Read Khumi Chin 2 ARENG KEH 10 Bible Online

2 ARENG KEH 10 - Khumi Chin bible

2 ARENG KEH 10

¹Samrang Ahad i katu chanau leaung vui saryhreichi ly Samari mary theung y awm u nai ne. Jehu ly peang nai keungchi, mary[7] i mipuichi hawi Ahad i katu chanauchi ai kry nai khumichi teng y cha tajiu iy pa bo. Huni cha theung y ly

²“Nangchi ly samrang i katu chanauchi ai kry nai keungchi ne i, nangchi teng y tavai ka-ri kamkawm, keaungngo kamkawm, tavai ateaungchi hawi amtangra marychi awm nai ne. Hunai deaungkho y hini cha nga phai nga baly,

³nangchi ly samrang i katu chanauchi theung y avo keh nai khumi leaungrei ai vawi takhra iy samrang palyn u ly ni mang y aso hai u,” napi.

⁴Samari mary i peang nai keungchi ly khri pa-rei jei u i, Jehu ai samrang Joram hawi samrang Ahazia nini malawn py kham pajau y baly, achi ly mana kham pajau ai mo?,” nanai thui u.

⁵Hunai deaungkho y samrang yhm kry nai keung, mary kry nai keung, mary i mipuichi hawi Ahad i katu chanauchi ai kry nai khumichi my Jehu teng y, “Kaichi ly nang i miseaungchi ne nai deaungkho y, nang i leu pei naichi tangai ai nai angchi yb bo. Na i py kaichi ly ami ai py samrang palyn y leang. Nangmy i avo nai kamta so ba,” nanai cha pathang pi u.

⁶Jehu my py, “Nangchi ly kai hawi amkawm iy kai i leu pei nai anui y awm u ai nabaly, khawndam hini neng khala, Jezarela mary y awm nai Samrang Ahad i katu chanauchi i luchi kai teng y jeu hai u,” nanai cha pei bi nai ne. Samari mary i khumichi ly samrang Ahad i katu chanau leaung vui saryhreichi ai kry u nai ne.

⁷Nichi ly Jehu teng i cha nga u nai khala, huni samrang i cho chanau leaung vui saryhreichi ai tleh u i, luchi ly takhuchi ra y khai iy, Jezarela mary y awm nai Jehu teng y tha pi u bo.

⁸Jehu ly Ahad i katu chanauchi i luchi tym bo, nanai thai baly huni luchi ai mary apai katheu pa-khora y phy nyhrei phy iy, kani pa-nyh khawn khrairei khai ai nai leu pei.

⁹Khutawi baly Jehu ly mary apai katheu pa-kho mang y chei i, hu y tym nai khumichi teng y, “Samrang Joram ai padei nai keung ly kai ne; huni molam ly nangchi abi y leang. Na i py hini khumichi ai padei nai keung ly ami mo?

¹⁰Ahad i katu chanauchi molam y ARENG my leu pei nai kamta pajeng ai, nanai hinira y pany pajau nai ne. ARENG ly amo Elija teng y adeu nai kamta tym angym bo,” napi.

¹¹Naibaly Jehu ly Jezarela mary i awm nai Ahad i amjo amnauchi, ni i bangtangchi, ahawi kamrawichi hawi pathyp pi nai keungchi ai, leaungrei py tleaung y pa-rei padei pawn nai ne.

¹²Jehu ly Samari mary mang y chei ai nai Jezarela mary i dengdairei theu i lam y, “Beram typ nai keungchi i Tai naira,” napi nai meingtym y tym nai khala,

¹³Juda samrang Ahazia i amjo amnau phyreichi hawi avum i, nichi teng y, “Nangchi ly amichi mo?,” nanai deng. Nichi my, “Kaichi ly Ahazia i amjo amnauchi ne; kaichi ly samrangnu Jezabela i cho chanauchi hawi, takhra samrang i amjo amnauchi ai de ai nai Jezarela mary y chei nai ne,” nanai pathang u.

¹⁴Jehu my, “Hini khumichi ai patiu u!,” nanai my i khumichi teng y leu pei i, patiu iy angawm sahawi y khumi leaung 42 reichi ai padei bo.

¹⁵Jehu ly hu i dengdairei theu bi i, lam y Rekhab i chapo Jonada hawi avum. Jehu my ni teng y, “Nang ly kai i paleung ka-dawn hawi atawm; nang ly kai ai sabawm ai a?,” napi. Jonada my, “Kang sabawm ai,” napi. Naibaly Jehu my, “Hunaibaly nang i kiu pei,” napi. Jonada my kiu pei nai khala, Jehu ly kiu amkhaw iy Jonada ai ka-ri tleaung y lyn hai chum baly,

¹⁶kai hawi vanrei abang iy, kai ly ARENG i vui manatanrei paleung apei na mo, nanai nang niu ai,” napi. Naibaly nini ly ka-ri atang hawi naimy, Samari mary mang y chei hawi bo.

¹⁷Nini ly huni mary y tym hawi nai khala, Jehu ly Ahad i amjo amnau bawibawichi ai leaungrei py takhawi y pa-rei padei be bo. Huni ly Elija teng y ARENG my leu pei nai kamta tym nai ne.

¹⁸Jehu ly Samari mary i khumi bawibawichi ai palau achu iy, “Samrang Ahad ly bala tameuh ai maidenreichy chiu khyh; na i py kai ly ni tleaung y bala tameuh ai chiu keh ai.

¹⁹Bala tameuh i amochi, huni tameuh ai chiu nai khumichi hawi bala i pathyp pi nai keungchi ai palau u; Kai ly bala tameuh i vui apathyp nai pawi pui sa ai i, nichi bawibawi jeu u ai nai tla; jeu y nai ami py awm moh sy,” napi. (Jehu i huna nai sa nai ly bala tameuh ai chiu nai khumi bawibawichi ai padei thai ai nai lihyp nai ne.)

²⁰Naibaly Jehu my, “Bala tameuh ai chiu ai nai kani khai takhra iy satang thai hai u!” nanai leu pei nai kamta thai hai u bo.

²¹Naibaly Jehu ly Israela pri verei y satang thai hai nai deaungkho y, bala tameuh ai chiu nai khumi bawibawichi ly leaungrei py takhawi y naimy tym u nai ne. Nichi bawibawi ly bala tameuh i achura yhm y kun u i, achura yhm kawi tyhp na.

²²Huna nai khala Jehu ly tahm awm nai ateaungchi kry nai pathyp pi nai keung teng y, huni ateaungchi patheu iy bala ai chiu nai khumichi teng y pei hai bo.

²³Hunaibaly Jehu ly Rekhab i chapo Jonada hawi vanrei, bala tameuh i achura yhm theung y kun hawi i, hunira awm nai khumichi teng y, “Hini meingtym y awm nai khumichi ly bala tameuh ai chiu nai khumichi naini ne ai nai tla. ARENG ai chiu nai khumi leaungrei py abawi y ai nai, nangchi hawihai palai khen u,” napi.

²⁴Naibaly Jehu ly Jonada hawi vanrei, bala tameuh teng y apathyp ai nai hawi, kapathyprachi talam ai nai theung mang y kun hawi bo. Jehu ly bala achura yhm angam mang y khumi leaung 80 reichi ai amo hai yb iy, “Nangchi ly hini khumichi ai padei u ai nai tla; khumi leaungrei tleaung vui lawh baly, kalop amkhaw nai keung ai ly padei ai!,” nanai leu pei yb bo.

²⁵Jehu ly kapathyprachi talam chum baly, tamcheaung typ nai risachi hawi tavai luchi teng y, “Kun u ly hini khumichi ai tleh u; leaungrei py tleaung moh sy!,” napi. Nichi ly haisauchi aphiu u iy, huni khumichi ai tleh u i, veuchi ai ly angam mang y patheu u bo. Naibaly nichi ly bala achura yhm takun theung mang y kun u i,

²⁶bala tameuh i leungchengchi la iy mai leng u bo.

²⁷Hunaibaly nichi ly bala leungcheng hawi bala achura yhm taphra u. Huni tameuh i achura yhm ai engmeaung lehra yhm palawn nai ly vaini khrairei awm jo nai ne.

²⁸Hini ly Jehu my Israela pri y bala tameuh ai chiu nai sai taphra nai leaungsai ne.

²⁹Na i py Jehu ly samrang Jeroboam i sa nai kamta amtiu lawh; Jeroboam ly Israela chengchi ai Bethela mary hawi Dan mary y, mymy i sa nai muku sicho mynchi ai chiu hai nai kamngo sa.

³⁰ARENG my Jehu teng y, “Nang ly kai i sa hai nai kamta, Ahad i katu chanauchi ai tamyh bo. Hunai deaungkho y nang i kangpreangchi ly deung palyhrei Israela pri i samrang lawm u ai,” napi.

³¹Na i py Jehu ly Israela chengchi i ARENG Tameuh i reita leu pei naichi ai paleung hawi verei so y naimy, Israela chengchi ai kamngo sa ai nai lam patei nai Jeroboam i lam y abang nai ne.

³²Huni neng khala ARENG ly Israelachi i khu ka-peang jum hai bo. Suria samrang Hazaela ly

³³Jordan tavo nisi mang i Israela khu ka-peang bawibawichi ai, tokalawi mang Arnon tavo peang y awm nai Aroe mary tym pa-rei peang vui bo. Huni khu ka-peangra y Kad, Ruben hawi nisi Manase cheng theaungchi awm nai Kilead pri hawi Basen prichi abawi nai ne.

³⁴Jehu i sa nai atitichi hawi ni i vam parai naimy sa nai saichi ly Israela razavang cha-iu theung y tajiu pi typ nai ne.

³⁵Jehu dei nai khala ni i veu ai ly Samari mary y heung u bo. Naibaly ni i chapo Jehoaha ly ampo i meingtym amtym i, samrang lawm bo.

³⁶Jehu Israelachi i samrang lawm nai ly Samari mary y saneng 28 rei peang nai ne.