Read Khumi Chin 2 ARENG KEH 11 Bible Online

2 ARENG KEH 11 - Khumi Chin bible

2 ARENG KEH 11

¹Kra y nai khala samrang Ahazia i amhm Athalia ly mymy i chapo ai tleh vui nai satang thai phai thai baly, samrang i dengtheung bawibawichi ai padei ai nai leu pei bo.

²Ahazia i chapo Joasa leaungrei naini tleaung khyh nai ne. Ni ai py takhrachi hawi vanrei padei ai enten nai khala, amni Jehoseba my lawi hai vui nai ne. Jehoseba ly Jehoram i chaniu ne i, Ahazia hawi ampo vanrei, amhm takhra nai tuicho ampro ne. Ni ly Joasa ai padei y ai nai, Joasa hawi kry nai keung ai palau iy, Achura yhm takun theung y heu vui.

³Samrangnu Athalia my peang nai thym khala y, ni ly saneng tariurei huni deaungdi ai kry i, Achura yhm theung y aheu hai bo.

⁴Na i py saryh saneng tym nai khala, pathyp pi nai keung Jehojada ly samrangnu i tamcheaung tavai luchi hawi, samrang yhm typ nai tavai luchi ai Achura yhm y palau iy, my i dawn tau nai kamta sa u ai nai vaineng adeu hai bo. Naibaly ni ly huni khumichi teng y samrang Ahazia i chapo Joasa ai patei pi i,

⁵nichi teng y, “Nangchi ly Anawn kani y kalop sa ai nai jeu nai khala, nangchi theung i phy thomrei y phyrei ly samrang i yhm typ ai nai tla;

⁶huni bo i phy thomrei y phyrei ly Sura katheu pa-kho typ u ai nai tla; huni bo i phy thomrei y phyrei bi baly typ nai khumichi nithun i, katheu pa-kho tym u ai nai tla.

⁷Anawn kani y kalop sa ai tlo y nai khumi phyreichi ly samrang ai kry ai nai Achura yhm typ ai nai tla.

⁸Nichi ly haisau syn iy samrang ai typ ai nai tla. Samrang chei naira tleirei y ni hawi vanrei, abang u ai nai tla. Nangchi sahawi y ahihawi nai khumi ngiereichi ai tleh vui ai nai tla,” napi.

⁹Tavai luchi ly Jehojada i leu pei nai tangai iy, mychi tavaimichi theung i Anawn kani y kalop tla nai risachi hawi, kalop tlo y nai risachi ai ni teng y tym hai bo.

¹⁰Jehojada ly huni risachi ai Achura yhm theung y khai nai, samrang Davida i tivi hawi khopuichi pei pi.

¹¹Naibaly ni ly samrang ai kry ai nai huni khumichi ai, Achura yhm nisi mang y haisauchi syn iy amo hai bo.

¹²Naibaly Jehojada ly Joasa ai pahawi iy samrang lukhym adeung hai i, samrangchi i reita cha-iu talam pi. Naibaly Joasa ai samrang palyn nai asitui leih pi iy, samrang ne, nanai satang thai hai bo. Khumi mipuichi my py kiu tabeang iy, “Samrang ly heng sau sy!,” nanai aeu u.

¹³Samrangnu Athalia ly tamcheaung typ nai risachi hawi khumichi i aeu nai katyn thai nai deaungkho y, khumi mipuichi awm achu nai Achura yhm mang y chei kaliki bo.

¹⁴Achura yhm katheu pa-kho ra i yhmmawm sahawi y, Juda samrangchi i sa reng nai reita kamta angdo nai samrang kangtha ai py, tavai luchi hawi baw eng nai khumichi ly samrang ai taki teungtareung iy, amo theu aeu naimy bawchi eng u nai py niu i, my i ateaung sei iy, “Ang tiu nai na ahi ly! ang tiu nai na a hi ly!,” nanai aeu bo.

¹⁵Jehojada ly Athalia ai Achura yhm apai theung y padei ai nai ngai y i, tavai luchi teng y, “Ni ai tamcheaungchi theung i nai patheu u; ni ai ama hai ai nai atho sa nai ngiereichi ai padei u,” napi.

¹⁶Tavai luchi ly samrangnu ai patiu iy samrang yhm mang y pahawi i, keaungngo katheu pa-khora y padei u bo.

¹⁷Pathyp pi nai keung Jehojada ly samrang hawi khumi bawibawichi ai, ARENG i khumichi lawm u ai nai ARENG hawi leu maikawm asa hai bo. Samrang hawi khumi mipuichi ai py leu maikawm asa hai leungtang nai ne.

¹⁸Naibaly khumi mipuichi ly bala i achura yhm taphra u iy, maichamchi hawi mynchi py panawi u pawn. Naibaly maichamchi mo y bala i pathyp pi nai keung Mattan ai py tleh u bo. Jehojada my Achura yhm typ ai nai tamcheaungchi khai chum baly,

¹⁹tavai luchi, samrang i tamcheaung risachi, samrang yhm typ nai risachi hawi vanrei, samrang ai samrang yhm mang y tha u i, mipuichi ly nichi nithun mang abang u bo. Joasa ly tamcheaung typ nai katheu pa-kho mang kun iy, samrang atehra tleaung y ateh bo.

²⁰Athalia ai ly samrang yhm y padei chum veng bo i, mipui bawibawichi ly amo theu u iy mary pui py tlamsa nai ne.

²¹Joasa ly saneng saryhrei awm nai khala, Juda pri samrang lawm nai ne.