Read Khumi Chin 1 NENG SATANG 14 Bible Online

1 NENG SATANG 14 - Khumi Chin bible

1 NENG SATANG 14

¹Turu mary i samrang Hiram ly Davida teng y ka-sum ka-pai sa nai kamkawm harei pato iy, samrang i yhm sa ai nai saitleang keungchi hawi vanrei, lasamachi, iusai kakawpchi tha pi nai ne.

²Na i py Davida ly mymy ai Israela samrang lawm ai nai ARENG my khai pi bo, nanai py, mymy i khumichi hawi ai nai Israela pri y nang chawn hai bo nanai py apany bo.

³Davida ly Jerusalem mary y ajuchi la bi nai deaungkho y, cho chanauchi nga bi bo.

⁴Jerusalem mary y nga nai chapochi i amynchi ly Shamua, Shoba, Nathan, Solomon,

⁵Ibaha, Elishua, Elapelet,

⁶Noka, Nephe, Japhia,

⁷Elishama, Beliada hawi Eliphelet napi naichi ne.

⁸Israela pri vereichi my Davida ai samrang palyn bo, nanai Philistia chengchi thai u nai khala, Davida ai patiu ai nai amsa u. Na i py Davida ly nichi hawi avum ai nai chei nai ne.

⁹Philistia chengchi ly Rephaim leaunghawi ra tym u nai khala, khumichi ai tiu amteaung bo.

¹⁰Davida my, “Kaichi ly Philistia chengchi ai tiu ai a? Nang ly kaichi ai eaung hai ai a?,” nanai Tameuh teng y deng bo. ARENG my, “Tiu ba! Kai ly nang ai eaung hai ai!,” napi.

¹¹Hunaibaly Davida ly Bala Perazim mary y, Philistia chengchi ai tiu i eaung bo. Davida my, “ARENG ly paleung ka-e tavaimichi ai tavo tui lem hai heu iy taphra nai kamta, kai ai teaung iy taphra bo,” nanai thui. Na i py huni meingtym ai Bala Perazim mary, nanai amyn pathi u nai ne.

¹²Philistia chengchi ly mymychi chiu nai mynchi ai, huni meingtym y daw u su. Davida my py hunichi ai mai leng vui ai nai leu pei.

¹³Naibaly kra y nai my Philistia chengchi ly leaunghawi mang y ali teang bi i, atiu u bi nai ne.

¹⁴Davida my py Tameuh teng y leu deng bi bo. Tameuh my, “Nang ly hini meingtym mang dengdairei tiu moh. Takhra mang y amhi iy chei vui ly thengmui keungchi sahawi mang tiu ba.

¹⁵Kai ly Philistia tavaimichi ai taphra ai nai nangchi i mo mang tako ai i, nangchi ly thengmui keung salyhchi mang tavai pasau nai katynchi thai nai khala tiu u,” napi.

¹⁶Davida ly Tameuh my leu pei nai kamta sa iy, Philistia chengchi ai Kibeon mary dengdairei Kazara mary tym pa-rei paryh vui bo.

¹⁷Davida i amyn ly meingtym tleirei y amthang. Samrang ai khumi cheng cheaungkhangchi my jei hyn ai nai ARENG my sa pi nai ne.