Read Khumi Chin 2 ARENG KEH 16 Bible Online

2 ARENG KEH 16 - Khumi Chin bible

2 ARENG KEH 16

¹Remaliah i chapo Israela samrang Pekah i peang nai saneng holai saryhrei saneng y, Jotham i chapo Ahaz ly

²saneng apomrei awm nai khala, Juda samrang lawm i, ni ly Jerusalem mary y saneng holai tariurei peang nai ne. Ni ly amsi pajo samrang Davida i kahawi sa nai kamta so y; ni ly ARENG Tameuh i ngai y nai kalopchi sa iy,

³Israela samrangchi i sa nai kamta sa. Ni ly Israela chengchi my tavai tiu nai thym khala, ARENG my patheu pi vui nai khumichi i amso ngai hawi nai reitachi kamta sa iy, amy i chapo ai malawn py leng patlum nai kapathypra palawn nai mynchi teng y talam bo.

⁴Myn y chiu nai meingtym mawi aheungchi hawi ka-khui hawi nai dengkeaung keungchi anui y Ahaz ly kapathyprachi talam iy, rimuichi patawi nai ne.

⁵Suria samrang Rezin hawi Israela samrang Pekah nini ly tavai tiu nai Jerusalem mary y katan u meuh teu i py, samrang Ahaz ai pajau y nai ne.

⁶(Huni neng khala my Edom samrang[11]ly Ela mary ai peang ali teang iy, huni pri y awm nai Juda khumichi ai patheu pawn bo. Edom khumichi ly Ela mary y khuteng sa naimy, vaini khrairei awm u nai ne.)

⁷Samrang Ahaz ly Asuria empara samrang Tiklath Pilesa teng y, “Kai ly nang i ka-ym awm nai miseaung ne. Kaichi ai tiu nai Suria samrang hawi Israela samrang teng i nai atleu pi kyh ba,” nanai cha tajiu iy savaichi pato.

⁸Naibaly Ahaz ly Achura yhm hawi samrang yhm vang kateng khaira i muku, tangkachi la iy, empara samrang teng y langseaung palawn nai talam pi bo.

⁹Tiklath Pilesa ly samrang Ahaz i takeng nai kamta, my i tavaimichi hawi vanrei Damaska mary y tiu nai pajau i, samrang Rezin ai padei iy mipuichi ai Kira mary mang y langheng hawi nai ne.

¹⁰Samrang Ahaz ly empara samrang Tiklath Pilesa hawi avum ai nai Damaska mary y chei nai khala, huni mary y maicham niu i, huni maicham kupe ka-tawm khyp sa iy, pathyp pi nai keung Uriah teng y pa pi.

¹¹Hunaibaly Uriah ly huni kupe ka-tawm khyp maicham harei, samrang Ahaz tym ali teang y rai khala my, pajau pa-rei sa yb nai ne.

¹²Samrang Ahaz ly Damaska mary i nai vawi ali teang nai khala y, maicham sa pajau nai niu baly,

¹³huni maicham salo y tawnbawichi hawi teicha teinei katalamrachi leng patlum nai ne. Naibaly kreip hang katalamrachi hawi amkawm nai kapathypra napi nai thichi py, huni maicham salo y lei bo.

¹⁴ARENG teng y talam nai kheupaja maicham ly maicham kangtha hawi Achura yhm sala y awm nai ne i, Ahaz ly huni maicham ai maicham kangtha tosyh ngan mang y kasyh vui bo.

¹⁵Naibaly ni my Uriah teng y, “Kai i maicham pui ai khawn mang leng patlum nai neng hawi dym mang teicha teinei katalamrachi vui py, samrang hawi mipuichi i leng patlum nai hawi teicha teinei katalamrachi, mipuichi i kreip hang katalamrachi i vui py teaung u. Huni maicham salo y tawnbawi awm nai ngiereichi i thi leih u. Na i py kheupaja maicham ly kai i mo mang satang deng ai nai i vui ne ai,” napi.

¹⁶Uriah ly samrang i leu pei nai kamta sa khyp nai ne.

¹⁷Samrang Ahaz ly Achura yhm y teaung nai, kiu hawi nui nai kheupaja ka-richi la iy, hunichi salo y awm nai rahumchi kasyh vui bo. Ni ly kheupaja hawi sa nai si katai myn holai nyhrei tleaung y khai nai kheupaja tuikanchi py la iy, anui i lengseaung padai nai salo y khai.

¹⁸Naibaly Asuria empara samrang my kawn ai nai Ahaz ly Achura yhm i samrang atehra khai naira ai kasyh vui iy, samrang i vui khai takhra nai Achura yhm y kun nai pa-kho py, kho typ pi vui nai ne.

¹⁹Samrang Ahaz i atiti sa naichi ly Juda razavang cha-iu theung y tajiu pi typ nai ne.

²⁰Ahaz dei nai khala ni ai ly Davida mary samrangchi i tapreaung y up. Naibaly ni i chapo Hezekia ly ampo i meingtym samrang y lawm bo.