Read Khumi Chin 2 ARENG KEH 24 Bible Online

2 ARENG KEH 24 - Khumi Chin bible

2 ARENG KEH 24

¹Samrang Jehojakim my peang nai thym khala y, Babulon samrang Nebukhadnezar ly Juda pri y tiu ai nai tym. Jehojakim py ni i peang nai anui y saneng thom ryrei awm; huni bo baly tiu bo.

²ARENG ly mymy i miseaung amochi dengdairei leu pei nai kamta, Juda pri taphra ai nai Babulon, Suria, Moba hawi Ammon tavaimichi ai pato bo.

³ARENG ly samrang Manase i sa tamang nai kamngo molam y, huni tleaung y kamngo by y nai khumichi ai padei nai molam y, Juda khumichi ai

⁴mymy mei ka-niu i dengdairei, patheu pawn ai ngai nai deaungkho y, hina nai kamta sa nai ne. Huni kamngo molam y ARENG ly Manase ai kamngo pahen pi y bo.

⁵Jehojakim i atiti sa naichi ly Juda razavang cha-iu theung y tajiu pi typ nai ne.

⁶Jehojakim dei nai khala, ni i chapo Jehojakhin ly samrang lawm bo.

⁷Aikupta samrang hawi ni i tavaimichi ly mana khala py Aikupta pri i dengdairei theu ai nai ngo u y bo. Ati mana nai mo nabaly Euphrat tavo dengdairei Aikupta pri tosyh ngan khu ka-peang tym pa-rei, Aikupta khu ngierei ai Babulon samrang my peang vui nai deaungkho y ne.

⁸Jehojakhin ly saneng holai tajarei awm nai khala, Juda samrang lawm i, Jerusalem mary y lo thomrei peang nai ne. Ni i amhm ly Jerusalem mary y awm nai Elanathan i chaniu Nahuta ne.

⁹Jehojakhin ly ampo i sa nai kamta sa iy, ARENG i tlang tleaung y kamngo sa bo.

¹⁰Nebukhadnezar i tavailu arengchi my lu sa nai Babulon tavaimichi ly Jerusalem mary y katanmeuh nai ly samrang Jehojakhin i deung y ne.

¹¹Huna nai katanmeuh nai thym khala y, Nebukhadnezar mymy kypkyp py Jerusalem mary y tym.

¹²Samrang Jehojakhin ly my i amhm, chapochi, tavai luchi, samrang yhm miteaung kehchi hawi vanrei, Babulon tavaimichi teng y tamawi aseih bo. Nebukhadnezar ly my i peang nai saneng tajarei awm nai khala y, Jehojakhin ai langheng hawi i,

¹³Achura yhm hawi samrang yhm theung i, vang kateng bawibawichi ai Babulon pri mang y syn pawn nai ne. ARENG my thui pi yb nai kamta, Nebukhadnezar ly Achura yhm y teaung ai nai samrang Solomon i sa nai, muku ateaung bawibawichi ai kheaung pawn bo.

¹⁴Nebukhadnezar ly Jerusalem mary i khumichi, samrang i cho chanauchi hawi lu sa nai keung ngiereichi, khumi bawibawi leaung 10,000reichi ai patiu iy langheng hawi nai ne. Ni ly khumi kamawn kateuchi ai naini Juda pri y daw su iy, tami thip kawp naichi hawi kalop kawp keh naichi ai ly hawi pawn bo.

¹⁵Nebukhadnezar ly Jehojakhin hawi vanrei amhm ai py, ajuchi ai py, bangtangchi ai py, Juda chengchi ai lu sa nai keungchi ai py, Babulon pri mang y hawi pawn nai ne.

¹⁶Nebukhadnezar ly aly len nai khumi bawibawi leaung 7,000reichi ai Babulon pri mang y hawi nai ne. Huni bo y tamo thip kawp naichi hawi kalop kawp nai khumi leaung 1,000reichi ai py hawi nai ne. Hunichi bawibawi ly tlang atho awm iy, tavaimi kalop sa pajau naichi ne.

¹⁷Nebukhadnezar ly Jehojakhin i ampochy Mattniah ai samrang palyn i, amyn ly Zedekiah, nanai amyn pathi bo.

¹⁸Zedekiah ly saneng 21rei awm nai khala y Juda samrang lawm i, Jerusalem mary y saneng holai harei peang nai ne. Ni i amhm ly Libana mary y awm nai Jeremia i chaniu Hamutal ne.

¹⁹Zedekiah ly samrang Jehojakhin i sa nai kamta sa iy, ARENG i tlang tleaung y kamngo sa.

²⁰ARENG ly Jerusalem mary i khumichi hawi Juda pri i khumichi ai, khri pa-rei kado theu nai deaungkho y, mymy mei ka-niu i nai patheu pawn nai ne.