Read Khumi Chin 2 ARENG KEH 18 Bible Online

2 ARENG KEH 18 - Khumi Chin bible

2 ARENG KEH 18

¹Elah i chapo Israela samrang Hosea i peang nai pa-thom saneng y, Ahaz i chapo Hezekia ly saneng 25 rei awm nai khala y, Juda samrang lawm i,

²Jerusalem mary y saneng 29 rei peang nai ne. Ni i amhm ly Zekhariah i chaniu Abija ne.

³Huni samrang ly mymy i amsi pajo Davida i sa nai kamta, ARENG i kangai sa.

⁴Ni ly myn chiu nai meingtymchi taphra iy, leungcheng leng naichi pakhau phro i, Aser tameuh nu teng y talam nai tamkhawnchi py taphra nai ne. Mosi i sa nai kheupaja pavui myn py, taphra piupa vui bo. Huni pavui myn ly Nehutan, nanai amyn pathi iy, Israela chengchi ly huni neng tym nai khrairei, huni pavui myn teng y rimuichi patawi iy talam u nai ne.

⁵Hezekia ly Israela chengchi i ARENG Tameuh ai ym nai khumi ne. Jangni khala i dengdairei mo mang i neng khala py, Juda pri y ni kamta samrang leaungrei py by y.

⁶Ni ly ARENG i tlang tleaung y ka-ym awm iy, mymy i leu tangai y nai mana khala py awm vai y. ARENG my Mosi teng y pei nai reitachi ai, hawihai palai kry nai ne.

⁷Hunai deaungkho y ARENG ly ni hawi vanrei awm nai ne i, ni ly sa naira tleirei y eaung bo. Ni ly Asuria empara samrang i anui y kham pi y i, tiu lawh nai ne.

⁸Ni ly Philistin khumichi ai py tiu. Kaza mary hawi tengpang sahawi i khu ka-peang raurei, nichi awm nai avang katheang kalenchi py tiu i pajau bo.

⁹Israela samrang Hosea i peang nai saryh saneng, samrang Hezekia i peang nai palyh saneng y Asuria empara samrang Shalmaneser ly Israela pri y tiu i, Samari mary ai katanmeuh bo.

¹⁰Saneng thomrei bo baly Samari mary jum bo. Huna nai tym nai ly Hezekia i peang nai tariu saneng hawi Hosea i peang nai pa-nyh saneng ne.

¹¹Asuria empara samrang ly Israela chengchi ai langheng hawi iy, phyreichi ai ly Halah maryra py, phyreichi ai ly Kozan ka-peang Habor tavo sahawira py, phyreichi ai ly Media pri i marychi ra py awm hai nai ne.

¹²Samari mary jum nai ly Israela chengchi mymychi i ARENG Tameuh i leu tangai y naimy, mymy i sa nai leu maikawm ai taphra iy ARENG i miseaung Mosi my pei nai Reitachi teaung patawn u y nai deaungkho y ne. Nichi ly leu tangai y, leu pei naichi py patawm u y.

¹³Samrang Hezekia i peang nai saneng holai palyhrei saneng y, Asuria empara samrang Sennakheri ly Juda pri i amtangra marychi ai tiu i pajau nai ne.

¹⁴Hezekia ly savai pato iy Lakhisa mary i Sennakheri teng y, “Kai ly tamang bo; nang i tavai tiu nai ly anawn jau ba. Nang i hnei nai ngierei kang pei ai,” napi. Asuria empara samrang my muku sie 165rei hawi tangka sie162,50rei pei ai nai tla, nanai pathang pi bo.

¹⁵Naibaly Hezekia ly Achura yhm i hawi samrang yhm i vang kateng khaira i tangka bawibawichi py,

¹⁶Achura yhm katheu pa-khochi hawi mymy i sa patyp nai katheu laibeaungchi ra i mukuchi py kheaung vui iy, Sennakheri ai pei pi nai ne.

¹⁷Asuria empara samrang Sennakheri ly Jerusalem mary y tiu ai nai, my i vawi patyp nai miteaung keh leaung thomreichi my lu sa nai tavaimi kamkawm pui ai, Lakhisa mary i dengdairei pato bo. Nichi ly Jerusalem mary y tym nai khala, salo tuikan mang leaung nai tui lam sahawi y ateaung aneng nai khumichi i kalop sa nai meingtym lam y tai u nai ne.

¹⁸Naibaly nichi ly samrang Hezekia ai khumi pato iy palau bo. Huna nai khala Hezekia i samrang yhm miteaung keh leaung thomreichi ly huni khumichi hawi ka-vum sa ai nai theu u. Nichi ly Hilikhi i chapo samrang yhm kry nai keung Eliakim, samrang yhm i secretary Sebana hawi Asaph i chapo record kry nai keung Joahchi ne.

¹⁹Asuria miteaung keh leaungrei my nichi teng y, “Asuria samrang my samrang Hezekia teng y, ‘nang ly ati mana nai amymy ai, hina tanrei a-ym na mo?

²⁰Nang ly leu hawimy tavai atiu ai nai sa thai naira awm, nanai athang khai a? Asuria pri y tiu ai nai nang ai ami my sabawm ai mo?

²¹Nang ly Aikupta pri i kasabawmra ajeng nai ne. Na i py huni pri ai ym nai ly japang uipo keung ai cheaungvawi palawn nai hawi atawm. Huni japang uipo keung ly tleu iy, nang i kiu y ang viu ai. Aikupta samrang ly mymy ai ym naichi i vui y japang uipo hawi atawm,’ nanai leu pei bo,” napi.

²²Naibaly Asuria miteaung keh my thui pi bi nai ly “Nangmy, ‘kaichi ly kaimychi i ARENG Tameuh ai a-ym,’ nanai thui ai a? Tahm asang nai meingtymchi hawi maichamchi ai Hezekia my taphra iy, Juda khumichi ai Jerusalem mary i maichamra y naini chiu u ai nai, leu pei nai ny y a?

²³Kai i yhmkeung empara samrang ly nangchi hawi ajy ai. Nangchi ly keaungngo atang nai risa leaung sang nyhrei nga pajau ai nabaly, nangchi ai keaungngo sang nyhrei kang pei ai!

²⁴Nangchi ly Asuria tavaimichi theung y theang keh nai tavailu hawi malawn py, acham pajau y pui naimy Aikupta chengchi teng i tavai ka-ri hawi keaungngo atang nai risa kasabawmra ajeng u lawh ly!

²⁵Kai ly ARENG teng i kasabawmra abawi y naimy nangchi i pri taphra nai ne, nanai nangchi athang khai u a? Nangchi i pri taphra ai nai ARENG kypkyp my, kai ai pato nai ne,” napi.

²⁶Huna nai khala Eliakim, Sebana, Joahchi ly huni miteaung keh teng y, “Areng awi, Aramai leu hawi kaichi ai leu pei ba. Huni leu ly kaichi pany thai; Hebrai leu teaung moh ba. Mary apai salo i khumi bawibawichi tangai u bo,” napi.

²⁷Huni khumi my, “Empara samrang ly nangchi hawi nangchi i samrang teng y naini, hini leuchi thui pi ai nai kai ai pato nai ne, nanai athang khai u moh. Kai ly mary apai salo y ateh nai khumichi teng y py thui pi nai ne. Nangchi kamta nichi py, amy i ei pajun cha nei u ai,” napi.

²⁸Naibaly miteaung keh ly ang thau iy Hebrai leu hawi, “Nangchi teng y Empara samrang i leu pei nai tangai u!

²⁹Hezekia my nangchi ai li-tapawp hyp nai tangai u moh; Hezekia ly nangchi ai atleu pajau y leang.

³⁰ARENG y ka-ym awm ai nai, ni i parawi nai leu tangai u moh. ARENG my nangchi ai atleu ai, nanai py, Asuria tavaimichi ai hini mary peang vui ai nai pei ai ny y, nanai py athang khai u moh.

³¹Hezekia i leu tangai u moh. Mary theung i nai theu u iy apasum ai nai, nangchi ai Asuria empara samrang my leu ang pei bo. Nangchi ai empara samrang my nangchi i pri hawi atawm nai pri, chohbai palo, kreip hang kangtha kawi angym nai pri, tako hawi kreip akho awm nai pri, olive asitui hawi khawihang awm nai pri y tha y nai sala, nangchi ly nangmychi i kreip keung hawi thaidu keungchi ra i athaichi cha iy, nangmychi tuikanchi ra i tui py nei ai nai nga u ai.

³²Empara samrang i leu pei nai kamta tangai u baly, nangchi ly dei u ai ny y, heng u ai. ARENG ly kaichi ai atleu pajau nai ne, nanai nangchi athang khai u ai nai Hezekia i li-tapawp nai tangai u moh.

³³Khumi takhrachi i tameuhchi ly huni khumichi i pri ai, Asuria empara samrang kiu i nai atleu pi sai a?

³⁴Hamath pri hawi Arpad pri i tameuhchi ly vai, ma mang y awm mo? Sephravaim pri, Hena pri Ivah prichi i tameuhchi ly ma mang y awm mo? Nichi ly Samari pri ai atleu pi sai a?

³⁵Huni pri bawibawichira i tameuhchi theung y, mani tameuh ly kaichi Asuria empara samrang kiu theung i nai mana khala atleu pi vai mo? Hunaibaly ARENG py Jerusalem mary ai atleu pajau, nanai ati mana nai athang khai u mo?,” napi.

³⁶Khumi mipuichi ly samrang Hezekia my leu pei nai kamta, tynkryh y naimy awm u pypy bo. Leu sairei py pathang u y nai ne.

³⁷Naibaly Eliakim, Sebana, Joahchi ly paleung mawn nai y mychi i ateaungchi seih iy, Asuria miteaung keh i thui nai leu ai samrang teng y amti pi bo.