Read Khumi Chin 1 ARENG KEH 5 Bible Online

1 ARENG KEH 5 - Khumi Chin bible

1 ARENG KEH 5

¹Turu samrang Hiram ly Samrang Davida hawi amsawi amnai asa iy awm jo nai ne. Naibaly ampo Davida i meingtym y Solomon amtym iy samrang lawm, nanai thai nai khala y ni ly Solomon teng y savaichi pato bo.

²Solomon ly Hiram teng y leu pei nai ly

³“Kai i ampo Davida ly my i sahawi y awm nai paleung ka-echi ai avawrei tiu ai tla nai deaungkho y, my i ARENG Tameuh ai chiu ai nai i vui y Achura Yhm so pajau y, nanai nang pany; my i paleung ka-e bawibawichi ai ARENG my eaung hai y ryrei ly Achura Yhm so pajau y nai ne.

⁴Na i py kai i ARENG my saleaung deaungpa meingtym tleirei y tlamsa naira ang pei. Kai ly paleung ka-e by y bo; paleung ka-e ka-jeira py by y leang bo.

⁵ARENG ly kai i ampo teng y, ‘Nang bo y samrang lyn nai nang i chapo ly kai i vui Achura Yhm sa ai,’ nanai adeu bo. Naibaly vai, kai ly kai i ARENG Tameuh ai chiu ai nai molam Achura Yhm sa ai nai dawn bo.

⁶Hunai deaungkho y kai i vui saitleang keungchi paliu pi ai nai, nang i khumichi ai Lebanon thengreung mang y pato pi kyh ba. Kai i khumichi ai py sabawm hai ai; nang i dawn pasym yb nai kamta vang ly kaimy kang pei ai. nang i pany nai kamta kai i khumichi ly nang i khumichi kamta dengkeaung paliu ai nai kawp u y leang,” napi.

⁷Samrang Solomon i taviu nai leu ai Hiram ly thai nai khala, khri pa-rei amo theu bo; naibaly ni ly “Hina tanrei pri kalen peang ai nai Davida teng y khri pa-rei cheng nai chapo ai pei nai ARENG ai ly vaini palo u!” nanai thui.

⁸Naibaly Hiram ly Solomon teng y, “Kai ly nang i leu taviu nai kanga bo; kai ly nang i leu pei nai kamta sa ai nai angveirym bo. Nang teng y saitleang keungchi hawi maicha keungchi kang tha pi ai.

⁹Kai i khumichi ly dengkeaung jeungchi ai Lebanon mawi i dengdairei pangli peang y tym pa-rei palai iy, dengkeaung panchi sa hai ai i, nang i ngai nai tuivum y khrairei ahui kathiu pi ai. Nichi ly huni tuivum y dengkeaung panchi taphra iy, dengkeaung jeungchi ly nang i khumichi teng y au pi ai. Nang ly kai i khumichi i vui teicha teineichi sabawm pi ba,” nanai leu atli hai bo.

¹⁰Naibaly Hiram my Solomon i ngai nai ryrei saitleang keung hawi maicha keung tha pi iy,

¹¹Solomon my py Hiram i khumichi cha ai nai sanengrei y choh teaung 200,000 rei hawi olive asitui tangcheng palang 500,000 rei sabawm pi nai ne.

¹²ARENG ly mymy i adeu nai kamta, Solomon teng y cheng naira pei pi. Hiram hawi Solomon nini ly tlamsa naimy awm hawi i, amsawi amnai asa hawi nai ne.

¹³Samrang Solomon ly Israela pri theung i khumi leaung 30,000 reichi ai kalop ram sa hai ai nai palau chum baly,

¹⁴Adoniram ai lu sa hai bo. Samrang ly khumichi ai kamkawm thomrei sa; kamkawm harei y khumi leaung 10,000 rei awm; kamkawm harei nai y Lebanon mawi y lorei, yhm y lo nyhrei vawi ai nai pei.

¹⁵Solomon ly lengseaung si ai nai khumi leaung 80,000 rei, lengseaung tawn ai nai khumi leaung 70,000 reichi ai vanrei mawi mang y pato.

¹⁶Naibaly Samrang ly huni khumichi ai kry ai nai khumi leaung 3,300 reichi ai khai takhra bo.

¹⁷Samrang Solomon i leu pei nai kamta, kalop ram sa nai khumichi ly Achura yhm langdeng pala ai nai lengseaung puichi si u bo.

¹⁸Solomon i kalop sa naichi hawi Hiram i kalop sa naichi ly Achura Yhm sa ai nai molam y, Bebilo mary i khumichi hawi vanrei, lengseaungchi si nai hawi dengkeaungchi angvei u bo.