Read Khumi Chin 1 ARENG KEH 9 Bible Online

1 ARENG KEH 9 - Khumi Chin bible

1 ARENG KEH 9

¹Samrang Solomon ly Achura Yhm, samrang yhm hawi my i sa ai ngai nai cheaungkhangchi sa pajau nai bo y,

²Kibeon mary y awm nai khala amteng hai nai kamta, ARENG my ni teng y amteng hai bi bo.

³ARENG my ni teng y, “Kai ly nang i chiu sa nai thai bo; kai ai chiu jojo nai meingtym lawm ai nai, nang i sa nai hini Achura Yhm ai kaimy khai takhra pi bo. Hini Achura Yhm ai kaimy avawrei kang khen pi ai.

⁴Nang ly nangmy i ampo Davida kamta neaung hawi parai naimy kai i kalopchi sa iy, kai i reitachi patawm naimy kai i leu pei nai bawibawichi tangai baly,

⁵Nang i ampo Davida i Israela samrang atehra tleaung y ateh nai samrang kamtawm avaw hai y ai, nanai adeu nai kamta kang sa pi ai.

⁶Na i py nang hawi nang i katu chanauchi ly kai nithun abang y lawh baly, kaimy kang pei nai reitachi hawi leu pei naichi ai patawm u y naimy, tameuh takhrachi teng y chiu sa u lawh baly,

⁷kai ly kai i khumi Israela chengchi ai kaimy pei nai hini pri i dengdairei patheu vui ai. Kai ai chiu ai nai i vui y khai takhra nai hini Achura Yhm ai py nyn va vui ai. Huna nai khala y meingtym tleirei i khumichi ly Israela chengchi ai thui tamawn naimy panui hai ai.

⁸Hini Achura Yhm py phra seaungkhrang nai yhm lawm ai. Huni sahawi mang tako nai khumi bawibawichi ly khri pa-rei lyh u ai i, ‘ARENG ly hini pri hawi hini Achura Yhm ai, ati mana nai y hina nai kamta sa lawh mo?,’ nanai deng u lengleang ai.

⁹Hunaibaly khumichi my, ‘Hinichi ly mychi i amsi pajochi ai Aikupta pri i dengdairei pahawi nai keung ARENG Tameuh ai khai u su iy, tameuh takhrachi mang y ahihawi u nai deaungkho y, ARENG ly nichi i tlang tleaung y hini ka-jeira awm naichi tym hai nai ne,’ nanai pathang ai,” napi.

¹⁰Samrang Solomon ly Achura yhm hawi samrang yhm sa naira y saneng apomrei ateng nai ne.

¹¹Turu samrang Hiram ly Solomon i atiti sa naira y ngai nai ryrei saitleang keungchi, maicha keungchi hawi mukuchi py sabawm pi nai ne. Huni kalopchi sa pajau nai bo y samrang Solomon ly Hiram teng y Kalili khu ka-peang y awm nai mary apomrei pei pi.

¹²Hiram ly huni marychira chei iy khen i, khrei nai ne.

¹³Hunai deaungkho y ni ly samrang Solomon teng y, “Nang i pei nai marychi ly ati mana nai marychi mo?” nanai thui nai leu ai vaini khrairei Kabula,[3] nanai amyn palau u bo.

¹⁴Hiram ly Solomon teng y muku kaji sie 590,0 virei pei pi nai ne.

¹⁵Samrang Solomon ly Achura Yhm hawi samrang yhm sa naira y py, mary i nisi ngan mang y khaileaung taphum naira y py, mary apai sa naira y py, kalop ram sa nai khumichi ai teaung nai ne. Samrang ly huni kalop ram sa nai khumichi hawi iy Hazor mary, Mekido mary hawi Keza marychi sa palum teang bo.

¹⁶(Aikupta samrang ly Keza mary ai tiu iy peang vui i, hu y awm nai khumichi ai padei iy mary ai py mai leang vui bo; naibaly ni ly chaniu ai Solomon hawi apom hai nai thym khala y, huni mary ai py pei pi nai ne.

¹⁷Hunai deaungkho y Solomon ly Keza mary ai sa palum teang nai ne.) Solomon ly tlawi mang Beth Horon mary,

¹⁸Baalath mary, Juda daichi ka-vym theung y awm nai Tamar marychi ai py,

¹⁹my i teicha teinei vawnsaichi khai nai marychi, my i keaungngochi, tavai ka-richi, tavai taira marychi py, Jerusalem mary, Lebanon hawi my i pri theung y awm nai takhra meingtymchira y, my i sa ai ngai nai cheaungkhang ai py, miseaung kamta kalop sa nai khumichi hawi sa nai ne.

²⁰Solomon ly kanan pri ai Israela chengchi my peang nai thym khala, padei be y nai kanan cheng khumichi ai miseaung kamta kalop sa naira y teaung nai ne. Nichi theung y Amori, Hiti, Perizi, Hivit hawi Jebusi chengchi py abawi u. Nichi i katu chanauchi ly vaini khrairei miseaung y awm jo nai ne.

²²Solomon ly Israela chengchi ai miseaung y khai y leang. Nichi ly tavaimichi, samrang i bangtangchi, tavailu arengchi, tavai ka-ri luchi, keaungngo tavaimi kalopchira y sa.

²³Solomon i kalop cheaungkhangchira y kalop ram sa nai khumichi ai lu sa nai miteaung keh leaung 550 rei awm.

²⁴Naibaly Solomon ly my i aju Aikupta samrang i chaniu ai, ni i vui sa pi nai samrangnu yhm mang y, Davida mary dengdairei hawi nai bo y, mary i nisi ngan mang y khaileaung taphum nai ne.

²⁵Solomon ly ARENG i vui y, my i sa nai maicham salo y leng patlum nai kapathyp hawi amkawm nai kapathypchi, sanengrei y tlen thomrei talam. ARENG teng y rimui patawi nai py talam bo. Naibaly ni ly Achura Yhm sa nai kalop patem nai ne.

²⁶Samrang Solomon ly Edom pri Elath mary sahawi i pangli kamsen peang y awm nai Ezaijumkaba maryra y samphochi py sa.

²⁷Samrang Hiram ly sampho kalopchira y kyhchaw nai khumi phyreichi ai, Solomon i khumichi hawi vanrei kalop sa ai nai pato pi bo.

²⁸Nichi ly Ophira mary mang y sampho hawi chei u i, Solomon teng y muku kaji sie 236,00 virei syn pi bo.