Read Khumi Chin 1 NENG SATANG 28 Bible Online

1 NENG SATANG 28 - Khumi Chin bible

1 NENG SATANG 28

¹Davida ly Israela cheng miteaung keh bawibawichi ai, Jerusalem mary y angym hai bo. Hunaibaly cheng theaungchi i miteaung keh bawibawichi hawi pri peang nai miteaung keh bawibawichi ai py, Nupai luchi, samrang hawi chapochi i vawnsaichi, keaungngo kano kasau, sichi napi nai tawnbawichi ai kry nai khumichi py angym u bo. Angchi khyp thui ai na baly samrang yhm miteaung kehchi, amyn amthang nai tavai luchi hawi aly len nai khumi ngiereichi ly Jerusalem mary y angym u nai ne.

²Samrang Davida ly Huni khumichi mo y angdo iy, leu thui. Samrang my, “Kai i khumi mipuichi awi, kai i leu tangai u. Kai ly achi i ARENG Tameuh i kheu amchynra Leu Maikawm Pawm khai ai nai yhm harei sa ai nai ngai. Tameuh i amyn palo ai nai Achura yhm sa ai nai molam, kai ly angveirym bo.

³Na i py kai ly tavaimi leaungrei ne iy, thi nai theu hai nai deaungkho y, mymy ly kai ai Achura yhm so moh, nanai paka bo.

⁴ARENG napi nai Israela chengchi i Tameuh ly kai hawi kai i kangpreangchi ai Israela pri y peang jojo ai nai vawi takhra bo. Mymy ly lu sa pi ai nai Juda theaungchi ai vawi takhra pi. Juda pri y awm nai kai i ampo yhm dengtheungchi ai vawi takhra bo. Huni yhm dengtheungchi theung i kai ai patheu iy, Israela pri verei y peang ai nai pei.

⁵Mymy ly kai ai chapochi thawn hai iy, huni chapochi theung i Solomon ai ARENG i pri napi nai Israela pri peang ai nai vawi takhra bo.

⁶“ARENG my kai teng y, ‘Nang i chapo Solomon ly kai i Achura yhm sa pi ai nai khumi ne. Ni ai kai ly kai i chapo ra y vawi takhra bo. Kaimy py ni i ampo lawm ai.

⁷Ni ly vai khrairei kai i reitachi kry jojo ai na baly, kai ly ni i pri deungtasarei khaw hai ai,’ napi.”

⁸“Hunai deaungkho y kai ly Tameuh i khumi mipuichi mo y py, mymy i khumi napi nai Israela khumi mipuichi i mo y py, nangchi ai kalop kang pei nai ne. Nangchi ly achi i ARENG Tameuh my leu pei nai ngiereichi ai, hawihai palai tangai u. Huna khala naini nangchi ly hini pri kahawi amtym u jojo iy, nangmychi i kangpreangchi teng y pei pateang bi pajau ai,” napi.

⁹Naibaly Solomon teng y, “Deang awi, nang ly nangmy i ampo chiu nai Tameuh ai pany hai iy, ym thai y nai by y naimy paleung apanem nai hawi chiu ai nai kai ly nang ai kalop kang pei nai bo. Mymy ly achi i dawn tau naichi hawi aly ngai nai ngiereichi ai pany pi nai ne. Nang ly mymy teng y ahihawi baly, mymy ly kawn ai. Na i py nang ly mymy ai nithun thun lawh baly, mymy ly nang ai deungtasa ang khai su ai.

¹⁰ARENG ly mymy i chai parai nai Achura yhm sa ai nai molam, nang ai vawi takhra bo, nanai nang pany ai nai tla. Hunaibaly vaimy huni Achura yhm sa pajau. Atho ala iy so ba,” napi.

¹¹Davida ly Achura yhm hawi amtawn nai takun ngiereichi i mynchi ai py, vawnsai khai naira takun, takhra takunchi hawi kamngo lawi naira meingtym myn ai py, Solomon teng y au pi bo.

¹²Samrang ly mymy i paran yb nai kamta, Achura yhm ly-umchi hawi ly-um tengpang sahawi i takunchi, Achura yhm vawnsai ateaung alangchi khai naira hawi, ARENG teng y talam nai katalamrachi khai nai takunchi i myn py pei pi nai ne.

¹³Davida ly pathyp pi nai keungchi hawi Levi theaungchi ai, mymychi i kalop sa nai saichi, Achura yhm i atiti kalop sa nai saichi hawi, Achura yhm khauchi kry nai molam paran yb nai saichi py pei pi bo.

¹⁴Samrang ly khauchi vui py, maisi yhm hawi maisi yhm khaira ha harei vui py,

¹⁵muku sabawichi i vui py,

¹⁶Tameuh teng y talam nai takochi khai nai muku sabawi ha harei i vui muku kaji, tangka kaji majirei teaung ai, nanai leu pei bo.

¹⁷Mawi akawi verachi, khauchi, laawmchi sa ai nai muku majirei teaung iy samtangchi sa ai nai muku hawi tangkachi teaung ai nai leu pei.

¹⁸Mui katui leng patlum nai maicham i vui hawi ARENG i Leu Maikawm Pawm ai pakhi hawi khiu nai kherubenchi kadai nai ka-ri i vui mukuchi majirei teaung ai nai tla mo, nanai py leu pei bo.

¹⁹Samrang Davida my, “Hini bawibawichi ly ARENG my kai ai sa ai nai leu pei nai kamta tajiu yb nai ne,” napi.

²⁰Samrang Davida ly chapo Solomon teng y, “Nang ly ka-ym awm iy vam nai paleung awm ba. Kalop so amteaung ba. Atiti my py nang ai paka moh sy. Kai i chiu nai ARENG Tameuh ly nang hawi vanrei awm ai. Mymy ly nang ai khai su ai ny y. Achura yhm i vui ngai nai atiti sa naichi pajau pa-rei, nang hawi vanrei awm hai ai.

²¹Pathyp pi nai keungchi hawi Levi theaungchi ai, Achura yhm y sa ai nai kalopchi pasym pi yb veng bo. Cheaungkhang ra y kawp katlen nai kalop sa keungchi ly nang ai sabawm ai nai paleung apei naimy awm u bo. Khumi bawibawichi hawi nichi i miteaung kehchi py, nang i leu tangai u ai,” napi.