Read Khumi Chin 2 ARENG KEH 9 Bible Online

2 ARENG KEH 9 - Khumi Chin bible

2 ARENG KEH 9

¹Hina nai thym khala y amo Elisa ly amo thawndeang leaungrei ai palau i ni teng y, “Nang ly Kilead pri Ramoth mary mang y chei ai nai angveirym ba. Hini olive asitui py syn jo.

²Huni mary y tym nai khala, Nimshi i katu, Jehoshapha i chapo Jehu ai hau; naibaly ni ai ahawichi theung i nai hawi takhra vui iy, avym nai takun harei mang y palau vui.

³Ni i lu y hini asitui leih iy, ‘ARENG my nang ai Israela samrang lawm ai nai asitui kang leih bo,’ nanai thui,” napi.

⁴Hunaibaly amo thawndeang ly Ramoth mary mang y chei bo.

⁵Huni meingtym y tavailu arengchi leu arum nai niu baly, “Tavai lu areng awi, kai ly nang i vui satang kang syn pi bo,” napi. Jehu my, “Kaichi theung i, ami i vui mo?,” nanai deng. Huna nai khala amo thawndeang my, “Nang i vui ne,” napi.

⁶Naibaly nini leaung nyhrei ly takun theung y kun hawi i, amo thawndeang my Jehu i lu y asitui leih pi iy, “Israela chengchi i ARENG Tameuh my, ‘kai ly nang ai Israela chengchi i samrang lawm ai nai khai takhra bo.

⁷Kai i amochi hawi takhra miseaungchi ai padei nai deaungkho y, Jezebela ai kaimy pajeng ai nai nang ly Ahad i chapo, nang i yhmkeung samrang ai padei ai nai tla.

⁸Ahad i yhm dengtheungchi hawi ni i kangpreang bawibawichi ly dei ai nai tla. Kaimy ni i yhm dengtheungchi ra i, neampacho katheang kalen takhawi y naimy, kaimy tamyh ai.

⁹Israela samrang Jeroboam hawi Baasa yhm dengtheungchi ai kaimy pajeng nai kamta, Ahad i yhm dengtheungchi ai py kapajeng ai.

¹⁰Jezebela i veu ai ly heung ai ny y. Ni i veu ly Jezarela meingtym y, uichi i teicha lawm ai,’ ang napi,” napi. Huni leu thui pajau baly amo thawndeang ly hu i nai theu iy angpreng veng bo.

¹¹Jehu ly my i ahawi tavailu arengchi teng y tym ali teang nai khala y, nichi my, “Ati cheaungkhang hawi a? Huni kamthu ly nang teng y ati aly jeu nai mo?,” nanai deng u. Jehu my, “Ni i aly ly nangchi pany,” napi.

¹²Huni khumichi my, “Kaichi pany y! Ni i thui nai leu kaichi pany ai nai ngai!” napi. Jehu my, “Huni khumi ly kai ai, ‘nang ai Israela samrang lawm ai nai ARENG my khai takhra bo,’ nanai ang thui pi,” napi.

¹³Naibaly tlenrei khyhmy, Jehu i tavailu arengchi ly khailei lu salo y Jehu amchyn ai nai mychi i ateaungchi bai iy baw eng u i, “Jehu ly samrang lawm bo!” nanai aeu u.

¹⁴Naibaly Jehu ly samrang Joram ai kangviu y padei ai nai dawn paviu bo. Huna nai khala samrang ly Suria samrang Hazaela hawi Ramoth mary y atiu nai khala nga nai tamo hawi sa ai nai Jezarela mary y tym yb nai ne. Hunai deaungkho y Jehu ly my i ahawi tavailu arengchi teng y, “Nangchi ly kai mang y asa naichi ne baly, Jezarela mary i khumichi teng y pany hai ai nai, ami py Ramoth mary i nai theu moh sy,” napi.

¹⁶Naibaly ni ly mymy i ka-ri salo y atang iy, Jezarela mary mang y theu jo bo. Joram i tamochi ly tha y rai nai deaungkho y, Juda samrang Ahazia ly ni teng y no de nai ne.

¹⁷Jezarela mary angdeangra salo y tamcheaung typ nai khumi ly Jehu hawi ni i khumichi tym dudu nai niu baly, “Keaungngo atang nai khumi phyreichi ang jeu nai niu!” nanai aeu. Joram my, “Huni khumichi ly ahawichi mo, paleung ka-echi mo, nanai pany ai nai keaungngo atang nai risa leaungrei pato,” nanai leu pei.

¹⁸Samrang i savai ly Jehu teng y tym i, ni teng y, “Nang ly ahawi kamta jeu nai mo, nanai samrang my deng hai nai he,” napi. Jehu my, “Hini ly nang i kalop ny y leang! kai nithun phai abang,” napi. Huni savai ly Jehu teng y tym i py, vawi ali teang y, nanai angdeangra salo mang niu nai tamcheaung ly samrang teng y amti pi nai khala,

¹⁹samrang ly takhra savai leaungrei ai pato bi. Huni khumi my py angchei i khumi kamta leu deng bo. Jehu my, “Hini ly nang i kalop ny y leang! kai nithun phai abang,” napi bi nai ne.

²⁰Huni savai ly Jehu teng y tym i py vawi ali teang y, nanai angdeangra salo mang niu nai tamcheaung ly samrang teng y amti pi bo. Naibaly huni khumi my, “Huni kamkawm ai lu sa nai keung ly my i tavai ka-ri ai, Jehu i atang nai ka-tawm ly kamthu kamta athoreimy ang jeu bo,” napi.

²¹Samrang Joram my, “Kai i tavai ka-ri khai yb ba,” napi. Naibaly Joram hawi samrang Ahazia ly my ni i tavai ka-rira y, atang hawi akyhkyh iy Jehu hawi avum ai nai chei hawi bo. Nini ly Naboth i khaileaung ra y tym nai khala, Jehu hawi avum bo.

²²Joram my, “Nang ly tlamsa nai ka-dawn hawi jeu nai a?,” nanai deng. Jehu my, “Nang i ngamhm Jezabela my sa amteaung nai uimiu atam kawp nai hawi myn chiu naichi awm nai ryrei ly ati mana tlamsa naira awm pajau ai mo?,” napi.

²³Joram my, “Aw Ahazia awi, hini ly ang tiu nai na a hi ly!,” nanai aeu i, my i keaungngo ka-ri alengli hai iy angpreng vui nai ne.

²⁴Jehu ly my i thailiho atheu praw iy athorei my a-eaung i, ko baly Joram i nithun y chawm; paleung pri vui na i, Joram ly my i keaungngo ka-ri tleaung y my atlym i dei bo.

²⁵Naibaly Jehu ly my i ka-rira lu sa nai Bikar teng y, “Ni i veu la iy Naboth khaileaungra y aphi su; samrang Joram i ampo Ahad nithun y, nang hawi kai ly keaungngo atang iy abang nai thym khala, ARENG my Ahad teng y,

²⁶‘jangdyh Naboth hawi chapochi ai padei nai kaniu; hunai deaungkho y kai ly nang ai hini meingtym y kang pajeng ai,’ nanai leu pei nai ly pany jo i, ARENG my leu pei nai kamta, Joram i veu ai Naboth i khaileaung y api su,” napi nai ne.

²⁷Samrang Ahazia ly huna nai atitichi niu nai deaungkho y, my i tavai ka-ri hawi Beth Hakan mary mang y preang vui; na i py Jehu ly ni i nithun hui iy, “Ni ai py padei u!” nanai my i khumichi ai leu pei bo. Samrang Ahazia ly Ibalam mary sahawi i Kura mary mang chei nai lam y tamo nga. Na i py ni ly Mekido mary y tym pa-rei angpreng veangveang i, hu y dei bo.

²⁸My i bangtangchi my ni i veu ai ly tavai ka-ri salo y tang iy Jerusalem mary y syn u i, Davida mary i tapreaung y heung u.

²⁹Ahazia ly Ahad i chapo Israela samrang Joram i peang nai saneng holai harei saneng y, Juda pri i samrang lawm nai ne.

³⁰Jehu ly Jezarela mary y tym; Jezabela ly atiti satang thai yb nai deaungkho y, my i meikhymra an amthym, sam py ka-pu sa iy samrang yhm thaibeng pa-kho mang lam mang y khen angdeang bo.

³¹Jehu ly samrang yhm apai katheu pa-kho mang jeu nai khala y, Jezabela my, “Amy i yhmkeung ai padei nai, nang Zimri[6]awi!, nang ly hi y ati aly jeu nai mo?,” nanai aeu.

³²Jehu ly angdeang kalau iy, “Kai mang y ami abawi ai mo?,” nanai deng. Huna nai khala bangtang leaungnyh, leaung thomreichi ly samrang yhm thaibeng katheu pa-kho mang khen u kathiu bo.

³³Jehu my nichi teng y, “Tuni neampachy ai nui praw!,” napi. Naibaly nichi my Jezabela ai ly nui praw i, thichi ly samrang yhm angpang y hawi keaungngochi salo y achen khrikhra na bo. Jehu ly Jezabela i veu salo y my i tavai ka-ri hawi amli iy,

³⁴samrang yhm theung y kun i, teicha teinei cha bo. Naibaly ni my, “Taham si nai huni neampachy ai ly lo u ly heung u; ati py ne sy, ni ly samrang i chaniu ne,” napi.

³⁵Na i py veu up ai nai chei nai khumichi ly huni neampachy i lu hawi, kiu kheu hiuchi naini niu u khyh nai deaungkho y,

³⁶nichi ly Jehu teng y amti pi u. Huna nai khala Jehu my, “Jezabela ly Jezarela meingtym y ui teicha lawm ai,” nanai thui nai ly ARENG i miseaung Elija my thui nai leu angym haibo.

³⁷Ni i veu ly mo-cha amny y na pa-rei, huni meingtym y si ei kamta, ahei phro ai, nanai ly tym nai ne.