Read Khumi Chin 2 ARENG KEH 8 Bible Online

2 ARENG KEH 8 - Khumi Chin bible

2 ARENG KEH 8

¹Elisa ly mymy paheng pi teang nai deaungdi i amhm, Shunem mary i neampachy teng y, “ARENG my pri verei y saneng saryhrei takang theu hai ai; hunai deaungkho y nang ly nangmy i yhm dengtheungchi hawi vanrei, meingtym takhra mang y ang pyn vui ba,” napi.

²Huni neampachy ly Elisa my thui pi nai kamta, my i yhm dengtheungchi hawi vanrei, Philistin pri y chei iy, saneng saryhrei awm jo nai ne.

³Saneng saryhrei bo baly ni ly Israela pri y vawi ali teang iy, samrang teng y chei i, my i yhm hawi khaileaung meingtym pei teang ai nai takeng.

⁴Huni neng khala samrang ly Elisa i miseaung Kehazi hawi leu arum thym nai ne. Samrang ly Elisa i sa nai rengrang ka-ma-ra satang pany ai nai ngai.

⁵Naibaly Kehazi ly khumi kadei ai Elisa my mana paheng teang mo, nanai thui pi. Huni neng khala Sumen mary i neampachy ly tym i, samrang teng y hnei takeng bo. Kehazi my samrang teng y, “Samrang awi, Elisa my paheng teang nai deaungdi hawi amhm ly hinini ne he!,” napi.

⁶Samrang my Kehazi i leu teng mo, teng y mo, nanai deng nai khala neampachy my, “Teng khyp na a,” napi. Hunaibaly samrang ly bangtang leaungrei ai palau i, ni teng y, “Hini neampachy kamlora awm jo nai saneng saryhrei sala y, ni i li ra i theu nai amti amjangra i nga nai vang bawibawichi hawi, ni i peang nai ngierei ly ni teng y pei pi teang sy,” nanai leu pei nai ne.

⁷Suria samrang Benhada no nai thym khala, Elisa ly Damaska mary y tym nai ne. Samrang ly Elisa tym, nanai thai nai khala y,

⁸samrang ly bangtang theung i leaungrei Hazaela ai palau iy, langseaungchi syn hai i, “Amo teng y chei ly kai i no nai ly hawi teang ai mo, hawi teang y ai mo. nanai ARENG teng y deng pi sy,” nanai pato.

⁹Hunaibaly Hazaela ly Damaska mary i theu nai vang tang nai vawnsaichi ai, kula-iu vui palyhrei tleaung y tang iy Elisa teng y chei bo. Hazaela ly Elisa teng y, “Nang i miseaung samrang Benhada my ni i no nai ly hawi teang ai mo, hawi teang y ai mo, nanai deng ai nai, nang teng y kai ai pato nai ne,” napi.

¹⁰Elisa my, “Samrang ly dei ai, nanai kai teng y ARENG my ang thui pi; na i py ni ly no hawi ali teang ai, nanai ni teng y thui pi,” napi.

¹¹Naibaly Elisa ly Hazaela awm thai y na pa-rei, ka-jei hawi nai meimai hawi khen kalingie iy vo bo.

¹²Hazaela my, “Areng awi, ati mana nai y vo nai mo?” napi. Elisa my, “Nang ly Israela chengchi i tlang tleaung y hawi y parai nai ka-jeira tym hai ai, nanai kai ly pany nai ne. Nang ly nichi i lengseaung yhmchi ai mai leng iy, hawi parai nai thawndeang deaungdichi ai tleh ai; deaungdichychi ai athyh teng iy padei ai. Neampachy jeubomchi ai py kajeu seikra iy padei ai,” napi nai pathang.

¹³Hazaela my, “Kai ly ati sai py ny y nai khumi ne! Kai ly sa thai naira ma i nai nga ai mo?,” napi. Elisa my, “Nang ly Suria pri y peang ai, nanai kai teng y ARENG my ang thui pi bo,” napi.

¹⁴Hazaela ly Benhada teng y vawi teang nai khala samrang my, “Elisa ly ati mana thui pi mo?,” nanai deng baly, “Nang ly no hawi teang ai, ang napi,” napi.

¹⁵Na i py kani pa-nyh nai khala y Hazaela ly kanih harei la i, tui pasui iy samrang i meimaira mym i padei vui bo. Naibaly Hazaela ly Suria pri i samrang y atheng bo.

¹⁶Israela samrang Ahad i chapo Joram i peang nai saneng pangrei awm nai khala, Jehoshapha i chapo Jehoram ly

¹⁷saneng 32 rei awm nai i Juda pri i samrang y lyn bo. Ni ly Jerusalem mary y saneng tajarei peang nai ne.

¹⁸Ni i aju ly Ahad i chaniu ne i, ni ly samrang Ahad yhm dengtheung kamta, Israela samrangchi i hawi y naira sa nai lam y abang teang. Ni ly ARENG i tlang tleaung y kamngo sa bo.

¹⁹Na i py ARENG ly Juda pri y taphra ai nai ngai y; ati mana nai mo nabaly mymy i miseaung Davida teng y, “Nang i kangpreangchi ai ly peang nai keung y khai pi jojo ai,” nanai adeu nai deaungkho y ne.

²⁰Jehoram my peang nai thym khala Edom pri ly Juda pri y tiu iy, law tleaung nai pri lawm nai ne.

²¹Hunaibaly Jehoram ly mymy i tavai ka-ri bawibawichi hawi Zaira mary mang y tavai amsa i, huni meingtym y Edom tavaimichi my katanmeuh nai avum bo. Samrang hawi tavai ka-ri lu sa naichi ly huni katanmeuh naira i nai tleaung u. Ni i tavaimi risachi ly mymychi i yhm mang y angpreng u phro veng bo.

²²Huna khala i dengdai vai khrairei Edom pri ly Judachi i anui y awm y i, tlamsa nai pri lawm bo. Huni neng khala Libana mary i khumichi py tiu u teang nai ne.

²³Jehoram i sa nai cheaungkhangchi ly Juda razavang cha-iu theung y tajiu pi tyn nai ne.

²⁴Jehoram dei nai khala y ni ai ly Davida mary i, samrangchi i tapreaung y up bo. Naibaly ni i chapo Ahazia ly ampo i meingtym amtym i, samrang lawm nai ne.

²⁵Ahad i chapo Israela samrang Joram my peang nai saneng holai nyhrei khala y, Jehoram i chapo Ahazia ly

²⁶saneng 22 rei awm i, Juda samrang y lyn bo. Ni ly Jerusalem mary y sanengrei peang; Ni i amhm ly samrang Ahad i chaniu Athalia ne i, Israela samrang Omari i katu py ne.

²⁷Ahazia ly Samrang Ahad hawi miso ne; Ahad i yhm dengtheungchi kamta, ARENG i tlang tleaung y kamngo sa bo.

²⁸Israela samrang Joram hawi Suria samrang Hazaela nini tavai atiu u nai khala y, Ahazia ly Joram mang y asa hai nai ne. Kilead pri Ramoth mary y atiu nai khala, Joram ly tamo nga.

²⁹Ni ly tamo hawi sa ai nai Jezarela mary y vawi bo. Ahazia ly ni ai no de ai nai, huni mary y chei nai ne.