Read Khumi Chin 1 ARENG KEH 6 Bible Online

1 ARENG KEH 6 - Khumi Chin bible

1 ARENG KEH 6

¹Israela chengchi Aikupta pri i dengdairei theu u nai saneng chungvai palyh pa-ngo vui tajarei awm nai khala y, Israela samrang Solomon ly samrang lyn nai palyh saneng, Zipha napi nai pa-nyh lo y Achura Yhm sa amtheaung bo.

²Huni Achura Yhm i angtheung ly jeng kasau miu vui tariurei, kah kalen miu apomrei, tamdo ka-sang miu phairei awm.

³Mo mang i dangkhung py Achura Yhm kamta jeng kasau miu horei, kah kalen miu apomrei awm.

⁴Achura yhm dengpangchira y thaibeng pa-khochi awm iy, hunichi angam mang ly theung mang i tleaung y pa-kho amchei nai ne.

⁵Achura Yhm angam mang angpang phei nyhrei hawi nithun mang dengpangra tabi typ iy, takunchi sa; huni takunchi ly paichi thomrei awm iy sambeu ha harei ly tamdo ka-sang miu pangrei awm.

⁶Anui keh i sambeu takunchi ly kah miu pangrei awm; sala i sambeu takunchi ly miu tariurei riri awm, salo keh sambeu i takunchi ly miu saryhrei riri awm nai ne. Huni takunchi sa naira y tapangchi ly angpang ai kho so y naimy angpang salo y panui iy, sa thai ai nai Achura Yhm dengpangchi ai salo i sambeura y ly anui i sambeu tleaung y kangpo sa nai ne.

⁷Achura yhm sa naira y teaung nai lengseaungchi ly lengseaung angawmra y si yb iy syn nai deaungkho y, Achura Yhm sa nai thym khala y saki, atiu napi nai tamo ateaungchi hawi atum nai katynchi ly thai y leang bo.

⁸Anui keh i takunchy kunra ly Achura Yhm tokalawi mang y awm; pa-nyh hawi pa-thom sambeuchira lyn ai nai khaileichi thei.

⁹Achura Yhm cheang nai khala Solomon ly saitleang keung tapangchi, pjengchi hawi ceiling sa u bo.

¹⁰Takunchy harei ly miu pangrei asang iy sambeu thomrei awm nai takunchychi ai, Achura Yhm angam mang i dengpangchi hawi tabi typ iy sa nai bo baly, saitleang keung tapangchi hawi patawm rau nai ne.

¹¹ARENG my Solomon teng y,

¹²“Nang ly kai i reitachi hawi leu pei naichi tangai baly ngampo Davida teng y kai i adeu nai kamta, nang i vui kang sa pi ai.

¹³Nang i sa nai Achura Yhm theung y hawi, kai i khumi Israela chengchi theung y py, kai awm ai,” napi.

¹⁴Hunai deaungkho y Solomon ly Achura Yhm cheang pa-rei sa bo.

¹⁵Achura Yhm angtheung dengpangchi ai ly paichi dengdai ceiling y tym pa-rei, saitleang pjengchi hawi mawn typ iy paichi ai ly maicha pjengchi hawi pachi typ nai ne.

¹⁶Khri pa-rei chai parai nai meingtym, napi nai Achura Yhm takun ly jeng kasau miu apomrei awm iy, huni ai saitleang pjengchi hawi paichi dengdairei ceilingra tym pa-rei tapang bo.

¹⁷Khri pa-rei chai keh nai mo i takun ly jeng miu vui palyhrei awm.

¹⁸Saitleang pjengchira y an-um athai mynchi hawi kaseaung pau mynchi thiu iy, ka-pu sa nai ne. Lengseaung dengpangchi ai niu pajau y ai nai Achura Yhm theung mang ngierei ly saitleang pjengchi hawi tapang typ vui nai ne.

¹⁹ARENG i Leu Maikawm Pawn khai ai nai ly Achura Yhm angtheung nithun mang y takun sa.

²⁰Huni takun ly jeng kasau miu apomrei, kah kalen miu apomrei, tamdo ka-sang miu apomrei awm iy, muku tangcheng hawi paleaung hai typ bo. Maicham ai ly saitleang pjeng hawi sa nai ne.

²¹Achura Yhm theung mang y muku hawi paleaung typ iy, muku paleaung typ nai theung mang i takun pa-khora y muku leangchi bang nai ne.

²²Achura Yhm theung mang ngierei hawi khri pa-rei chai keh nai meingtymra i maicham ai py muku hawi paleaung typ bo.

²³Olive keung hawi sa iy ka-sang miu horei awm riri nai kheruben nyhrei ai, khri pa-rei chai keh nai meingtymra y khai bo.

²⁴Huni kheruben nyhrei ly atawm riri nai ne. Huni ly kasau miu pangrei awm nai pakhi nyhrei awm riri iy, pakhi kadeaung harei dengdai nai pakhi kadeaung harei y tym pa-rei ly miu horei awm.

²⁷Kheruben nini i kadai nai pakhi nyhrei ly dengpangchi hawi abi naimy awm ai nai kheruben nyhrei ai khri pa-rei chai keh nai meingtymra y khai nai ne.

²⁸Pakhi nyhrei awm nai kheruben nini ai muku hawi paleaung typ bo.

²⁹Achura Yhm takun pui angpang hawi takun dengpangchi ai kheruben mynchi, olive keung hawi kaseaung pau mynchi thiu iy ka-pu sa bo.

³⁰Angsaveaung paichi ai py muku hawi paleaung typ nai ne.

³¹Khri pa-rei chai keh nai meingtym i katheu pa-khora y ly olive keung hawi thengkheaung katheu dawn nyhrei sa; katheu lukau ly takuideung bo.

³²Katheu dawnchira y kheruben mynchi, olive keung hawi kaseaung pau mynchi thiu nai ne. Katheu dawnchi, kheruben mynchi, olive keung hawi kaseaung pau mynchi ai muku hawi paleaung typ bo.

³³Achura Yhm katheu pa-kho i vui tamdo ka-sang, kah kalen taki palyhrei ahyh khyp nai katheu laibeaung ai olive keung hawi takuideung bo.

³⁴Tlip typ ai nga nai katheu dawn nyhrei ai maicha pjeng hawi sa chum baly,

³⁵kheruben mynchi, olive keung hawi kaseaung pau mynchi thiu iy muku hawi paleaung typ bo.

³⁶Achura Yhm mo mang y theung mang i apai ly si yb nai lengseaung tlen thomrei tleangleang iy saitleang pjeng kaleaung harei tleangleang riri nai tapang aki prei bo.

³⁷Samrang Solomon i peang nai palyh saneng, Zipha napi nai pa-nyh lo tleaung y Achura Yhm langdeng pala.

³⁸Samrang Solomon i peang nai saneng holai harei, Bula napi nai taja lo tleaung y dawn pasym yb nai kamta, sai py takhawi y pa-rei sa i cheang bo. Achura Yhm sa nai ly saneng saryhrei ateng nai ne.