Read Khumi Chin 2 ARENG KEH 6 Bible Online

2 ARENG KEH 6 - Khumi Chin bible

2 ARENG KEH 6

¹Kanirei nai khala amo kamkawm my Elisa teng y, “Achi i awm nai meingtym ly amchei parai!

²Awmra yhm kangtha sa ai nai kaichi ly Jordan tavo peang y chei iy, dengkeaung paliu ai nai pei ba,” nanai hnei u. Elisa my, “Hawi mang,” napi.

³Nichi theung i leaungrei my Elisa ai, nichi hawi vanrei abang ai nai takeng i, ni py ngai;

⁴nichi hawi vanrei chei pi bo. Nichi ly Jordan tavo y tym nai khala, kalop sa amteaung u.

⁵Nichi theung i khumi leaungrei ly dengkeaung paliu nai thym khala y, ni i atiu ly tui theung y tla vui bo. Hunaibaly ni ly Elisa teng y, “Areng awi, kai ly mana sa ai mo? Hini atiu ly alai nai atiu ne!” napi.

⁶Elisa my, “Atiu ly manira y tla nai mo?” nanai deng. Huni khumi ly tla nai meingtym patei pi. Elisa ly thengbeang harei tameang iy tui theung y aphi i, atiu ly tui salo y po hawp teang bo.

⁷“Huni atiu ai talau,” napi i, huni khumi ly kiu jaha iy atiu talam nai ne.

⁸Suria samrang ly Israela pri hawi tavai atiu nai thym khala, my i tavailu arengchi hawi arum iy, Taira meingtym vawi u bo.

⁹Na i py Elisa ly Israela samrang teng y, “Huni meingtymra y Suria khumichi ly lampawm atheng u yb bo. Hunai deaungkho y hunira y chei u moh,” nanai khumi pato iy pany hai pi nai ne.

¹⁰Hunaibaly Israela samrang ly huni meingtym y awm nai khumichi teng y pany hai yb i, hawihai palai typ hai bo. Huna nai tym nai ly avaw avawrei ne.

¹¹Suria samrang ly huna nai molam y khri pa-rei paleung bi i, my i tavailu arengchi ai palau iy, “Nangchi theung i ami mo ly Israela samrang mang y asa hai lo-oh?” nanai deng.

¹²Nichi theung i leaungrei my, “By y leang samrang awi, amo Elisa ly nang i takun theung y leu kamsyh katheu nai malawn py, Israela samrang teng y amti pi nai ne,” napi.

¹³Samrang my, “Huni khumi ly ma y awm mo, nanai hau u, kaimy patiu ai,” napi. Samrang ly Dothan mary y Elisa awm, nanai pany nai khala,

¹⁴keaungngo atang nai risachi, tavai ka-richi hawi tavaimichi ai huni meingtym y pato. Nichi ly vum y tym u i, mary y katanmeuh bo.

¹⁵Kani pa-nyh khawn angthodyh khala y, Elisa i miseaung ly i ang thau nai angam mang y theu i, mary ai katanmeuh nai Suria tavaimichi hawi vanrei, keaungngo atang nai risachi, tavai ka-richi niu. Ni ly Elisa teng y ali teang iy, “Achi ly rai bo! mana sa ai mo? napi.

¹⁶Elisa my, “Jei moh, achi mang y awm naichi ly nichi mang y awm naichi tleaung y nawi keh,” napi.

¹⁷Naibaly Elisa ly “Aw ARENG awi, ni i mei angvang hai ly niu sy ba! nanai chiu sa bo. Ni i chiu sa nai ly ARENG my pathang pi i, Elisa i miseaung ly angdeang i, Elisa i tengpang mawi salo y mai keaungngochi hawi mai ka-richi kawi nanai niu bo.

¹⁸Suria tavaimichi sahawi y tym nai kala Elisa my, “Aw ARENG, hini khumichi ai mei paju hai pawn ba! nanai chiu sa i, ARENG my huni khumichi i mei paju hai pawn bo.

¹⁹Naibaly Elisa ly huni khumichi teng y chei iy, “Nangchi ly lam tamang u bo; hini mary ly nangchi i hau nai mary ny y leang. Kai nithun abang u; nangchi i aly ngai nai khumi teng y kaimy kang tha ai,” napi. Naibaly nichi ai Samari mary mang y pahawi bo.

²⁰Nichi mary theung y kun phai kun u baly Elisa my, “AwARENG, hini khumichi i mei am-eaung hai ly niu u teang sy,” nanai chiu sa i, ARENG my huni khumichi ai mei kangvang pei pi teang nai khala, nichi ly Samari mary theung y tym nai niu u lawh bo.

²¹Israela samrang ly Suria khumichi ai niu nai khala Elisa teng y, “Areng awi, nichi ai kaimy padei ai a? Nichi ai kaimy padei ai a?” nanai deng.

²²Elisa my, “Padei moh; tavai keung y patiu nai risachi ai malawn py, padei ai nai avo y nai ne. Nichi ai teicha teineichi pacho iy, mychi i samrang teng y vawi ali teang ai nai pei pi u,” napi.

²³Hunaibaly Israela samrang ly cha nei pawi pui sa pi i, nichi ai pacho panei chum baly, Suria samrang teng y vawi hai teang nai ne. Huni kani dengdairei Suria khumichi ly Israela pri y tiu vam y bo.

²⁴Neng kra kyh nai khala y Suria samrang Benhada ly Israela pri y tiu ai nai my i tavaimi kamkawm verei hawi amsa iy, Samari mary y katanmeuh bo.

²⁵Samari mary theung y cha nei takang. Keaungngo kano kasau lu harei nai y tangka chang vui tajarei, buhu ei[4]sirei nai y tangka chang tlau pangrei hawi van ai nai tla bo.

²⁶Israela samrang ly mary apai salo y aleaung nai thym khala, neampachy leaungrei my, “Samrang awi!, kai ai sabawm kyh ba,” nanai aeu.

²⁷Samrang my, “Nang ai ARENG my sabawm y baly, kai ly mana kang sabawm pajau ai mo? Kai teng y choh hawi kreip hang awm sai a?

²⁸Nang i patang nai sai ly ati mo?” nanai deng. Neampachy my, “Hini neampachy my ly jangdyh, ‘vaini nang i chapo ai cho u sina; khawndam ly kai i chapo ai cha ai,’ nanai thui.

²⁹Hunaibaly kaini ly kai i deaungdi ai theaung iy cha bo. Khawn khutawi nai khala ly kaimy nang i chapo ai cho sina, nanai thui pi baly, ni ly my i deaungdi ai heu vui lawh!” napi.

³⁰Samrang ly huni leu thai nai khala y khri pa-rei jei hyn nai y, my i ateaung seih vui na. Naibaly mary apai sahawi y awm nai khumichi ly my i amchiu nai ateaung theung y paisiu amchiu nai niu u nai ne.

³¹Samrang my, “Vaini kani avah y rai khala, Elisa i lu katameang y lawh baly, Tameuh my kai ai dei pa-rei pajeng na sy!” nanai vaineng abeu bo.

³²Naibaly Elisa ai patiu ai nai khumi leaungrei pato nai ne. Huna nai thym khala y Elisa ly mymy teng y pavai nai miteaung kehchi hawi vanrei, mymy i yhm y awm. Samrang i pato nai savai tym y kyh rai khala, Elisa my huni miteaung kehchi teng y, “Khumi ai tleh nai keung ly kai ai padei ai nai khumi leaungrei ang pato bo ho! Hunai deaungkho y huni khumi ang tym nai khala y, katheu kho u veng. Ni ai kun ai nai pei u moh; samrang ly ni i nithun mang ang jeu ai,” napi.

³³Ni i thui nai leu tem y naimy samrang[5]ly tym iy, “Hina nai patang naira avum hai nai keung ly ARENG my ne lawh veng! Kai ly mymy teng i kasabawmra mana ajeng veangveang ai mo!,” napi.