Read Khumi Chin 2 ARENG KEH 14 Bible Online

2 ARENG KEH 14 - Khumi Chin bible

2 ARENG KEH 14

¹Jehoaha i chapo Israela samrang Jehoasa my peang nai pa-nyh saneng y, Joasa i chapo Amazia ly saneng apomphai pangrei awm nai khala y,

²Juda samrang lawm i, Jerusalem mary y saneng apomphai takawrei peang nai ne. Ni i amhm ly Jerusalem mary i neampachy Jehoadin ne.

³Amazia ly ARENG i kangai sa. Na i py ni ly my i pajo samrang Davida i sa nai kamta so y i, ampo Joasa i sa nai kamta sa nai ne.

⁴Ni ly myn chiu nai meingtymchi taphra y nai deaungkho y, khumi mipuichi ly huni meingtymchi ra y, apathyp iy rimuichi patawi u bo.

⁵Amazia ly mymy sa thai naira nga phai nga baly, ampo samrang ai padei nai bangtangchi ai padei teang.

⁶Na i py hi ly huni khumichi i cho chanauchi ai ly padei y i, “Amhm ampochi ai cho chanauchi i kamngo nai molam y padei moh; cho chanauchi ai py amhm ampochi i kamngo nai molam y padei moh. Khumi ly mymy i sa nai kamngo molam y naini padei ai nai tla,” nanai Mosi i reita cha-iu theung y awm nai ARENG i Reita leu pei nai ai teaung patawm nai ne.

⁷Amazia ly palawi leaunghawira y Edom tavaimi leaung 10,000 reichi ai padei. Ni ly Selah mary py peang vui iy mary amyn py palai vui i, Jothela mary nanai vaini khrairei palau jo nai ne.

⁸Naibaly Amazia ly Israela samrang Jehoasa teng y savaichi pato i, mymy hawi tavai atiu ai nai palau.

⁹Na i py samrang Jehoasa my, “Vaichi khala Lebanon mawi saleung y aleng keung harei my saitleang keung teng y, ‘nang i chaniu ai kai i chapo teng y deaung paseng ba,’ nanai leu pei. Na i py sahawi mang aleaung nai mawi kasi ly huni aleng keung ai chiu piupa vui bo.

¹⁰Amazia awi, vai nang ly Edom khumichi ai pajau nai deaungkho y, paleung len nai ne. Nangmy i amyn amthang nai hawimy paleung tuinem iy, nangmy i yhm y phai awmnem ba. Nang ly nangmy i khumichi tama hai ai nai patangra ly ati mana nai hau lawh mo?,” nanai leu pathang pi teang bo.

¹¹Na i py ni i leu ai Amazia ly tangai pi y. Hunai deaungkho y samrang Jehoasa ly my i tavaimichi hawi amsa i, Amazia ai Juda pri Beth Sheme mary y tiu.

¹²Amazia i tavaimichi ly tavai sum nai deaungkho y, risa bawibawichi ly mymychi i yhm mang y preang u pawn bo.

¹³Jehoasa ly Amazia ai patiu iy Jerusalem mary mang y chei i, Ephraim katheu pa-kho dengdai apai taki tym pa-rei, miu 200 rei taphra vui nai ne.

¹⁴Ni ly my i niu nai ngierei muku, tangka, Achura yhm ateaung ngiereichi hawi vang katengchi la pawn iy, Samari mary y vawi hai bo. Ni ly tavai keung y patiu naichi ai py hawi pawn nai ne.

¹⁵Juda samrang i tavai atiu naira y Jehoasa i vam nai sai hawi, ni i atiti sa naichi ly Israela razavang cha-iu theung y tajiu pi typ nai ne.

¹⁶Jehoasa dei nai khala ni ai ly Samari mary samrangchi i tapreaung y up bo. Naibaly ni i chapo, pa-nyh Jeroboam ly ampo i meingtym amtym i, samrang lawm bo.

¹⁷Juda samrang Amazia ly Israela samrang Jehoasa dei nai bo y, saneng holai pangrei heng rai nai ne.

¹⁸Amazia i atiti cheaungkhang sa naichi ly Juda razavang cha-iu theung y tajiu pi typ nai ne.

¹⁹Amazia ly mymy ai kangviu y padei ai nai tau nai leaungsai awm nai deaungkho y, Lakhisa mary mang y preang vui. Na i py ni i paleung ka-echi ly huni mary y hui i, ni ai padei u bo.

²⁰Ni i veu ai keaungngo tleaung y tang iy syn i, Davida mary samrangchi i tapreaung y heung u nai ne.

²¹Naibaly Juda mipuichi ly saneng holai tariurei awm nai chapo Uzia ai samrang palyn u bo.

²²Uzia ly ampo dei nai bo y Ela mary y tiu nai eaung i, palum ali teang nai ne.

²³Joasa i chapo Juda samrang Amazia i peang nai saneng holai pangrei saneng y Jehoasa i chapo, pa-nyh Jeroboam ly Israela samrang lawm i, Samari mary y saneng 41 tym pa-rei peang nai ne.

²⁴Ni ly ARENG i tlang tleaung y kamngo sa iy, Israela chengchi ai kamngo sa ai nai lam patei pi nai Neba i chapo Jeroboam i hawi y nai lam y abang nai ne.

²⁵Ni ly tosyh mang y nabaly Hamath mawi aleaung lam, tokalawi mang y nabaly pangli kadei khrairei, vaichi khala i Israela pri khu ka-peang bawibawichi ai peang ali teang bo. Hini ly Israela chengchi i ARENG Tameuh my, mymy i miseaung Kath Hepha mary y awm nai Amittai i chapo amo Jona dengdairei, leu pei nai kamta ne.

²⁶ARENG ly Israela chengchi avum nai khri pa-rei ngari patang nai niu bo. Nichi ai sabawm ai nai khumi leaungrei py by y.

²⁷Na i py ARENG ly Israela chengchi ai deungtasarei phra ai nai ngai hai y nai deaungkho y, samrang pa-nyh Jeroboam dengdairei atleu pi bo.

²⁸Pa-nyh Jeroboam i atiti sa naichi, tavai keung y ni i vam naichi, Damaska mary hawi Hamath mary ai Israela pri khu ka-peang theung y tabawi ali teang pajau nai saichi ai ly Israela razavang cha-iu theung y tajiu pi typ nai ne.

²⁹Jeroboam dei nai khala ni ai samrangchi i tapreaung y heung u. Naibaly ni i chapo Zekhariah ly ampo i meingtym amtym i, samrang lawm bo.