Read Khumi Chin 1 NENG SATANG 21 Bible Online

1 NENG SATANG 21 - Khumi Chin bible

1 NENG SATANG 21

¹Setan ly Israela khumichi ai patang hai ai ngai nai deaungkho y, Davida ai khumi amyn vuikanai la ai nai dawn hai bo.

²Davida ly Juaba hawi takhra tavailu arengchi teng y, “Nangchi ly Israela pri verei y chei u ly khumi amyn vuikanai lo u. Khumi vuikanai majirei awm mo, nanai kai pany ai nai ngai,” napi.

³Juaba my, “ARENG ly Israela khumichi ai, vai i tleaung y phy chungvai peung pa-rei so pi na sy! Samrang awi, nichi bawibawi ly nang i miseaungchi ne. Israela cheng verei kamngo tym hai ai nai ati mana sa lawh ai mo?,” napi.

⁴Na i py samrang ly mymy i leu pei nai kamta sa hai bo. Juaba ly theu jo iy Israela pri verei y amki nai, Jerusalem mary y vawi teang nai ne.

⁵Ni my ly tavai keung y kalop sa pajau nai Israela pri theung i khumi leaung 1,100,000 rei hawi Juda pri theung y leaung 470,000 rei awm, nanai samrang Davida teng y amti pi bo.

⁶Juaba ly samrang i leu pei nai kamta, khumi amyn vuikanai la ai nai ngai y nai deaungkho y, Levi hawi Benjamin theaungchi theung i amyn vuikanai lo pi y.

⁷Davida i sa nai kalop ai Tameuh my paleung angai y nai deaungkho y, Israela chengchi ai pajeng nai ne.

⁸Davida my, “Kai ly hini ka-jei hawi nai kamngo sa tamang lawh bo ly! Kai i kamngo pahen pi kyh ba. Kai ly khumi ka-khum lawm bo,” nanai Tameuh teng y hnei takeng bo.

⁹Huna nai khala ARENG ly Davida i amo Kad teng y,

¹⁰“Nang ly Davida teng y chei; kai i sa ai awm nai amjy thomrei theung y, ni ly my i ngai nai harei amkhaw ai nai thui pi. Ni i vawi nai ai sa pi khyp ai,” napi.

¹¹Kad ly Davida teng chei iy ARENG i leu pei nai kamta amti pi nai ly

¹²“Samrang awi, saneng thomrei takang theu nai ngai a? Lo thomrei paleung ka-echi my preng iy haisau hawi tleh nai ngai a? Kani thomrei no kanghawi kamta, ARENG i haisau hawi kani pri amtaw thauchi ai pato iy, Israela pri verei y tleh nai ngai a? Hunichi theung i mani ngai mo? Kai ly ARENG teng y amti pi ai,” napi.

¹³Davida ly Kad teng y, “Kai ly khri pa-rei rai naira theung y tym lawh bo ly! Na i py khumi my pajeng nai ly kangai y. ARENG my pajeng na sy. Ati mana nai mo na baly mymy ly pahen nai keung ne,” napi.

¹⁴Hunaibaly ARENG ly Israela khumichi tlang tleaung y no kanghawi tym hai i, khumi leaung 70,000 rei dei nai ne.

¹⁵Mymy ly Jerusalem mary y taphra ai nai kani pri amtaw thau leaungrei ai pato iy, paleung amtlau vui i, “Hini ryrei my hawi bo, anawn jau, taphra bi moh jau!,” nanai kani pri amtaw thai ai leu pei bo. Kani pri amtaw thau ly Jebusi cheng Araunah i choh ati nai talang sahawi y angdo nai ne.

¹⁶Kani pri amtaw thau ly Jerusalem mary y taphra ai nai haisau syn naimy ali theung y angdo nai ai Davida my niu bo. Huna nai khala ni ly Israela miteaung kehchi hawi vanrei, khaileaung y tym pa-rei lu meung u. Nichi bawibawi ly paisiu akhiu u bo.

¹⁷Davida my, “Aw Tameuh, sa tamang nai keung ly kai ne. Khumi amyn vuikanai la ai nai leu pei nai keung ly kai ne. Hini pahen ai hawi nai khumichi ly ati tamang u mo? Aw ARENG, kai i Tameuh, kai hawi kai i yhm dengtheungchi ai pajeng iy, nang i khumichi ai ly pahen pi ba,” nanai hnei takeng.

¹⁸ARENG i amtaw thau my Kad teng y, “Nang ly Davida teng chei iy Jebusi khumi Araunah i choh ati nai talang ra y ARENG i vui maicha sa ai nai thui pi,” napi.

¹⁹Davida ly ARENG i leu tangai i, Kad my thui nai kamta chei bo.

²⁰Araunah hawi ni i chapo leaung palyhreichi ly chohpui chomaw ati naimy awm. Nichi ly kani pri amtaw thau ai niu nai khala, preang iy aheu u.

²¹Araunah ly ni mang y jeu nai Davida ai niu baly, khaileaung y tym pa-rei lu meung bo.

²²Davida my, “No kanghawi ra i lawi ai nai ARENG i vui maicham sa ai i, nang i choh ati nai talang kai teng y jo. vang kateng kang pei ai,” napi.

²³Araunah my, “Samrang awi, hini choh ati nai talang lo ba. Nang i ngai nai kamta so ba. Maicham tleaung y theng iy leng patlum ai nai si kataichi py hi y awm. Theng palawn ai nai li thawnra taveangchi py, katalamra i vui chohpui chomawchi py hi y awm. Hini bawibawichi ai nang teng y kang pei mang,” napi.

²⁴Na i py samrang my, “Ny y leang, kaimy vang kateng kang pei ai. Nang i vawnsai ha harei hawi, kai ly vang pei y naimy nga naichi hawi, ARENG teng y katalamra palawn ai nai ngai y,” napi.

²⁵Naibaly samrang ly Araunah ai muku chang 600 rei pei pi nai ne.

²⁶ARENG i vui maicham sa iy leng patlum nai kapathypra hawi amkawm nai kapathyprachi talam bo. Samrang chiu sa nai khala, ARENG ly maicham salo i tawnbawichi mai kang ai nai molam, kani mang dengdairei mai pala pi bo. Hina nai kamta samrang i chiu sa nai pathang pi nai ne.

²⁷ARENG ly kani pri amtaw thau teng y my i haisau khai su ai nai leu pei i, kani pri amtaw thau ly tangai bo.

²⁸Hina nai leaungsaichi ai samrang Davida ly niu nai khala, mymy i chiu sa nai ai ARENG my pathang pi bo, nanai pany bo. Hunai deaungkho y ni ly Araunah i choh atyhra i maicham salo y, kapathyprachi talam nai ne.

²⁹Huni neng khala khutaha daichi ka-vym theung y Mosi my sa nai ARENG i Taichy hawi kapathyprachi talam nai maicham ly Kibeon mary chiu sa nai meingtym ra y awm rai nai ne.

³⁰Na i py Davida ly Tameuh ai chiu ai nai huni meingtym y chei vam y. Ati mana nai mo na baly ni ly ARENG i kani pri amtaw thau i haisau ai jei nai deaungkho y ne.