Read Khumi Chin 2 ARENG KEH 25 Bible Online

2 ARENG KEH 25 - Khumi Chin bible

2 ARENG KEH 25

¹Zedekiah ly Babulon samrang Nebukhadnezar ai tiu nai ne. Hunai deaungkho y Nebukhadnezar ly my i tavaimichi hawi jeu iy, Zedekiah i peang nai saneng takaw, lo ho, kani horei kani y Jerusalem mary ai tiu bo. Ni ly mary angam mang y meingtym la iy, mary kamki abyhra angawmchi sa nai ne.

²Naibaly Zedekiah i peang nai saneng holai ha tym pa-rei, mary y katanmeuh bo.

³Huni saneng palyh lo, kani takawrei kani y khrikhri pa-rei cha nei takang nai deaungkho y, khumichi ly teicha teinei pipi by y na bo.

⁴Huna nai khala tavaimi risa bawibawichi ly mary apai taphra iy, vum y preang u. Nichi ly samrang i akho bai lam mang tako prei nai, mary apai nyhrei sala i katheu pa-kho mang theu u iy, Jordan leaunghawi mang y angpreng u.

⁵Na i py Babulon tavaimichi ly hui u nai, Jeriko mary sahawi i adymra y kai i, samrang Zedekiah ai patiu bo. Zedekiah i tavaimi risa bawibawichi ly mymychi i yhmkeung ai khai su iy angpreng u bo.

⁶Paleung ka-echi ly Zedekiah ai samrang Nebukhadnezar awm nai Riblah mary y hawi u i, Nebukhadnezar my huni meingtymra y tara chih bo.

⁷Zedekiah i chapochi ai my i mei ka-niu y padei chum baly, Nebukhadnezar my Zedekiah i mei hmchi tha piu vui iy sengkry hawi pakheng i, Babulon pri mang y hawi jo bo.

⁸Samrang Nebukhadnezar ly Babulon pri y peang nai saneng holai takawrei, lo pangrei, saryh kani y, samrang ai tau pei nai tavailu areng keh Nebuzaradan ly my i tavaimichi hawi Jerusalem mary y tavai amsa bo.

⁹Achura yhm, samrang yhm hawi aly len nai khumi bawibawichi i yhmchi ai, mai leng pawn nai ne.

¹⁰Ni i tavaimi risachi ly mary apai panawi u.

¹¹Naibaly Nebuzaradan ly mary theung y awm rai nai khumichi, awm rai nai kalop kawp nai khumichi hawi Babulon samrang mang y kun nai khumichi ai py, Babulon pri mang y hawi jo nai ne.

¹²Na i py khumi kamawn phyreichi ai ly Juda pri y kreip akhochi hawi li, hlauchira y kalop sa ai nai daw jo bo.

¹³Babulon chengchi ly Achura yhm theung i kheupaja yhmmawmchi, kiu hawi nui nai kheupaja ka-richi hawi kheupaja tuikan pui ai taphra piupa iy, kheupaja bawibawichi ai ly Babulon pri mang y syn pawn nai ne.

¹⁴Nichi ly maicham pachai naira y teaung nai khaileaung chawnchi, maidym khairachi, maisi yhmchi kachi naira y teaung nai ateaung alangchi, apathyp nai khala y thichi kadeng nai rahumchi, rimui patawi naira y teaung nai khauchi, huni bo i Achura yhm theung y teaung nai takhra kheupaja ateaung alangchi py, tawn u pawn nai ne.

¹⁵Nichi ly mai-aichi syn nai khala y teaung nai khauchi, Seng-y-kang pangdai hawi muku, ti y baly tangka hawi sa nai vawnsai ngiereichi py, tawn u pawn nai ne.

¹⁶Samrang Solomon my Achura yhm i vui sa pi nai kheupaja yhmmawm pui nyhrei, kiu hawi nui na i kheupaja ka-richi hawi tui chy-y puichi ly neh ai nai ngo y na pa-rei ji parai nai ne.

¹⁷Huni yhmmawm pui nyhrei ly atawm riri i, harei nai y kasau miu holai saryhrei awm; hunichi ra y kasau miu thomrei awm nai kheupaja yhmmawm mawm naichi tai. Huni yhmmawm mym nai teng kamki kheupaja kadeng athaichi hawi ka-pu sa nai ne.

¹⁸Huni bo y tavailu areng Nebuzaradan ly pathyp pi nai keung kalen keh Seraiah, ni i bangtang pathyp pi nai keung Zephaniah hawi takhra aly len nai Achura yhm miteaung keh leaung thomreichi ai py,

¹⁹Juda tavailu areng kangngym, samrang ai tau pei nai bangtang leaung pangrei, tavaimi vuikanai kry nai bangtang tavailu areng hawi takhra aly len nai khumi leaung vui tariureichi ai py, mary theu i dengdairei patiu pawn nai ne.

²⁰Naibaly Nebuzaradan ly Babulon samrang awm nai Hamath pri

²¹Riblah mary y Babulon samrang teng y tym hai bo. Samrang ly nichi ai huni mary y pajeng chum baly, nichi ai padei pawn nai ne. Hunai deaungkho y Juda khumichi ly pri takhra mang y pri pala naira avum u nai ne.

²²Babulon samrang Nebukhadnezar ly Shaphan i katu, Ahikam i chapo Kedalia ai Juda samrang i bangtang kalenra y khai bo. Ni ai ly Babulon pri mang y hawi naira y abawi y nai khumichi ai peang hai nai ne.

²³Huni satang thai u nai khala y, tamawi aseih y nai Juda tavai luchi hawi risachi ly Mizapa mary y awm nai Kedalia teng y tym u. Huni tavai luchi ly Nethaniah i chapo Ismaela, Kareah i chapo Johanan, Netopha mary i Tanhumeth i chapo Seraiah hawi Maaka mary i khumi Jezaniachi ne.

²⁴Kedalia my nichi teng y, “Nangchi ly Babulon mary i miteaung kehchi ai jei ai nai aly ngai y, nanai kai adeu mang. Hini pri y awm iy Babulon samrang i kalop sa u baly, nangchi hawi ai,” napi.

²⁵Na i py saryh lo tym nai khala, samrang amjy theung i Elishama i katu, Nathania i chapo Ismaela ly khumi leaung horeichi hawi Mizapa mary y chei iy, tiu i padei vui bo. Ni ly Kedalia hawi vanrei awm nai Israela chengchi hawi Babulon chengchi ai py padei nai ne.

²⁶Huna nai khala Babulon chengchi ai jei nai deaungkho y, kamawn py, kanang py, Israela cheng bawibawichi ly tavai luchi hawi vanrei Aikupta pri mang y preang bo.

²⁷Babulon samrang Evilameroda ly mymy i samrang lyn nai saneng y, Juda samrang Jehojakhin ai theaung i nai palawi pi i, ni ai pahen nai patei bo. Huni ly Jehojakhin theaung tla nai saneng 37, lo holai ha, kani 27rei kani y hina nai tym nai ne.

²⁸Evilameroda ly Jehojakhin ai hawihai palai amkawm hai i, Babulon pri y pri pala naira avum nai takhra samrangchi tleaung y tahm pasang bo.

²⁹Hunai deaungkho y Jehojakhin ly theaung i ateaungchi aleng ai nai nga iy, mymy heng nai ryrei ly samrang hawi vanrei, sabawi y oh ahawi ai nga.

³⁰My heng nai ryrei, mymy ngai nai kamta pasum ai nai kani tleirei, charei pei pi nai ne.