Read Khumi Chin 1 NENG SATANG 10 Bible Online

1 NENG SATANG 10 - Khumi Chin bible

1 NENG SATANG 10

¹Philistia chengchi ly Israela chengchi hawi Kilabo mawi salo y atiu u i, Israela chengchi khri pa-rei dei u nai ne. Samrang Sawla hawi chapochi raurei, khumichi ly preang u bo.

²Na i py Philistin chengchi ly hui i kai nai khala, Sawla i chapochi napi nai Jonathan, Abinada hawi Malakhishuachi ai padei nai ne.

³Tavai ly Sawla i tengpang sahawi y ho parai nai deaungkho y, Sawla ly paleung ka-echi i thailiho chawm i, khri pa-rei no nga bo.

⁴Ni ly mymy i tavai ateaung syn pi nai thawndeang ai, “Tameuh by y nai Philistiachi jeu iy kai ai panui hai lawh na; nang ly haisau aphiu iy kai ai tleh vui jau,” napi. Na i py huni thawndeang ly samrang ai tleh ai nai jei nai deaungkho y, Sawla ly mymy i haisau atheu iy, haisau pado i, taba ka bo.

⁵Hunaibaly thawndeang ly Sawla dei nai nui nai khala, ni py my i haisau salo y taba iy dei teang.

⁶Naibaly Sawla hawi chapo leaung thomrei py dei nai deaungkho y, ni i samrang kangpreang ly tem bo.

⁷Jezarela leaunghawi ra y awm nai Israela chengchi ly mymychi i tavaimichi preang pawn nai py, samrang Sawla hawi chapochi dei pawn nai py thai u nai khala, mymychi i marychi khai su iy preang u nai ne. Huna nai khala Philistia chengchi ly jeu iy huni marychi ai peang vui bo.

⁸Tavai atiu pajau nai bo kani pa-nyh y, Philistia chengchi ly veuchira i vawnsaichi la u nai thym khala, Sawla hawi chapochi i veu ai Kilabo mawi y niu u.

⁹Nichi ly Sawla i lu tameang iy ateaungchi leng pawn nai ne. Naibaly savaichi ai Sawla i lu hawi tavai ateaungchi la iy, Philistia pri amki iy mymychi i chengchi hawi mynchi awm naira y satang thai hai bo.

¹⁰Nichi ly Sawla i ateaungchi ai mychi i achura yhm theung y khai iy, ni i lu ai ly Dakon tameuh yhm y bang hau bo.

¹¹Sawla ai Philistia chengchi my ati mana sa u mo, nanai Kilead pri Jabe mary i khumichi thai baly,

¹²risa bawibawichi ly chei iy samrang Sawla hawi chapochi i veuchi la iy, Jabe mary y syn u bo. Naibaly hiuchi ai ngopraibiu keung anui y up chum baly, kani saryhrei biu hai u nai ne.

¹³Samrang Sawla dei nai ly ARENG i tlang tleaung y ka-ym by y nai deaungkho y ne. Ni ly ARENG i leu tangai y.

¹⁴ARENG teng y adeng ahui ai nai tleaung y ly khumi kadeichi i phailo hawi amkawm lawh nai ne. Hunai deaungkho y ARENG ly Sawla ai padei iy, ni i pri ly Jese i chapo Davida ai peang hai nai ne.