Read Khumi Chin 1 NENG SATANG 22 Bible Online

1 NENG SATANG 22 - Khumi Chin bible

1 NENG SATANG 22

¹Hunaibaly Davida my, “Hini meingtym ly ARENG Tameuh i Achura yhm sa ai nai meingtym ne. Hini meingtym ly Israela khumichi leng patlum nai kapathypra talam ai nai meingtym py ne,” napi.

²Samrang Davida ly Israela pri theung y awm nai cheng takhra khumichi ai angym hai iy, kalop sa hai bo. Phyreichi ly Achura yhm sa naira y lengseaungchi si ai nai tla.

³Samrang ly sengmochi sa ai nai hawi, katheu pa-kho puichi i vui tamo neangneangchi patheu pi. Neh pajau y na pa-rei nawi nai kheupajachi py pei pi bo.

⁴Turu hawi Sidon marychira i khumichi teng y saitleang keung neangneangchi py, mymy teng y jeu hai bo.

⁵Davida ly “Kai i chapo Solomon my sa ai nai Achura yhm ly apu parai iy khaileaung pri y amyn amthang ai. Na i py Solomon ly saneng theang i pany nai sai angym y rai nai deaungkho y, kai ly Achura yhm i vui pasym pi yb ai,” nanai adawn pasym i, mymy dei y rai khala Achura yhm sa ai nai vawnsaichi kachu pi yb nai ne.

⁶Samrang ly chapo Solomon ai palau iy, Israela chengchi i ARENG Tameuh i vui Achura yhm sa ai nai leu pei bo.

⁷Davida my ni teng y, “Deang awi, kai ly ARENG Tameuh ai palo ai nai Achura yhm harei sa ai nai ngai.

⁸Na i py ARENG my kai ly khumi neangneangchi ai padei nai khumi, tavai neangneang atiu nai khumi ne nai deaungkho y, kai i sa nai thi naichi theu nai molam y, kai ai Achura yhm sa ai nai pei y.

⁹Na i py mymy ly kai ai leu adeu pi bo. Mymy ly ‘Nang ly tlamsa naimy pri peang pajau nai chapo leaungrei nga ai. Ni ly my i paleung ka-echi hawi tlamsa naimy awm pajau ai nai kaimy pei ai. Ni ly my i peang nai deung y Israela chengchi ai tlamsa naimy khai iy, “Solomon,”[6]nanai amyn nga ai.

¹⁰Ni ly kai i vui Achura yhm harei sa pi ai. Ni ly kai i chapo lawm ai. Kai py ni i ampo lawm ai. Ni i kangpreang ly Israela pri y awm jojo ai,’ ang napi,” napi.

¹¹Naibaly Davida my, “Deang awi, nang i ARENG Tameuh ly nang hawi vanrei awm hai sy. Adeu nai kamta nang ly mymy i vui Achura yhm sa nai amcheang sy.

¹²Nang i ARENG Tameuh ly nang ai mymy i leu pei nai kamta, Israela pri y peang kawp ai nai pany thai praw nai cheng naira hawi tau cheng naira pei na sy.

¹³Nang ly Israela chengchi i vui Mosi teng y ARENG my pei nai reitachi ai kry baly, nang i dawn nai kamta eaung ai. Atho so ly ka-ym awm ba. Ati sai py jei moh.

¹⁴Kai ly Achura yhm sa ai nai molam muku kaji sie 590,000,0 rei vi py, tangka kaji sie 590,000,00 rei vi py, kachu pi yb bo. Huni bo y kaji neh pajau y na pa-rei nawi nai kheupaja hawi tamochi py, kai teng y awm. Dengkeaungchi, lengseaungchi py awm yb bo. Na i py nang ly hini tleaung y atho sa bi ai nai tla.

¹⁵Nang teng y kalop sa nai keungchi neangneang awm. Lengseaung si nai keungchi, iusai kakawpchi, lasamachi hawi,

¹⁶muku, tangka, kheupaja, tamochi hawi sa nai kupe kakawpchi py neangneang awm bo. Nang ly vaimy kalop amteaung jau. ARENG ly nang hawi vanrei awm hai sy,” napi.

¹⁷Davida ly Israela cheng miteaung keh bawibawichi teng y, Solomon ai sabawm ai nai leu pei bo.

¹⁸Samrang my, “Nang i ARENG Tameuh ly nangchi hawi vanrei awm iy, nangchi ai meingtym tleirei y tlamsa naira pei bo. Mymy ly vaichi khala, hini pri theung y awm nai khumichi ai kai teng y au iy, kai ly nichi ai ARENG hawi mymy i khumichi i vui y peang vui bo.

¹⁹Hunaibaly nangchi i ARENG Tameuh i kalop ra y paleung hawi verei so u. ARENG i amyn tahm pasang ai nai Achura yhm so u. Huna khala naini nangchi ly ARENG i Leu Maikawm Pawm hawi mymy ai chiu naira y teaung nai takhra vawnsai ateaung alangchi ai, Achura yhm theung y khai ai nai nga u ai,” napi.