Read Khumi Chin 1 ARENG KEH 8 Bible Online

1 ARENG KEH 8 - Khumi Chin bible

1 ARENG KEH 8

¹Samrang Solomon ly ARENG i Leu Maikawm Pawm ai Zion, napi nai Davida mary i dengdairei, Achura Yhm mang y angjeaung ai nai Israela luchi napi nai cheng theaung lu sa naichi hawi nupai lu sa naichi ai mymy i awm nai Jerusalem mary y palau achu bo.

²Nichi bawibawi ly Ethanim, napi nai saryh lo y sa nai Taichy pawira y jeu u achu bo.

³Lu sa nai miteaung keh bawibawichi jeu achu nai khala, pathyp pi nai keungchi ly Leu Maikawm Pawn angjeaung u iy,

⁴Achura Yhm mang y syn u. Pathyp pi nai keungchi hawi Levi theaungchi ly ARENG i Taichy yhm hawi Taichy yhm i ateaung alangchi py, Achura Yhm mang y syn u nai ne.

⁵Samrang Solomon hawi Israela mipui bawibawichi ly Leu Maikawm Pawm mo y angym u iy, kati pajau y na pa-rei nawi nai sichi, beramchi hawi apathyp u bo.

⁶Naibaly pathyp pi nai keungchi ly Leu Maikawm Pawm ai Achura Yhm theung y tym hai i, Khri pa-rei chai parai nai meingtymra y awm nai kherubenchi i pakhi anui y khai u bo.

⁷Kheruben nini i pakhichi ly Leu Maikawm Pawm salo y kadai naimy, Pawm hawi samtleang ai py khiu meuh nai ne.

⁸Achura Yhm i khri pa-rei chai parai nai meingtym mang angdo iy khen baly, angjeaungra samtleang niu pajau; na i py takhra mani mang py niu pajau y. (Huni angjeaungra samtleang ly huni meingtymra y, vaini khrairei awm jo nai ne.)

⁹Aikupta pri i dengdairei Israela chengchi theu u nai khala, nichi i ARENG my Leu Maikawm asa nai Sinai mawi meingtym y, Mosi my khai pi nai lengseaung phei nyhrei ny y baly, huni Leu Maikawm Pawm theung y ati sai py by y.

¹⁰Achura Yhm theung i dengdairei pathyp pi nai keungchi theu u nai khala, Achura Yhm ai ly vaimy tamai khiu bo.

¹¹Huna nai Achura Yhm ly ARENG i nang parai naimy kawi nanai deaungkho y, pathyp pi nai keungchi ly mychi i kalop sa ai nai Achura Yhm theung y kun ali teang thai y bo.

¹²Naibaly Solomon ly “Aw ARENG, nang ly kani khusang mang y kanito khai pi i py tamai theung y py, kaveng theung y py awm ai nai vawi takhra bo.

¹³Vai ly kaimy nang i vui Achura Yhm, nang i vui deungtasarei awm ai nai meingtym sa pi nai pajau bo,” nanai chiu sa bo.

¹⁴Khumi mipuichi huni meingtym y angdo u nai thym khala y, samrang Solomon ly nichi mang y mo tha iy, nichi ai amtheaung hai bo.

¹⁵Naibaly samrang my, Israela chengchi i ARENG Tameuh ai ly palo u! Mymy ly kai i ampo Davida hawi leu adeu nai khaw hai bo. Mymy ly

¹⁶‘Kai ly kai i khumi lawm nai Israela chengchi ai Aikupta pri i theu hai nai dengdairei, kai ai chiu nai Achura Yhm sa ai nai ly Israela pri y mani mary ai py vawi takhra y. Na i py kai ly kai i khumichi ai peang ai nai, nang ai vawi takhra bo,’ nanai kai i ampo Davida teng y thui pi bo,” napi.

¹⁷Naibaly Solomon my thui bi nai ly “Kai i ampo Davida ly Israela chengchi i ARENG Tameuh ai chiu ai nai i vui y, Achura Yhm sa ai nai ngai;

¹⁸na i py ARENG my ni teng y, ‘Kai ly nang i dawn nai, tau naichi ai kawn nai ne;

¹⁹na i py nang ly Achura Yhm sa ai nai nga ai ny y; nang i chapo kypkyp my sa ai,’ napi.

²⁰“Huna nai y vai ly ARENG my mymy i leu adeu nai sa khyp bo. Kai ly Israela chengchi i samrang, ngaai Davida i meingtym y amtym i, samrang lawm bo. Naibaly kai ly Israela chengchi i ARENG Tameuh ai chiu ai nai Achura Yhm py sa i pajau bo.

²¹Achi i amsi pajochi ai Aikupta pri i dengdairei theu hai nai thym khala y, ARENG my nichi hawi asa nai Leu Maikawm lengseaung pheichi abawi nai Leu Maikawm Pawm ai ly Achura Yhm theung y khai ai nai meingtym sa rym bo,” napi.

²²Naibaly Solomon ly khumichi i mei ka-niu y maicham mo y chei iy angdo bo. Samrang ly kiu pheu i,

²³“Aw Israela chengchi i ARENG Tameuh, kani mang y py, khaileaung y py, nang hawi atawm nai tameuh ly by y; nang i khumichi ly nang i leu ai paleung hawi verei tangai nai khala y, nang ly nichi hawi asa nai Leu Maikawm ai khaw hai iy, nang i pahen nai patei pi ba.

²⁴Nang ly kai i ampo Davida hawi leu adeu nai sa khyp bo. Nang i leu pei nai bawibawichi ai vaini ly sa angym nai ne.

²⁵Aw Israela chengchi i ARENG Tameuh, nang ly kai i ampo Davida teng y, nang i katu chanauchi ly nang kamta kai ai tahm khai iy leu tangai u baly, mana khala py Israela pri y nang i kangpreangchi theung i, samrang avaw by ai ny y,’ nanai adeu nai kamta vai, so pi kyh ba.

²⁶Hunai deaungkho y aw Israela chengchi i Tameuh, kai i ampo, nang i miseaung Davida hawi adeu nai kamta sa pi khyp ai nai kang takeng.”

²⁷“Na i py aw Tameuh, nang ly hini khaileaung salo y awm angchi khyp ai a? Kani pri verei malawn py nang awm ai nai meingtym kau y leang. Hunai deaungkho y kai i sa nai hini Achura Yhm ly nang awm ai nai mana kau ai mo?

²⁸Aw kai i ARENG Tameuh, kai ly nang i miseaung ne. Kai i chiu sa nai tangai pi iy vaini, kai i hnei nai ly pathang pi tanga kyh ba.

²⁹Nang ai chiu ai nai nangmy vawi takhra pi nai, hini Achura Yhm ai vum kanithun typ pi jojo kyh ba. Hini Achura Yhm mang y mo tha naimy kai, chiu sa nai khala tangai pi kyh ba.

³⁰Hini meingtym mang y mo tha naimy kai hawi nang i khumichi chiu sa nai khala y tangai pi kyh ba. Nangmy i awm nai kani pri mang dengdairei, kaichi i hnei takeng naichi tangai pi iy, kaichi i kamngo py pahen kyh ba.

³¹“Khumi leaungrei ly takhra khumi leaungrei ai tamang nai hawi neng hai nai avum nai deaungkho y, mymy ly kamngo by y, nanai hini Achura Yhm y awm nai nang i maicham mo y vaineng abeu nai khala,

³²Aw ARENG, kani pri mang dengdairei tangai pi iy, nang i miseaungchi ai tara chih pi kyh ba. Kamngo awm nai khumi ai ly avo nai kamta pajeng iy, kamngo by y nai khumi ai ly kamngo lawi hai pi kyh ba.”

³³“Nang i khumi Israela chengchi ly nang i tlang tleaung y kamngo sa nai molam, paleung ka-echi teng y sum u nai khala ly hini Achura Yhm y jeu iy mymychi i kamngo lawira nga ai nai paleung apanem parai naimy, nang teng y ahui lawh baly,

³⁴kani pri mang dengdairei pathang pi kyh ba. Nang i khumichi ai kamngo pahen pi iy amsi pajochi teng y pei nai pri y, hinichi ai pahawi ali teang pi kyh ba.

³⁵“Nang ly nangmy i khumichi my nang i tlang tleaung y kamngo sa nai y, parip ai nai kani khang hai vui nai khala, nichi ly uikheih iy Achura Yhm mang y mo tha naimy, tahm apanem nai paleung hawi nang teng y hnei takeng baly,

³⁶kani pri mang dengdairei tangai pi kyh ba. Nichi tangai ai nai lam kateng patei pi kyh ba. Naibaly aw ARENG, nangmy i khumichi teng y pei pi nai pri y kani nai hai pi kyh ba.

³⁷“Hini pri y takang theu i py, chym thai nai no michi tym i py, amti amjangchi ly ali kabi avum nai, mipo avum nai, ti y baly akhutama kanghuchi tym miu nai molam y phra i py, nichi teng y patang naira hawi no mi ha harei tym i py,

³⁸nichi i chiu sa nai ly tangai pi kyh ba. Nang i khumi Israela cheng phyreichi ly khri pa-rei paleung si paleung mawn naimy, hini Achura yhm mang y kiu pheu iy chiu sa hnei takeng lawh baly,

³⁹nichi i chiu sa nai ly tangai pi kyh ba. Nang i khumichi ly amsi pajochi teng y pei ai nai pri y awm nai ryrei, nangmy ai jei kaji ai nai nichi i chiu sa nai tangai pi kyh ba.

⁴⁰Hunai deaungkho y nang i awm nai kani pri mang dengdairei tangai pi iy, nichi i kamngo pahen pi ly sabawm ba. Nang leaungrei naini khumichi i awm nai saichi pany khyh nai ne. Khumi luteng avum ai ataing nai, hawi nai hawi y nai kamlau tara chih pi ba.

⁴¹Kamlo paraira y awm nai pri takhra cho leaungrei ly nang i amyn amthang nai sai hawi nangmy i khumichi i vui sa pi nai nang parai nai satang py, thai nai deaungkho y, nang ai chiu ai nai hini Achura Yhm y tym iy chiu sa hnei takeng nai khala,

⁴²

⁴³nichi i hnei takeng nai ly tangai pi kyh ba. Nangmy i awm nai kani pri mang dengdairei tangai pi iy, ni i hnei nai kamta pathang pi kyh ba. Huna i naini, khaileaung pri y awm nai khumi bawibawichi ly nang i khumichi kamta, nang ai pany u iy jei kaji naimy tahm khai u ai. Hunaibaly nang i vui kaimy kang sa pi nai hini Achura Yhm ly chiu sa nai meingtym ne, nanai nichi pany u ai.

⁴⁴“Nang ly nangmy i khumichi ai paleung ka-echi hawi tavai atiu ai nai leu pei nai khala y, nichi ly nangmy i vawi takhra nai hini mary hawi, nang i vui kaimy kang sa pi nai hini Achura Yhm mang y mo tha iy chiu sa hnei takeng nai khala,

⁴⁵nichi i hnei takeng nai ly tangai pi kyh ba. Kani pri mang dengdairei tangai pi iy, nichi ai eaung hai kyh ba.

⁴⁶“Kamngo so y nai khumi leaungrei py by y leang. Hunai deaungkho y nang i khumichi ly nang i tlang tleaung y kamngo sa u ai. Huna nai khala nang ly kado theu ai i, nichi ai paleung ka-echi i kiu y sum hai iy, pri takhra mang y nichi ai hawi jo ai.

⁴⁷Huni pri ly khri pa-rei palo teu i py, nang i khumichi chiu sa hnei takeng nai ly tangai pi kyh ba. Nichi ly huni pri y awm nai khala uikheih nai tarawi y mychi ly kamngo mana tanrei sa tamang na mo, hawi y na mo, nanai ahui iy nangmy teng y chiu sa hnei takeng lawh baly aw ARENG, nichi i hnei takeng nai pathang pi kyh ba.

⁴⁸Leu kabeaung y nichi ly huni pri y awm nai khala, uikheih tatang naimy mychi i amsi pajochi teng y nangmy pei nai hini pri mang y, nangmy vawi takhra nai hini mary mang y, kaimy sa nai hini Achura Yhm mang y, mo tha iy chiu sa hnei takeng lawh baly,

⁴⁹nichi i hnei takeng nai tangai pi kyh ba. Nangmy i awm nai kani pri mang dengdairei tangai pi iy nichi ai pahen ba.

⁵⁰Nang i tlang tleaung y nichi my sa tamang nai kamngo bawibawichi ai pahen pi kyh ba. Paleung ka-echi ly nichi ai pahen pi na sy.

⁵¹Nichi ly angveaung dedyh nai mai hawi atawm nai Aikupta pri i dengdairei, nangmy pahawi nai, nangmy i peang nai khumi cheng ne.

⁵²“Salo kangteng aw ARENG, nang i khumi Israela chengchi hawi, nichi i samrang ai avawrei pahen ly kry ba. Mana mo khala py kasabawmra nga ai nai nichi my ang takeng nai tleirei ly tangai pi kyh ba.

⁵³Nang ly kaichi i amsi pajochi ai Aikupta pri i dengdairei pahawi nai thym khala y, nang i miseaung Mosi dengdairei leu pei nai kamta, hini khumichi ai nangmy peang nai khumichi lawm ai nai, khumi cheng cheaungkhangchi theung i nichi ai vawi takhra ba,” nanai chiu sa hnei takeng bo.

⁵⁴Solomon ly maicham mo y kheukhu di iy kiu pheu naimy ARENG teng y chiu sa hnei takeng nai bo y ang thau i angdo chum baly,

⁵⁵hu y awm nai khumi mipui bawibawichi tlang tleaung y Tameuh teng i amtheaung naira nga ai nai, tao pajeng parai naimy chiu sa bo. Samrang my,

⁵⁶“Mymy i adeu nai kamta mymy i khumichi teng y tlamsa naira pei nai keung ARENG ai ly palo u. Mymy ly my i miseaung Mosi dengdairei leu pei nai bawibawichi ai takhawi y naimy khaw hai bo.

⁵⁷Achi i ARENG Tameuh ly amsi pajochi hawi vanrei awm hai nai kamta, achi ai mana khala py khai su y naimy, achi hawi vanrei awm hai sy.

⁵⁸Achi ly mymy i ngai nai kamta heng thai ai nai py, amsi pajochi teng y pei nai reitachi hawi leu pei naichi tangai u ai nai py, kaichi ai leu tangai nai khumichi lawm ai nai py so pi na sy.

⁵⁹Achi i ARENG Tameuh ly hini chiu sa nai hawi hnei takeng naichi ai, neng tleirei pany pi jo sy. Mymy ly Israela mipuichi hawi samrang teng y, nichi i kani tleirei aly ngai nai hawi vanrei pahen pi na sy.

⁶⁰Hunai deaungkho y ARENG leaungrei naini Tameuh tatang ne; Tameuh takhra by y, nanai khaileaung pri i cheng cheaungkhangchi my pany u ai.

⁶¹Mymy i khumi lawm nai nangchi py kaichi i ARENG Tameuh ai ka-ym awm iy, vaini nangchi i sa nai kamta, reitachi hawi leu pei nai bawibawichi ai tangai naimy patawm u jojo sy,” nanai chiu sa bo.

⁶²Naibaly samrang Solomon hawi mipui bawibawichi ly ARENG teng y kapathyprachi talam u bo.

⁶³Samrang ly si 22,000 rei hawi beram 120,000 reichi ai amkawm nai kapathypra talam bo. Hunai kamta samrang hawi mipui bawibawichi ly Achura Yhm khai takhra nai ne.

⁶⁴Huni kani y my samrang ly Achura Yhm mo y awm nai umtang i lengseaung apai ai py khai takhra bo. Ni ly huni meingtym y leng patlum nai kapathyp hawi choh talam nai py, amkawm nai kapathyp i vui tawnbawichi thau py talam nai ne. Ati mana nai mo nabaly Achura Yhm apai theung i kheupaja maicham ly huni kapathyprachi i vui theang ala nai deaungkho y ne.

⁶⁵Huni Achura Yhm y Solomon hawi Israela cheng bawibawichi ly Taichy pawi kani saryhrei sa u bo. Khumi humchi ly tosyh mang Hamath mawi aleaung dengdairei, tokalawi mang Aikupta pri khujyhra khrairei, khumi mipui ka-teng ka-tang ny y na naichi jeu u achu nai ne.

⁶⁶Tajarei kani y samrang ly khumichi ai mymychi i avang y vawi hai bo. Nichi bawibawi my py samrang ai palo u chum baly, ARENG i khumi Israela chengchi hawi mymy i miseaung Davida i nga nai amtheaung naira saho y, amo theu parai naimy mymychi i avang y vawi u bo.