Read Khumi Chin 2 ARENG KEH 20 Bible Online

2 ARENG KEH 20 - Khumi Chin bible

2 ARENG KEH 20

¹Huni neng khala y samrang Hezekia ly no i, deivi na. Amoz i chapo amo Isaia ly samrang teng y no de ai nai chei i, ni teng y, “Nang i no nai ly hawi teang y leang bo, dei takengkei ai. Hunai deaungkho y nang ly leu taviu ai awm naichi taviu ai nai ARENG my leu pei nai ne. Dei ai nai angveirym ba,” napi.

²Hezekia ly angpang mang y meimai hi iy,

³“Aw ARENG, kai ly nang i kalop ai ka-ym awm naimy sa. Nangmy sa hai ai ngai nai kamta sa nai ai pany pi ba,” nanai chiu sa iy khri pa-rei vo bo.

⁴Isaia ly samrang teng i theu nai samrang i yhm umtang y tym y rai khala, ARENG my ni teng y,

⁵kai ARENG i khumichi ai peang nai Hezekia teng y ali teang ly ni teng y, “Nang i amsi pajo Davida i Tameuh, kai ARENG ly nang i chiu sa nai thai i, nang i meikatui py niu bo. Kai ly nang i no nai hawi hai ai i, nang ly kani thomrei bo baly Achura yhm y chei pajau ai.

⁶Kai ly nang ai saneng holai pangrei heng bi ai nai pei ai. Kai ly nang hawi Jerusalem mary ai Asuria empara samrang teng i nai atleu ai. Kai i nang parai nai ai py, kai i miseaung Davida teng y leu adeu nai ai py, adawn iy kai ly hini mary ai ama hai ai,’ nanai thui pi,” napi.

⁷Isaia ly samrang i miseaungchi teng y, “Ni i uisalura y thaidu athai hawi bi pi. Huni no nai ly tama vui ai,” napi.

⁸Samrang Hezekia my, “ARENG ly kai i no nai tama hai iy, kani thomrei kani y Achura yhm y chei pajau ai, nanai ly ati ka-ma-ra hawi pany pajau ai mo?,” nanai deng.

⁹Isaia my, “ARENG ly mymy i adeu nai kamta sa ai, nanai nang pany ai nai ka-ma-ra harei patei pi ai. Nang ly khailei salo y tla nai pa-pui ai, mo mang y kheu kan horei asyh nai niu ai nai ngai a? ti y baly nithun mang y kheu kan horei, anaw hai ai nai ngai a?,” napi.

¹⁰Hezekia my, “Pa-pui ly mo mang y kheu kan horei asyh ai nai ly rai y, huna nai y nithun mang y kheu kan horei anaw hai ai nai ngai,” napi.

¹¹Naibaly Isaia ly ARENG teng y chiu sa i, samrang Ahaz i sa nai khailei salo y tla nai pa-pui ly nithun mang y kheu kan horei anaw pi nai ne.

¹²Huni neng khala Baladan i chapo babulon samrang Meroda Baladan ly samrang Hezekia no nai satang thai; hunai deaungkho y, cha tajiu iy langseaung pa pi bo.

¹³Hezekia ly savaichi ai lamchung iy, my i nang chawn nai muku, tangka, rimuichi hawi tavai ateaung bawibawichi patei pi bo. Vawnsai khai nai takunchi hawi pri verei y awm nai ngiereichi ai, huni khumichi teng y samrang my patei pi nai ne.

¹⁴Naibaly amo Isaia ly samrang Hezekia teng chei iy, “Huni khumichi ly ma mang i jeu u nai mo? Nichi my nang teng y ati thui pi u mo?,” nanai deng. Hezekia my, “Nichi ly khri pa-rei palo nai Babulon pri dengdairei jeu nai ne,” napi.

¹⁵Isaia my, “Nichi ly samrang i yhm theung y atitichi niu u mo?,” nanai deng. Hezekia my, “Nichi ly samrang yhm theung y awm nai ngiereichi niu u nai ne. Vawnsai khaira takun theung i, nichi ai kaimy patei y nai ati sai py by y leang bo,” napi.

¹⁶Huna nai khala Isaia ly samrang teng y, “Nang i samrang yhm theung y awm nai ati cheaungkhangchi py,

¹⁷nang i amsi pajochi my vaini khrairei pateung pi nai yhmtheaung katuichi py, Babulon pri mang y syn pawn nai neng kani tym ai; ati sai py angdaw pi ai ny y.

¹⁸Nang i katu chanau kypkyp phyreichi ai py, patiu iy Babulon samrang i yhm y kalop sa hai ai nai tli pawn ai, nanai ati cheaungkhang sa thai nai ARENG my leu ang pei bo,” napi.

¹⁹Samrang Hezekia ly mymy deung y tlamsa naira hawi chymme naira awm ai, nanai pany lawh i, “Nang i thui pi nai ARENG i leu ly hawi nai ne,” napi.

²⁰Samrang Hezekia i ham parai nai, tuikan sa nai, mary theung y tui lam sa nai hawi ni i atiti sa naichi ai, Juda razavang cha-iu theung y tajiu pi typ nai ne.

²¹Hezekia dei nai khala ni i chapo Manase ly ampo i meingtym amtym i, samrang lawm bo.