Read Khumi Chin 1 NENG SATANG 24 Bible Online

1 NENG SATANG 24 - Khumi Chin bible

1 NENG SATANG 24

¹Aron i kangpreangchi theung i kamkawmchi ly anui ichi ne. Aron ly Nadab, Abihu, Eleaza hawi Ithama napi nai chapo leaung palyhrei awm.

²Nadab hawi Abihu nini ly ampo dei y rai khala my dei hawi vui nai deaungkho y, nini ly kangpreang by y. Hunai deaungkho y nini i amnau Eleaza hawi Ithama nini ly pathyp pi nai keung lawm hawi bo.

³Davida ly Aron i kangpreangchi teng y mychi i kalopchi ra y kamkawmchi sa pi. Hina nai kalopchi phy pi naira y Eleaza i kangpreang Zadok hawi Ithama nini i kangpreang Ahimelekchi my samrang ai sabawm u nai ne.

⁴Eleaza i kangpreangchi ai kamkawm holai tariurei sa iy, Ithama i kangpreangchi ai ly kamkawm tajarei sa pi bo. Hina nai sa ai tla nai ly Eleaza i kangpreangchi theung y yhm dengtheungchi ai lu sa nai neampacho nawi keh nai deaungkho y ne.

⁵Eleaza hawi Ithama nini i kangpreangchi theung y, Achura yhm miteaung kehchi hawi phailo i vui lu sa naichi abawi nai deaungkho y, kalop phy pi naira y tambe va iy pasym pi ai tla nai ne.

⁶Eleaza hawi Ithama nini i kangpreangchi ly tambe va u. Naibaly nichi i amynchi ai Nethanela i chapo, Levi theaungra y secretary sa nai Shemaiah teng y amyn pakun ai nai tla. Huna nai amyn pakun naira y samrang, samrang i bangtangchi, pathyp pi nai keung Zadok, Abiatha i chapo Ahimelek, pathyp pi nai keung yhm dengtheung luchi hawi, Levi theaungchi i yhm dengtheung luchi ly pany nai keungchi ne.

⁷Hinichi ly mymychi i kalopchi ai phy pi naira y abawi u nai yhm dengtheung kamkawm 24 reichi ne. 1. — Jehojari 2. — Jedaih 3. — Harim 4. — Seorim 5. — Malakhijah 6. — Mijamin 7. — Hako 8. — Abijah 9. — Jesua 10. — Shekaniah 11. — Eliashib 12. — Jakim 13. — Hupah 14. — Jeshibea 15. — Bilaka 16. — Immera 17. — Hezira 18. — Hapize 19. — Pethahiah 20. — Jehekela 21. — Jakhin 22. — Kamula 23. — Delaia 24. — Maaziachi ne.

¹⁹Israela chengchi i ARENG Tameuh my leu pei nai molam, amsi pajo Aron i sa yb nai kamta, Achura yhm mang y chei iy mymychi teng y pei yb nai kalopchi sa u ai nai, hini khumichi i amyn la nai ne.

²⁰Levi i kangpreang takhra yhm dengtheung luchi ly Shibuel dengdai Amaram i kangpreang Jedeia.

²¹Rehabia i kangpreang Ishia;

²²Shelomith dengdai Izaha i kangpreang Izahar;

²³Kalen dengdai katheang Hebron i chapochi Jeria, Amariah, Jehazia hawi Jekamem;

²⁴Mikha dengdai Uzia i kangpreang Shamir;

²⁵Uziela i chapo Mikha dengdai Ishia i kangpreang Zekhariah;

²⁶Merari i kangpreang Mahli, Mushi hawi Jazia.

²⁷Jazia ly Shoham, Zakura hawi Ibari napi nai chapo leaung thomrei awm.

²⁸Mahli ly Eliaza hawi Kisha napi nai chapo leaung nyhrei awm. Eliaza ly chapo by y. Na i py Kisha ly Jeramela napi nai chapo leaungrei awm.

³⁰Mushi ly Mahli, Eda hawi Jeremoth napi nai chapo leaung thomrei awm. Hini khumichi ly yhm dengtheung Levi theaungchi ne.

³¹Mymychi i amjo amnau Aron i kangpreang pathyp pi nai keungchi i sa nai kamta, yhm dengtheung tleirei i lu sa naichi hawi huni yhm dengtheung i amnau leaungrei ly tambe va iy kalopchi sa u nai ne. Hina nai sa naira y samrang Davida, Zadok, Ahimelek hawi pathyp pi nai keungchi i yhm dengtheung luchi hawi, Levi theaungchi i yhm dengtheung luchi ly pany hai naichi ne.