Read Khumi Chin 2 ARENG KEH 4 Bible Online

2 ARENG KEH 4 - Khumi Chin bible

2 ARENG KEH 4

¹Amo kamkawm theung i, amo leaungrei i aju neampachy lumai leaungrei ly Elisa teng y chei iy, “Areng awi, kai i juvo ly dei vui bo! Nang i pany nai kamta, ni ly Tameuh ai jei kaji nai khumi ne. Na i py ni ly kalai awm i, kalai keung ly kai i chapo leaung nyhrei ai, ampo i kalai atheu iy miseaung palawn ai nai ang la bo,” napi.

²Elisa my, “Nang i vui kai ati kang sa pi ai mo? Nang i yhm y ati awm mo? Kai ai thui pi,” napi. Neampachy my, “olive asitui awm nai chy-ychy ny y baly takhra ati sai py by y,” nanai pathang.

³Elisa my, “Nang i yhm deaungpachi teng y chei iy, chy-y ka-keu nga nai ryrei alai ba.

⁴Naibaly nang hawi nang i chaponi ly yhm theung y kun iy katheu kho vui ly alai nai chy-ychi ra y asitui kawi pa-rei patlai; asitui kawi nai chy-ychi khai takhra,” napi.

⁵Hunai deaungkho y huni neampachy lumai ly my i chaponi ai palau iy yhm theung y kun i, katheu kho veng chum baly, chapo nini my tym hai nai chy-ychi ra y asitui tleng bo.

⁶Huni chy-ychi ra y asitui kawi nai khala y, neampachy lumai my, “Chy-y ka-keu awm rai a?” nanai chaponi teng y deng. Chapo leaungrei my, “by y leang bo,” nanai pathang baly, asitui theu nai anawn ryp veng bo.

⁷Neampachy lumai ly amo Elisa teng y chei ali bi i, amo my, “olive asitui jo iy kalai bawibawi pe chum baly, kamlai tangkachi ly nang hawi nangmy i chaponi i vui apacho u,” napi.

⁸Kanirei nai khala y Elisa ly Shunem mary y chei bo. Huni mary y neampachy kanang leaungrei awm. Ni ly Elisa ai palau iy pacho panei. Naibaly Elisa ly huni neng khala i dengdairei, huni mary y tym nai tleirei huni neampachy i yhm y cha nei nai ne.

⁹Huni neampachy my mymy i juvo teng y, “Ani i yhm y avawrei tym reng nai khumi ly khumi kachai ne khyp, nanai kai pany bo.

¹⁰Ani ly yhm amphu salo y takunchy sa iy, ira kadang, sabawi, atehra hawi maisi yhmchi khai pi baly, huni khumi ly ani i yhm y tym nai tleirei, huni takunra y anga pajau ai,” napi.

¹¹Kanirei nai khala y Elisa ly Shunem mary y tym bi i, anga ai nai mymy i takun mang y chei kalau bo.

¹²Ni ly my i miseaung Kehazi teng y, yhmkeung neampachy ai palau hai bo. Huni neampachy tym nai khala y,

¹³nimy Kehazi teng y, “Hini neampachy ly ani ai hina tanrei paleung kahawi pacho panei nai deaungkho y, ani ly ati vawitheung tha ai mo? Ni teng y deng cham; ni ly my i vui kai ai samrang teng y mo, tavailu areng teng y mo, thui hai ai nai aly ngai lym ai,” napi. Huna nai khala neampachy my, “Kai ly hini meingtym y amjo amnauchi hawi awm nai ne i, ati sai py aly ngai y leang,” napi.

¹⁴Naibaly Elisa my Kehazi teng y, “Hini neampachy ai ani ly ati sabawm ai mo?” nanai deng. Kehazi my, “Ni ly chapo by y, ni i juvo py miteaung bo,” napi.

¹⁵Elisa my, “Huni neampachy ai hi y jeu hai,” nanai leu pei i, neampachy ly jeu iy katheu pa-khora y angdo.

¹⁶Huna nai khala Elisa my neampachy teng y, “Amlo hini neng khala, nang ly chapo tapawm ai mang,” napi. Neampachy my, “Aw areng, kai ai tapawp moh; nang ly Tameuh i khumi ne!” napi.

¹⁷Na i py Elisa my thui pi nai kamta, neampachy ly amlo hini neng khala chapo tapen nai ne.

¹⁸Saneng kra kyh nai khala, choh tyn nai neng khawn mang y deaungdi ly choh tyn naichi hawi vanrei awm nai ampo teng y chei nai ne.

¹⁹Tlenrei khyhmy deaungdi ly ampo teng y, “Kai ly lu no parai! kai ly lu no parai!,” napi. Naibaly ampo my miseaung leaungrei teng y, “Deaungdi ai tapawm iy amhm teng y tha,” napi.

²⁰Miseaung ly deaungdi ai tapawm iy amhm teng y tha bo. Amhm ly kanithun ryrei my i phai tleaung y khai; hunai thym khala deaungdi ly dei vui bo.

²¹Naibaly amhm ly deaungdi ai tapawm iy, Elisa i anga nai takun mang y lyn kalau i, ira kadang tleaung y paseaung chum baly katheu kho typ bo.

²²Naibaly neampachy ly Juvo ai palau iy, “Kai ly amo Elisa teng y kachei ai; miseaung leaungrei hawi keaungngo kano kasau harei kai teng y pato pi ba; kai ly kra y naimy kang vawi teang ai,” napi.

²³Juvo my, “Ati mana nai y vaini chei ai nai ngai lawh mo? Vaini ly anawn kani[2] ny y, losi pawi kani py ny y be,” napi. Aju my, “Huna nai ny y i py, aly by y leang,” nanai pathang.

²⁴Naibaly neampachy ly keaungngo kano kasau tleaung y atangra khai hai chum baly miseaung teng y, “Keaungngo kano kasau ai angpreng hai kaliki; kaimy leu pei y baly angpreng nai paniu moh sy,” napi.

²⁵Hunaibaly neampachy ly Elisa i awm nai Karamela mawi saleung y lyn kalau bo. Elisa ly kamlo mang dengdairei neampachy jeu nai niu i, miseaung Kehazi teng y, “Khen cham, Shunem mary i neampachy ang jeu ho!

²⁶Ni teng y chei kaliki ly ‘nangmy py, Juvo py, chapo py, noso hawi mo,’ nanai deng cham,” napi. Neampachy ly Kehazi teng y, “Noso hawi bawi na a,” napi.

²⁷Na i py neampachy ly Elisa teng y tym nai khala y, lu meung chum baly Elisa i kheu y takawi bo. Kehazi ly neampachy ai nui vui ai nai sa nai khala Elisa my, “Ni ai paka moh; ni i khri pa-rei paleung si nai ly nang niu y nai sai a? Hini molam y ARENG ly kai ai thui pi y leang rai,” napi.

²⁸Neampachy my ni teng y, “Areng awi, kai ly nang teng y chapo hnei sai a? ‘kai ai athang khai hai atyhtyh moh,’ nanai kang napi nai ny y a?” napi.

²⁹Elisa ly Kehazi mang y motha iy, “Kai i cheaungvawi lo ly chei kaliki; lam y ami ai py leu preng moh. Nang ai leu preng lawh teu i py pathang moh. Yhm y tym pa-rei chei iy, deaungdi salo y kai i cheaungvawi khai ba,” nanai pato.

³⁰Neampachy my Elisa teng y, “Deungtasa heng nai ARENG hawi nang i tlang tleaung y kai i tahm khai nai ai tau iy, nangmy abawi y baly kai chei y leang,” napi. Naibaly Elisa ly ang thau iy ni hawi vanrei chei bo.

³¹Kehazi ly tako man iy Elisa i cheaungvawi ly deaungdi i tlang tleaung y khai bo. Na i py deaungdi teng i katyn thai y; heng teang nai ka-ma-ra ati sai py niu y. Hunai deaungkho y Kehazi ly Elisa ai lamchung teang i, “deaungdi ly anglaw y,” napi.

³²Elisa ly yhm y tym nai khala, mymy tlairei takun theung y kun i ira kadang salo y, deaungdi i veu paseaung nai niu.

³³Ni ly katheu kho vui iy, ARENG teng y chiu sa bo.

³⁴Naibaly ni ly deaungdi i tlang tleaung y tabiu iy, labeaung tengtawi, mei tengtawi, kiu tengtawi tabi typ naimy awm bo. Ni ly hunai kamta deaungdi i tlang tleaung y tabiu naimy awm nai khala, deaungdi ly tlang kabi nga amteaung nai ne.

³⁵Elisa ly ang thau i, takun theung y aleaung; huni bo y deaungdi i tlang tleaung y tabiu bi. Naibaly deaungdi ly tlen saryhrei pasei i, mei pali.

³⁶Elisa ly Kehazi teng y deaungdi i amhm ai palau hai bo. Amhm tym nai khala Elisa my ni teng y, “Nang i chapo ly hi y he!” napi.

³⁷Neampachy ly Elisa i kheu keung y ambeu naimy, ni i meimai ly khaileaung y abi na pa-rei meung bo. Naibaly neampachy ly chapo ai tapawm iy, angam mang y theu nai ne.

³⁸Tlenrei khala y, huni pri y takang theu i, Elisa ly Kilakala mary y vawi teang bo. Ni ly amochi ai atiti patiu pi nai thym khala, huni khumichi i vui laawm pui harei hawi an theaung pi ai nai, my i miseaung ai leu pei.

³⁹Nichi theung i leaungrei ly daichi theung y an hau ai nai chei. Ni ly adym karam keung niu i, syn pajau nai ryrei adym athaichi jaw bo. Adym karam, nanai pany y i, sei iy theaung.

⁴⁰Huni an khumichi cha ai nai sawn pi nai khala, nichi ly cha cham i, Elisa teng y, “Hini an ly dei thalai teu!” nanai aeu i, cho u y bo.

⁴¹Elisa my tako dei maidenreichy hnei i, laawm theung y thiu. Naibaly, “Hini khumichi cha ai nai sawn pi,” nanai thui pi i, sawn pi nai khala dei thalai by y leang bo.

⁴²Huni bo i tlenrei nai khala, khumi leaungrei ly huni saneng i nga nai chohpui chomaw changtha hawi sa nai tako tlip apomrei, Elisa i vui Shalishah mary i dengdairei syn pi nai ne. Elisa ly amochi ai huni tako pacho ai nai, my i miseaung teng y leu pei bo.

⁴³Na i py miseaung my, “Hini tako ly khumi leaung chungvaireichi cha ai nai aleu na a?” napi. Elisa my, “Tuni tako ly hini khumichi ai pacho. ARENG my, ‘nichi kajeu kawi u nai bo y, cha kamthum awm ai,’ ang napi,” nanai pathang.

⁴⁴Hunaibaly miseaung ly amochi teng y huni teicha teinei sawn pi i, ARENG my leu pei nai kamta, huni khumichi kajeu kawi u nai bo y, cha kamthum awm asai nai ne.