Read Khumi Chin 1 NENG SATANG 19 Bible Online

1 NENG SATANG 19 - Khumi Chin bible

1 NENG SATANG 19

¹Naibaly neng kra kyh nai khala Ammon samrang Nahash ly dei i, ni i chapo Hanun samrang lawm bo.

²Davida my, “Hanun i ampo Nahash ly ka-ym awm nai ahawi ka-dawi ne nai kamta, kai py ahawi ka-dawi ne, nanai amteng hai ai,” nanai thui iy, Hanun teng y paleung si ahawi nai cha, savaichi hawi tha pi nai ne. Savaichi ly Ammon pri y tym u nai khala, samrang Hanun teng y kun u bo.

³Ammon cheng miteaung kehchi my, “Davida ly samrang nang i ampo ai tahm khai nai molam, hini savaichi pato iy paleung si nai cha tha pi nai ne, nanai athang khai a? Ny y leang! Hini pri y kun iy peang vui ai nai molam, khen paviu ai nai khumi pato nai teu!” napi u.

⁴Naibaly Hanun ly Davida i pato nai savaichi ai patiu iy, labeaung mui vau pi pawn. Nichi i ateaungchi py phaibeung ryrei o pi vui iy pato teang bo.

⁵Nichi ly khri pa-rei kaji nai deaungkho y, mymychi i pri y vawi u y. Huni satang ly Davida my thai nai khala, nichi teng y, “Nangchi ly Jeriko mary y awm u. Labeaungmui sau teang y ryrei ly yhm y vawi u moh,” nanai satang thai hai bo.

⁶Samrang Hanun hawi Ammon chengchi ly Samrang Davida ai mymychi i paleung ka-e palawn lawh bo, nanai apany u nai khala, Mesopotamia pri tleng mang hawi Suria pri napi nai Maaka pri hawi Zobah prichi ra i tavaimi kamkawm harei ai tangka chang kaji sie 590,000rei pei iy alai u bo.

⁷Nichi ly mymychi i alai nai tavai ka-ri 32,000 rei hawi Maaka pri samrang teng i tavaimi kamkawm palau iy, Medeba mary sahawi y tai u nai ne. Ammon chengchi py mymychi mary theung i nai theu u iy, tavai atiu ai nai aeng yb bo.

⁸Davida ly huni satang thai nai khala, Juaba hawi tavaimi kamkawm harei pato.

⁹Ammon chengchi ly jeu iy mymychi i mary pui Rabah mary katheu pa-khora meingtym la u. Sabawm ai nai jeu u nai samrangchi py adym prangra meingtym la u teang.

¹⁰Juaba ly mymy ai paleung ka-echi my nisi mang py, nidym nang py ang tiu ai, nanai pany nai khala, Israela cheng theung y kawp keh nai soraichi vawi takhra iy, Suria tavaimichi mang y motha iy meingtym la hai bo.

¹¹Huni bo ichi ai ly mymy i amnau Abisai ai lu sa hai. Abisai py my i tavaimichi ai Ammon chengchi mang y motha iy meingtym la hai nai ne.

¹²Juaba my, “Suria risachi ly kaichi ai pajau lawh baly, nang ly jeu iy kai ai sabawm ba. Ammon chengchi my nang ai pajau lawh baly, kai ly jeu iy nang ai sabawm ai.

¹³Vam nai hawi sorai paleung awm u! Achi ly amychi i khumi, amychi chiu nai Tameuh i marychi vui, atho sa iy tiu u sina. ARENG ly mymy i ngai nai kamta ne sy,” nanai Abisai teng y thui pi bo.

¹⁴Juaba hawi ni i tavaimichi ly mo mang y tavai thau u baly, Suria tavaimichi ly preang u.

¹⁵Huna nai preang nai ai Ammon tavaimichi niu nai khala, nichi py Abisai i mo mang preang u iy, mary theung mang y athawn u. Naibaly Juaba ly Jerusalem mary y vawi ali teang bo.

¹⁶Suria chengchi ly Israela chengchi my tavai eaung vui bo, nanai pany u nai deaungkho y, nichi ly Euphrat tavo nisi mang y awm nai Suria pri theung i risachi ai palau iy, Zobah pri i samrang Hadadeza i tavailu areng Shoba anui y khai u bo.

¹⁷Hini satang ai Davida my thai nai khala, Israela risachi ai kachu hai iy, Jordan tavo angpeang hai i, Suria tavaimichi ai motha nai meingtym la hai bo.

¹⁸Naibaly Israela chengchi ly Suria chengchi ai neaung vui iy preang hai bo. Davida hawi ni i tavaimichi ly ka-ri atang nai risa leaung 7,000 rei hawi risa leaung 40,000 reichi ai tamyh pawn nai ne. Nichi ly Suria tavailu areng Shoba ai py padei bo.

¹⁹Hadadeza anui i awm nai samrangchi ly mymychi tavai sum bo, nanai pany nai khala, Davida hawi ka-dyh ka-dawi sa i, Davida i anui y awm u. Suria chengchi ly Ammon chengchi ai mo mang y sabawm ai nai paleung ka-dawn by y leang bo.