Read Khumi Chin 1 NENG SATANG 11 Bible Online

1 NENG SATANG 11 - Khumi Chin bible

1 NENG SATANG 11

¹Israela khumi bawibawichi ly Hebron mary i Davida teng y chei u i ni teng y, “Kaichi ly nang i thi ngan ka-bichi ne.

²Lawn veng nai neng khala samrang Sawla deung y, nang ly Israela khumichi ai lu sa iy tavai thau bo. Nang i ARENG Tameuh my py, nang ly mymy i khumichi i lu, nichi i samrang lawm ai, nanai leu pei bo,” napi u.

³Huna nai Israela chengchi ai lu sa naichi ly Hebron mary y awm nai Davida teng y tym u nai khala, samrang ly ARENG i mo y huni khumichi hawi amkawm nai vaineng asa bo. Nichi my py Samuela teng y ARENG my adeu nai kamta, Davida ai asitui lei iy Israela samrang y palyn u bo.

⁴Samrang Davida hawi Israela cheng bawibawichi ly Jerusalem mary y tiu ai nai amsa u. Huni thym khala Jerusalem mary ly Jebu mary, nanai amyn awm nai ne. Huni mary y awm yb nai Jebusi khumichi awm u asai rai.

⁵Jebusi khumichi my samrang Davida teng y, “Nang ly hini mary theung y mana khala py kun ai nai nga ai ny y,” napi u. Na i py samrang Davida ly nichi i Zion amtangra ai tiu pajau vui nai deaungkho y, amtangra ly “Davida mary”, nanai amyn nga nai ne.

⁶Samrang Davida my, “Jebusi khumi leaungrei ai tleh man nai khumi ai ly tavailu areng y pei ai!” nanai thui nai kamta, Zeruiah i chapo Juaba ly tavai atiu naira y lu sa nai deaungkho y, tavailu areng y atheng bo.

⁷Samrang Davida ly huni amtang ra y awm ai nai chei reng nai molam y, huni ai “Davida mary,” nanai amyn pathi u.

⁸Abyhra amkeu taphum nai meingtym dengdairei, amtangra ka-ki mary palum nai ne. Mary apai so bawi y rai nai ai ly Juaba my sa palum pi bo.

⁹Samrang Davida ly sa thai naira awmra awmra. Ati mana nai mo na baly ati cheaungkhang sa thai nai keung ARENG ly samrang hawi vanrei awm nai deaungkho y ne.

¹⁰Anui ichi ly Davida i amyn amthang nai risachi ne. Nichi ly ARENG i adeu nai kamta, Davida ai samrang palyn pajau ai nai takhra Israela khumichi hawi vanrei amkawm iy, samrang i pri khaw hai nai keungchi ne.

¹¹Huni khumichi i amynchi ly angchei y Hamoni nupai Jashobeam ne. Ni ly sorai leaung thomreichi theung y lu ne. Tavai tlenrei atiu naira y my khumi leaung 300 reichi ai tivi hawi thun iy padei nai keung ne.

¹²Amyn amthang nai sorai leaung thomreichi theung y pa-nyh sorai ly Ahoh nupai Dodo i chapo Eleaza ne.

¹³Ni ly Pas Damim tavai keung y Davida hawi vanrei Philistia chengchi ai tiu nai khumi ne. Israela chengchi tavai anaw y kyh rai khala, ni ly chohpui chomaw bai hareira awm nai ne.

¹⁴Huna nai khala ni ly my i ahawichi hawi li prang ra y angdo naimy, Philistia chengchi ai tiu. ARENG ly ni ai eaung naira len parai nai pei pi bo.

¹⁵Kanirei nai khala risa leaung phaireichi ai lu sa nai sorai leaung thomreichi ly Rephaim leaunghawira y meingtym la u nai Philistia kamkawm harei y tiu ai nai, Davida awm nai Adulam tapiu sahawi i lengseaung pui ra y chei u bo.

¹⁶Huni neng khala Davida ly amtangra kakhaw sa yb nai mawi saleung harei ra awm iy, Philistia kamkawm hareichi py Bethlehem mary y meingtym la yb nai ne.

¹⁷Davida ly yhm mang y adawn parai nai deaungkho y, “Kai ai Bethlehem mary katheu pa-kho sahawi tuikanra i tui nei ai nai syn pi nai khumi awm i khyly kai y!” nanai kadeaung bo.

¹⁸Huna nai khala amyn amthang nai sorai leaung thomreichi ly Philistia khumichi tai naira y tako prei i, tuikanra i tui maidenreichy deu iy, Davida teng syn pi. Na i py samrang ly huni tui nei pi y. Huni tui nei ai nai tleaung y ly ARENG teng y talam nai leih vui bo.

¹⁹Naibaly samrang my, “Kai ly hini tui nei pajau y, amy i tlang areu iy kalop sa nai khumichi i thi kanei nai hawi atawm ai!” napi. Hunai deaungkho y nei y nai ne. Hini ly amyn amthang nai sorai leaung thomreichi i vam nai sai ne.

²⁰Juaba i amnau Abisai ly amyn amthang nai risa leaung phaireichi i lu ne. Ni ly khumi leaung 300 reichi ai tivi hawi thun iy padei nai deaungkho y, risa leaung phaireichi theung y amyn amthang nai ne.

²¹Ni ly risa leaung phaireichi theung y amyn amthang keh nai ne i, nichi i lu lawm bo. Na i py sorai leaung thomreichi theung y abawi y.

²²Kezela mary i Jehojada i chapo Benaia ly amyn amthang nai risa leaungrei ne. Ni ly sorai kalopchi neangneang sa. Huni kalopchi theung y khri pa-rei len nai Moba khumi leaung nyhrei ai padei nai py abawi nai ne. Kanirei nai khala y ni ly kadam tla nai neng y mawi tapiu theung y kun i, khrangsi amairei padei.

²³Tivi pui syn nai khumi, jeng ka-sang miu pangrei awm nai Aikupta neampacho leaungrei ai py padei bo. Benaia ly thengbeang hawi amtang iy huni khumi teng i tivi pui lawm vui i, huni tivi pui hawimy ni ai padei nai ne.

²⁴Hini kalopchi ly sorai risa leaung phaireichi theung y abawi nai Benaia i vam nai saichi ne.

²⁵Ni ly sorai risa leaung phaireichi theung y amyn amthang keh nai ne i py, sorai leaung thomreichi theung y abawi y. Samrang Davida my ni ai ly mymy ai typ nai tavailu areng ra y khai bo.

²⁶Amyn amthang nai takhra risachi ly anui mang ichi ne. Juaba i amnau Asahela Bethlehem mary Dodo i chapo Elahanan Herodi mary i Shammoth Pelet mary i Heleza Tekoa mary Ikesa i chapo Ira Anatho mary i Abieza Husha mary i Sibekai Ahoh mary i Ilai Netopha mary i Maharai Netopha mary Baana i chapo Heleza Benjamin pri Kibeah mary Ribai i chapo Ithai Pirathon mary i Benaia Kasha mary sahawi leaunghawichi ra i Hurai Arba mary i Abiela Bahurum mary i Azamaveth Shalabon mary i Eliaba Kizon mary i Hasem Hara mary Sakha i chapo Jonathan Hara mary Sakara i chapo Ahiam Ura i chapo Elipha Mekhera mary i Hepha Pelon mary i Ahijah Karamela mary i Hezaro Ezabai i chapo Naarah Nathan i amnau Joela Hakari i chapo Mibaha Ammon mary i Zelek Juaba i tavai ateaung syn pi nai Bero mary i Naharai Jatir mary i Ira hawi Kare Hiti khumi Uriah Ahlai i chapo Zabad Shiza i chapo(...)