Read Khumi Chin 2 ARENG KEH 3 Bible Online

2 ARENG KEH 3 - Khumi Chin bible

2 ARENG KEH 3

¹Juda samrang Jehoshapha i peang nai saneng holai tajarei khala y, Ahad i chapo Joram ly Israela pri samrang lawm i, Samari mary y saneng holai nyhrei peang nai ne.

²Ni py ARENG i tlang tleaung y kamngo sa; na i py my i ampo, ti y baly amhm Jezebela tanrei ly akhum y. Ni ly ampo i sa nai Bala tameuh mynchi ai taphra.

³Ni ly mymy ny y rai khala i peang nai Neba i chapo samrang Jeroboam kamta, Israela chengchi ai kamngo sa ai nai lu sa iy lam patei bo. Huna nai kamta kamngo sa jojo nai ne.

⁴Moba samrang Mesha ly saneng tleirei Israela samrang teng y beramcho 100,000 rei hawi beram 100,000 rei ra i nga nai beram muichi ai kahm pei reng nai ne.

⁵Na i py Israela samrang Ahad dei nai bo y Mesha ly Israela pri ai ka-awi sa bo.

⁶Samrang Joram ly vaimy Samari mary i nai theu iy, my i tavaimichi ai pangym bo.

⁷Ni ly Juda samrang Jehoshapha teng y savai pato i, “Moba samrang ly kai ai ka-awi sa bo. Hunai deaungkho y, ni ai tiu ai nai nang ly kai hawi vanrei amkawm y bo a?” napi. Samrang Jehoshapha my, “Kai amkawm ai mang; kai ly nang i sa hai nai kamta sa ai nai aeng yb bo. Kai i khumichi py, kai i keaungngochi py, nang i khumichi hawi keaungngochi kamta ne.

⁸Atiu ai nai ly mani lam mang amsa ai mo?” napi. Joram my, “Achi ly Edom daichi ka-vym lam kasau mang amsa ai,” nanai pathang.

⁹Hunaibaly samrang Joram hawi Juda samrang, Edom samrangchi ly amsa u i, kani saryhrei kra nai khala, tavaimichi i vui py, vawnsai tang nai tawnbawichi i vui py, nei ai nai tui kheih nai deaungkho y,

¹⁰samrang Joram my, “Achi ly rai naira avum bo! ARENG ly achi samrang leaung thomreichi ai, Moba samrang i kiu y au lawh bo ly!” nanai thui.

¹¹Samrang Jehoshapha my, “ARENG teng y leu deng pi ai nai, hi y amo leaungrei py by y nai sai a?” napi. Samrang Joram i tavailu my, “Sapha i chapo Elisa awm; ni ly Elija i bangtang ne,” napi.

¹²Samrang Jehoshapha my, “Ni ly amo tatang ne,” napi i, samrang leaung thomreichi ly Elisa teng y chei u bo.

¹³Elisa my Israela samrang teng y, “Ati mana nai y kai ly nang ai sabawm ai mo? Nang i ngamhm, ngampochi ai tau pei reng nai amochi teng y phai chei iy adeng u,” napi. Joram my, “Hina nai thui moh! kaichi samrang leaung thomreichi ai Moba samrang kiu y au nai keung ly ARENG my ne lawh veng,” napi.

¹⁴Elisa my, “Kai i chiu nai ati cheaungkhang sa thai nai keung, heng nai ARENG i saho y, kai ly Juda samrang Jehoshapha i meimai y dawn pi y lawh ip khyly, nang ai kang sabawm y leang.

¹⁵Vai ly taro beu kawp nai khumi leaungrei ai kai teng y jeu hai,” napi. Taro beu kawp nai khumi ly taro beu nai thym khala, ARENG i sa thai naira ly Elisa teng y tym bo.

¹⁶Hunaibaly Elisa ly “ARENG my, ‘tui kang nai huni tavo micheaungchi ai leaunghawi tai u;

¹⁷Nangchi ly kani kanai hawi ali aho nai niu y teu i py, huni tavo micheaung ly tui kawi ai. Nangchi hawi nangmychi i tawnbawichi, vawn tang nai tawnbawichi i vui nei ai nai tui bym pa-rei nga u ai,’ nanai leu ang pei bo,” napi.

¹⁸Naibaly Elisa my thui pi bi nai ly “Hinichi ly ARENG my sa ai nai rai y nai ne. Mymy ly Moba khumichi ai nangchi i kiu tleaung y au ai.

¹⁹Nangchi ly nichi i apu parai nai amtangra marychi peang vui iy, nichi i thengthai keungchi py, paliu pi pawn ai. Nichi i tuikan bawibawichi ai taphum pawn ai. Nichi i paitiu khuta kahawi ngiereichi ai lengseaungchi hawi taphum iy taphra pi pawn ai,” napi.

²⁰Kani pa-nyh khawn mang apathyp reng nai neng khala, tui ly Edom pri mang dengdairei leaung kathiu i, khaileaung angdym ra kawi na bo.

²¹Moba khumichi ly samrang leaung thomreichi my, nichi ai tavai tiu bo, nanai pany u nai khala y, tavai ateaung syn pajau nai khumi katheang, kalen bawibawichi ai palau achu iy, pri khujyh ra amo hai bo.

²²Kani pa-nyh kawn, nichi i anglaw nai neng khala y, kani si nai kangvang sangso ly tui salo y ko i, thi kamta niu u nai ne.

²³Moba khumichi my, “Huni ly thichi ne lawh ly! paleung ka-e tavaimi kamkawm thomreichi ly mychi tengtawi atleh u lawh bo ly! Achi chei iy nichi i Taira y lawm u sina!” nanai aeu u.

²⁴Na i py nichi ly huni Tai naira y tym u nai khala, Israela chengchi my, nichi ai tiu u bo. Israela chengchi ly Moba khumichi ai hui u i, tleh chauchau iy

²⁵nichi i marychi py taphra pi pawn nai ne. Israela chengchi ly pa-tiu khuta kahawi avum nai tleirei, khumi luteng lengseaung ha harei aphi u nai deaungkho y, huni khaileaungchira y lengseaungchi kawi na bo. Micheaung tuikan bawibawichi ai py taphum iy, thengthai keungchi py paliu pi pawn bo. Kangkhym y Kir Here mary pui naini tleaung khyh bo i, lijai pa nai risachi ly huni mary ai katanmeuh iy tiu u nai ne.

²⁶Moba samrang ly mymy tavai sum bo, nanai apany nai khala y, ni ly haisau syn nai risa leaung 700 reichi hawi vanrei, paleung ka-echi theung i nai theu vui iy, Suria[1]samrang teng y preang vui ai nai atho sa; na i py ngo thai y bo.

²⁷Hunai deaungkho y ni ly my i meingtym amtym ai nai chapo chalu ai, mary apai salo y Moba tameuh teng y apathyp vui bo. Huna nai khala Israela chengchi ly jei u i, Moba chengchi i tameuh my saisairei so hai lawh na mo, nanai jei nai deaungkho py, ti y baly Israela chengchi i ARENG Tameuh my saisairei so hai lawh na mo, nanai jei nai deaungkho py, huni mary i nai anaw iy mymychi i pri mang y vawi u bo.