Read Khumi Chin 2 ARENG KEH 13 Bible Online

2 ARENG KEH 13 - Khumi Chin bible

2 ARENG KEH 13

¹Juda samrang Ahazia i chapo Joasa my peang nai saneng apom phai takawrei saneng y, Jehu i chapo Jehoaha ly Israela pri y samrang lawm i, Samari mary y saneng holai saryhrei peang nai ne.

²Ni ly mymy ny y rai khala i samrang Jeroboam kamta, ARENG tlang tleaung y kamngo sa iy, Israela chengchi ai kamngo lam mang y pahawi nai ne. Ni ly mana khala py my i kamngo sa nai khai su y.

³Hunai deaungkho y ARENG ly Israela chengchi ai kado theu hai i, Suria samrang Hazaela hawi ni i chapo Benhada deung y, Israela chengchi ai avawrei tavai sum hai bo.

⁴Huna nai khala Jehoaha ly ARENG teng y chiu sa. ARENG my py, Suria samrang my Israela chengchi ai manatanrei ana pumpi na mo, nanai niu nai deaungkho y, Jehoaha i chiu sa nai pathang pi.

⁵ARENG ly Israela chengchi ai Suria chengchi kiu i nai atleu pi ai nai khumi amthawn hai bo. Hunaibaly Israela chengchi ly vaichi khala i kamta, tlamsa naimy awm ai nai nga u nai ne.

⁶Na i py nichi ly samrang Jeroboam my lam patei nai kamngo lam ai khai su y naimy, abang u veangveang. Aserah tameuh nu tamkhawn ly Samari mary y awm jojo nai ne.

⁷Suria samrang i khaileaung spryh kamta taphra naira avum nai deaungkho y, Jehoaha teng y keaungngo risa leaung vuipangrei, tavai ka-ri horei hawi tavaimi leaung 10,000 rei naini awm khyh bo.

⁸Jehoaha i atiti sa naichi hawi vam parai naimy sa nai saichi ly Israela razavang cha-iu theung y tajiu pi typ nai ne.

⁹Ni dei nai khala Samari mary y heung u. Naibaly ni i chapo Jehoasa ly ampo i meingtym amtym i, samrang y atheng bo.

¹⁰Juda samrang Joasa i peang nai saneng phai palyh tajarei saneng y, Jehoaha i chapo Jehoasa ly Israela samrang lawm. Ni ly Samari mary y saneng holai tariurei peang.

¹¹Ni py ARENG i tlang tleaung y kamngo sa i, Israela chengchi ai kamngo lam mang y pahawi nai samrang Jeroboam i kamngo sa nai lam y abang nai ne.

¹²Juda samrang Amazia hawi tavai atiu naira y, Jehoasa vam parai naimy tiu nai hawi ni i atitichi sa nai ly Israela razavang cha-iu theung y tajiu pi typ nai ne.

¹³Jehoasa dei nai khala, ni ai ly Samari mary samrangchi i tapreaung y heung. Naibaly ni i chapo, pa-nyh Jeroboam ly samrang y lyn bo.

¹⁴Amo Elisa ly khri pa-rei no nai ne. Ni ly ira tleaung y aseaung naimy dei enten nai thym khala, Israela samrang Jehoasa ly ni ai no de ai nai tym i, “Kai i ngaai, kai i ngaai! Nang ly khri pa-rei len parai nai atho haiho hawi, Israela pri y ama hai nai keung ne na a!,” nanai thui i vo bo.

¹⁵Naibaly Elisa my, “Thailiho hawi thailiho chyn jeu hai,” napi i, Jehoasa ly jeu hai nai khala,

¹⁶Elisa my, “thailiho a-eaung jau,” napi. Huna nai khala samrang ly thailiho a-eaung. Naibaly Elisa ly mymy kiu ai samrang kiu tleaung y khai iy,

¹⁷Suria pri mang y motha nai thaibeng pa-kho ly samrang ai paeaung hai bo. Naibaly Elisa my, “Thailiho ko,” nanai leu pei i ko nai khala amo my, “Nang ly ARENG i thailiho chyn ne; mymy ly huni thailiho chyn hawi Suria pri ai eaung ai. Nang ly Aphek maryra y Suria chengchi ai pajau y ryrei ly tiu ai,” napi.

¹⁸Naibaly Elisa ly samrang ai takhra thailiho chynchi la hai iy, “Khaileaung y pakhau,” napi i tlen thomrei pakhau chum baly anawn vui bo.

¹⁹Huna nai anawn vui nai molam y, Elisa ly kado theu i samrang teng y, “Nang ly tlenpang tlen tariurei pakhau lawh teu i khyly, nang ly Suria chengchi ai hawihai palai pajau ai; na i py vai ly nichi ai tlen thomrei eaung ai khyh bo,” napi.

²⁰Naibaly Elisa ly dei i up bo. Moba pri khumichi ly saneng tleirei, Israela pri y kun i tiu reng nai ne.

²¹Khumichi ly tlenrei nai khala, tlaiveu pavum ai nai sa nai thym y, Moba tavaimi kamkawm harei ai niu nai deaungkho y, huni tlaiveu ai nai Elisa i angawm salo y aphi u su i, preang u pawn nai ne. Huni tlaiveu ly Elisa i hiuchi hawi abi nai hawimy heng teang i, ang thau teang bo.

²²Suria samrang Hazaela ly Jehoaha i peang nai deung jeungrei, Israela chengchi ai ana pumpi nai ne.

²³Na i py ARENG ly nichi ai pahen py pahen, tamen py tamen nai deaungkho y, nichi ai tamo hai y. Mymy ly Abraham, Isaka, Jakob nichi hawi asa nai leu maikawm ai pany jo i, nichi ai sabawm nai ne. Mymy i khumichi ai mana khala py tami y bo.

²⁴Suria samrang Hazaela dei nai bo y, my i chapo Benhada ly samrang atheng bo.

²⁵Huni neng khala Israela samrang Jehoaha i chapo Jehoasa ly Benhada ai tlen thomrei tiu i, ampo Jehoaha deung y Benhada my peang vui nai marychi ai peang ali teang nai ne.