichi naini ang thui pi khyh, nanai kai, kang thui pi na a!” napi.

¹⁹Mikha my Ahab teng y thui pi bi nai ly “Vai ly ARENG i leu pei nai tangai ba! ARENG ly kani pri mang y awm nai mymy i atehra tleaung y ateh nai ai py, mymy i sahawi y kani pri amtaw thau naichi angdo nai ai py kaniu bo.

²⁰ARENG my, ‘Ahab ly Ramoth mary ai tiu nai khala, dei hai ai nai ami my ni ai tapawp hyp ai mo?’ nanai deng baly, kani pri amtaw thauchi ly amjy cheaungkhang pathang u bo.

²¹Kangkhym y phailo ly ARENG mo y jeu iy, ‘ni ai kaimy tapawp hyp ai,’ nanai pathang.

²²ARENG my, ‘mana tapawp ai mo?’ nanai deng baly, huni phailo my, ‘kai ly Ahab i amo bawibawichi teng chei iy nichi ai ka-chawi thui hai ai,’ napi. ARENG my py, ‘nang chei ly Ahab ai ka-chawi naimy tapawp hyp, eaung ai mang,’ nanai leu pei bo,” napi.

²³Naibaly Mikha my, “Hina nai kamta ne; ARENG ly hini amochi ai nang teng y ka-chawi thui hai bo. Na i py nang i patang naira avum ai nai ly mymy ka-vo sa yb veng bo!” nanai leu patem nai ne.

²⁴Huna nai khala Zedekiah ly Mikha sahawi y athui iy, tangbeng y tabeang chum baly, “ARENG i phailo ly nang ai thui pi ai nai ati neng khala, kai teng i nai theu nai mo?,” napi.

²⁵Mikha my, “Nang aheu vui ai nai takun theung y kun nai khala pany ai,” napi.

²⁶Huni bo y Ahab ly samrang yhm miteaung keh leaungrei teng y, “Mikha ai patiu ly mary ai peang nai keung Ammon hawi samrang i chapo Joasa teng y pahawi ba.

²⁷Ni ai theaung y khai ly kai chymme naimy katym teang y ryrei ly tui hawi tako phai pacho ai nai nichi ai leu pei,” napi.

²⁸Mikha ly aeu naimy, “Nang chymme naimy tym teang lawh ai nabaly, kai i thui nai leuchi ly ARENG i leu pei naichi ny y leang bo! Aw, mipuichi awi, kai i thui nai leu tangai u! " napi.

²⁹Israela samrang Ahab hawi Juda samrang Jehoshapha ly Kilead pri Ramoth mary tiu ai nai tavai amsa hawi bo.

³⁰Ahab my Jehoshapha teng y, “Tavai theung y atiu nai khala kai ly mo-cha ataphra iy chei ai. Nang ly samrang ateaungchi amthyp naimy chei ba,” napi. Huni chum baly Israela samrang ly mo ataphra iy tavai keung y theu bo.

³¹Suria samrang ly ka-ri 32 reichi ai lu sa nai tavai luchi teng y, Israela samrang ai ny y baly, takhra ami ai py tiu y ai nai leu pei yb bo.

³²Hunai deaungkho y nichi ly samrang Jehoshapha ai niu nai khala y ly Israela samrang ngaw khyh, nanai athang khai i alengli teang iy tiu u bo. Na i py Jehoshapha my aeu nai khala,

³³nichi ly Israela samrang ny y nai pany i, tiu y naimy en vui bo.

³⁴Na i py Suria risa leaungrei i patyp y naimy ko jo nai thailiho chynrei nai ly samrang Ahab i tavai ateaung amchiu nai tawm sala y chawn khyp nai ne. Samrang my, “Kai ly tamo nga bo! kai ai tavai keung i nai theu hai jau! " nanai ka-ri lu sa nai khumi teng y leu pei bo.

³⁵Tavai atiu nai ho nai thym khala y samrang Ahab ly Suria tavaimichi mang y mo tha iy my i ka-ri salo y ateh naimy, anghawirang bo. Ni i tamo nga nai thichi ly ka-ri paichira y angdeang na; ni ly kani ka-reu baly dei bo.

³⁶Kani avah y kyh rai khala y, “Khumi luteng ly amy i pri, amy i avang y vawi u sina bo! " nanai aeu nai raawi ly tavaimi kamkawm vereichi ra y tym bo.

³⁷Hunai deaungkho y samrang Ahab ly dei bo. Ni i veu ai ly Samari mary y syn u i hu y up nai ne.

³⁸Ni i ka-ri ai ly bimachi tui ahiu reng nai, Samari tuikanra y pasi u. ARENG i leu pei nai kamta uichi ly jeu iy, ni i thi palei u nai ne.

³⁹Samrang Ahab i kasai nuh samrang yhm satang hawi ni i mary sa naichi raurei, ni i sa nai takhra leaungsai bawibawichi py, Israela razavang cha-iu theung y tajiu typ nai ne.

⁴⁰Ahab dei nai khala chapo Ahazia ly ampo i meingtym amtym i, samrang y lyn bo.

⁴¹Israela samrang Ahab i peang nai palyh saneng y Asa i chapo Jehoshapha ly Juda pri i samrang y lyn i,

⁴²Jerusalem mary y saneng 25 rei peang bo. Samrang lyn nai khala ni ly saneng 35 rei awm. Ni i amhm ly Shilahi i chaniu Azuba ne.

⁴³Ni ly mymy ny y rai khala i peang nai ampo Asa kamta, ARENG i mei ka-niu y hawi parai naichi sa. Na i py myn chiu nai meingtymchi ly taphra y nai deaungkho y, khumichi ly huni meingtymchi ra y apathyp iy, rimui patawi u jojo.

⁴⁴Jehoshapha ly Israela samrang hawi py ka-dyh ka-dawi asa nai ne.

⁴⁵Jehoshapha i sa nai bawibawichi, ni i vam parai naichi hawi, ni i tavai atiu naichi py Juda razavang cha-iu theung y tajiu typ nai ne.

⁴⁶Ni ly myn chiu nai meingtymchira y ampo Asa deung i dengdairei awm jo nai neampacho kamleaung, neampachy kamleaung bawibawichi ai taphra pawn nai ne.

⁴⁷Edom pri y ly samrang by y nai ne. Huni pri ai ly Juda samrang my khai nai samrang i bangtang kalen my peang bo.

⁴⁸Samrang Jehoshapha ly Ophira pri i muku la ai nai pangli samphochi sa i py, huni samphochi ly Ezijokeba ra y phra nai deaungkho y, sampho theu pajau y bo.

⁴⁹Naibaly Israela samrang Ahazia my mymy i khumichi hawi vanrei, Jehoshapha i khumichi ai sampho theu ai nai pei ai, nanai leu atli hai i py, Jehoshapha my huni leu atli nai ngai pi y.

⁵⁰Jehoshapha dei nai khala ni i veu ai ly Davida i mary samrang tapreaung y up bo. Naibaly Chapo Jehoram ly ampo i meingtym amtym iy samrang y lyn nai ne.

⁵¹Juda samrang Jehoshapha i peang nai saneng holai saryhrei saneng y Ahab i chapo Ahazia ly Israela pri y samrang lyn i, Samari mary y saneng nyhrei peang.

⁵²Ni ly Israela chengchi ai kamngo lam mang y pahawi nai ampo Ahad nini amhm Jezabela hawi samrang Jeroboam kamta, amtiu nai ne.

⁵³Bala tameuh ai chiu ai nai miseaung kham iy, mymy ny y rai khala i peang nai ampo kamta ly Israela chengchi i ARENG Tameuh ai kado patheu nai ne.