Read Khumi Chin 1 NENG SATANG 15 Bible Online

1 NENG SATANG 15 - Khumi Chin bible

1 NENG SATANG 15

¹Davida ly mymy i vui yhmchi Jerusalem mary y sa bo. Tameuh i Leu Maikawm Pawm i vui py, meingtym hareira y Tai harei sa.

²Naibaly samrang my, “ARENG ly mymy i Leu Maikawm Pawm angjeaung ai nai hawi, mymy i kalop sa jojo ai nai Levi theaungchi ai naini khai takhra nai ne i, nichi naini Leu Maikawm Pawm angjeaung ai nai tla,” napi.

³Hunai deaungkho y Davida ly Leu Maikawm Pawm angjeaung ai nai Jerusalem mary y Israela khumichi ai pangym achu bo.

⁴Naibaly samrang ly Aron i kangpreangchi hawi Levi theaungchi ai palau.

⁵Kohath nupai theung i khumi leaung 120 reichi ai Uriel my lu sa,

⁶Merari nupaichi theung i khumi leaung 220 reichi ai Asaiah my lu sa,

⁷Kerashon nupaichi theung i khumi leaung 130 reichi ai Joela my lu sa,

⁸Elizaphan Nupaichi theung i khumi leaung 200 reichi ai Shemaiah my lu sa,

⁹Hebron nupaichi theung i khumi leaung 80 reichi ai Eliel my lu sa,

¹⁰Uziela nupaichi theung i khumi leaung 112 reichi ai Aminada my lu sa iy jeu u nai ne.

¹¹Davida ly pathyp pi nai keungchi napi nai Zadok hawi Abiatha, Levi theaungchi napi nai Uriel, Asaiah, Joela, Shemaiah, Eliel hawi Aminadachi ai palau iy,

¹²nichi teng y, “Nangchi ly Levi theaungchi i luchi ne. Kai i sa yb nai meingtym ra y, Israela chengchi i ARENG Tameuh i Leu Maikawm Pawm angjeaung hai ai nai, nangchi ly nangmychi ai py, nangchi i amjo amnau Levi theaungchi ai py, kachai aso hai u.

¹³Angchei i angjeaung nai thym khala nangchi abawi u y. Naibaly kaichi ly kaimychi i ARENG Tameuh ai hawihai palai chiu y nai deaungkho y, mymy ly kaichi ai kamngo pajeng nai ne,” napi.

¹⁴Huna nai khala pathyp pi nai keungchi hawi Levi theaungchi ly Israela chengchi i ARENG Tameuh i Leu Maikawm Pawm tapyn ai nai mymychi ai apachai u bo.

¹⁵Levi theaungchi ly Mosi teng y ARENG my leu pei nai kamta, Leu Maikawm Pawm ai angjeaungrachi hawi angjeaung u.

¹⁶Samrang Davida ly Tarochi, sa-rachi beu iy amo theu ai hawi nai khulymchi thui ai nai, Levi theaung bawibawichi teng y kalop pei ai, nanai nichi i luchi teng y leu pei bo.

¹⁷Nichi ly kheupaja sa-ra thip ai nai, khulym sara nupaichi theung i Joela i chapo Heman hawi, ni i amjo amnau Berekhia i chapo Asap hawi, Merari nupaichi theung i Kushaia i chapo Ethan ai vawi takhra u. Nichi ai sabawm ai nai taro raawi ka-sang beu ai nai Zekhariah, Jaziela, Shemiramot, Jehiela, Unni, Eliaba, Maseija hawi Benaia napi nai Levi theaungchi ai vawi takhra u bo. Raawi ka-nem tarochi beu ai nai Matithia, Eliphelehu, Mineia, Azazia hawi Achura yhm tamcheaung Obed Edom hawi Jehielachi ai vawi takhra u bo.

²²Khenania ly katyn kapau beu naira y kawp keh nai deaungkho y, ni ai Levi theaung theung y katyn kapau beu kawp naichi i lu ra y vawi takhra bo.

²³Berekhia hawi Elakana nini ai Obed Edom, Jehia nini hawi vanrei, Leu Maikawm Pawm khai nai tai katheu pa-kho typ ai nai vawi takhra u bo. Pathyp pi nai keungchi napi nai Shebania, Joshapha, Nethanela, Amasai, Zekhariah, Benaia hawi Eliezachi ai, Leu Maikawm Pawm mo y baw eng ai nai vawi takhra u.

²⁵Hunaibaly Samrang Davida hawi vanrei, Israela luchi, tavailu arengchi ly Leu Maikawm Pawm angjeaung ai nai molam, Obed Edom i yhm y chei iy, apu parai nai pawi sa u.

²⁶Tameuh ly Leu Maikawm Pawm angjeaung u nai Levi theaungchi ai sabawm hai ai nai, Israela chengchi ly si katai saryhrei hawi beram saryhrei apathyp u bo.

²⁷Samrang Davida ly khri pa-rei apu parai nai kanih mai ka-syn amthyp. Hunai kamta katyn kapau beu kawp naichi, nichi i lu Khenania hawi Pawm angjeaung nai Levi theaungchi py amthyp u nai ne. Davida ly apathyp nai ateaung py amthyp.

²⁸Huna nai kamta Israela cheng bawibawichi ly amo theu parai naimy aeu iy, bawchi, sa-rachi hawi tarochi beu naimy, Jerusalem mary mang y Leu Maikawm Pawm angjeaung u nai ne.

²⁹Pawm ai mary theung y angjeaung nai thym khala, samrang Sawla i chaniu Mikhala ly thaibeng pa-kho mang khen i, amo theu parai naimy lam nai samrang Davida ai niu nai ne. Huna nai khala ni ly samrang i tlang tleaung y kaji paso bo.