Read Khumi Chin 1 NENG SATANG 26 Bible Online

1 NENG SATANG 26 - Khumi Chin bible

1 NENG SATANG 26

¹Achura yhm tamcheaung risachi ai phy pi nai kalopchi ly anui mang i kamta ne. Korah i nupaichi theung i Asap i yhm dengtheungra y Kore i chapo Meshelemia napi nai awm.

²Ni ly Zekhariah, Jedeaela, Zebadiah, Jathaniela,

³Elam, Jehohanan hawi Elioenai napi nai kalen ka-thui chapo leaung saryh awm nai ne.

⁴Obed Edom ai py Tameuh my chapo leaung tajarei amtheaung hai bo. Hunichi kalen ka-thui na baly, Shemaiah, Jehozaba, Joah, Sakha, Nethanela,

⁵Amiela, Isakhar hawi Peulethaichi ne.

⁶Obed Edom i chapo chalu Shemaiah ly chapo leaung tariurei awm; nichi ly atho ham parai iy aly len nai khumichi ne. Nichi ly Othani, Rephael, Obed, Elazaba, Elihu hawi Semakhiachi ne. Kangkhym i chapo leaung nyhrei ly ami tleaung y sa thai naira awm nai ne.

⁸Obed Edom i yhm dengtheungchi ra y hini kalop i vui khri pa-rei sa thai naira kawi angym nai khumi leaung 62 rei awm.

⁹Meshelemia yhm dengtheungchi ra y sa thai naira kawi angym nai khumi leaung holai tajarei awm.

¹⁰Merari i yhm dengtheungra y Hosah napi nai khumi leaungrei awm. Ni teng y Shimri (Shimri ly chapo chalu ny y teu i py, ampo my khai nai deaungkho y miteaung keh lawm bo.)

¹¹Hilikia, Tebaliah hawi Zekhariah napi nai chapo leaung palyhrei awm. Hosah i yhm dengtheung ra y Achura yhm risa leaung holai thomrei awm nai ne.

¹²Achura yhm tamcheaungchi ai yhm dengtheungchi ka-thui kamkawmchi sa iy, takhra Levi theaungchi kamta, kalopchi phy pi bo.

¹³Khumi nawi nai di nai dawn y naimy, yhm dengtheung tleirei mymychi typ ai tla nai katheu pa-kho ai tambe va iy typ u nai ne.

¹⁴Shelemiah ly nisi katheu pa-kho nga iy, ni i chapo Zekhariah ly tosyh katheu pa-kho nga. Ni ly tau kahawi pei reng nai khumi ne.

¹⁵Obed Edom ly tokalawi katheu pa-kho tym ai nai tla. Ni i chapochi ly vawnsaichi khaira takun puichi typ ai nai tla.

¹⁶Shupim hawi Hosah nini ly nidym katheu pa-kho hawi tleng mang i lamra awm nai Shalekhi katheu pa-kho typ ai nai tla. Tamcheaung typ ai nai neng kamtleh sa nai ne.

¹⁷Nisi ngan mang y tamcheaung risa leaung tariurei, tosyh ngan mang y leaung palyhrei hawi tokalawi ngan mang y leaung palyhrei, kani tleirei typ nai ne. Vawnsaichi khai nai takun puichira y, takun pui harei ly leaung tariurei, kani tleirei risa leaung palyhrei typ ai nai tla.

¹⁸Nidym ngan mang i meaungjai sahawi lam salo y tamcheaung risa leaung palyhrei hawi, aleaungra kheupo ra y leaung nyhrei.

¹⁹Hini ly Korah i yhm dengtheung hawi Merari i yhm dengtheungchi ai tamcheaung kalop phy pi nai saichi ne.

²⁰Takhra Levi theaungchi[7]ly Achura yhm i yhmtheaung katui khaira yhm hawi Tameuh teng talam nai katalamra vawnsaichi khai nai takun puichi ai kry.

²¹Kerashon i chapo Ladan ly Jehiela yhm dengtheungchira abawi nai yhm dengtheungchi i amsi pajo ne.

²²Ladan i chapochi napi nai Zetham hawi Joela nini ly Achura yhm i yhmtheaung katui khaira yhm hawi vawnsaichi khaira takun puichi kry nai ne.

²³Amaram i kangpreangchi napi nai Izaha, Hebron hawi Uzielachi ai py kalopchi phy pi.

²⁴Mosi i chapo Kerashom nupai theung i Shebuela ly Achura yhm i yhmtheaung katuichi khai nai yhm typ naichi i miteaung keh kalen ne.

²⁵Ni ly Kerashom i amnau Elieza hawi amtawn iy, Shelomith i amjo amnau lawm nai ne. Elieza i chapo ly Rehabia, Rehabia i chapo ly Jeshaia, Jeshaia i chapo ly Joram ne. Joram i chapo ly Zikhri, Zikhri i chapo ly Shelomith ne.

²⁶Shelomith hawi ni i yhm dengtheungchi ly Tameuh teng y, samrang Davida, yhm dengtheung luchi, nupaichi ai lu sa naichi hawi tavai luchi my talam nai katalamra vawnsaichi kry ai tla nai ne.

²⁷Nichi ly tavai atiu naira i nga nai vawnsai phyreichi la iy, Achura yhm y teaung ai nai talam u bo.

²⁸Shelomith hawi ni i yhm dengtheungchi ly amo Samuela, Samrang Sawla, Nera i chapo Abana hawi, Zeruiah i chapo Juabachi my syn nai katalamra vawnsaichi raurei, Achura yhm y teaung ai nai talam nai ngiereichi ai kry u nai ne.

²⁹Izaha kangpreangchi theung i Khenania hawi chapochi ly atiti charangchi kry nai hawi, Israela khumi tengtawi ka-jo ka-thuichi padyh pi nai, hunichi kry nai kalop ne.

³⁰Hebron kangpreangchi theung i Hashabiah hawi ni i amjo amnau leaung 1,700 reichi ly Jordan tavo nidym mang i, Israela chengchi i reita hawi mary theung i atiti leaungsai ngiereichi ai kalop pacheang nai ne. Nichi bawibawi ly kawp katlen nai khumichi ne.

³¹Jeria ly Hebron i kangpreangchi theung y lu sa nai ne. Samrang Davida i peang nai saneng 40 rei nai khala y, Hebron i kangpreangchi ai hau cham i, huni kangpreangchi theung y kawp katlen nai risachi ly Kilead pri Jaza mary y awm, nanai avum bo.

³²Samrang Davida ly Jeria i amjo amnauchi theung y kawp katlen nai yhm dengtheung lu leaung 2,700 reichi ai vawi takhra iy, Ruben pri, Kad pri hawi Manase nisi mangchi ai, reita hawi mary theung i atiti leaungsai ngiereichi kalop pacheang ai nai kalop pei nai ne.