Read Khumi Chin 1 NENG SATANG 5 Bible Online

1 NENG SATANG 5 - Khumi Chin bible

1 NENG SATANG 5

¹Hini ly Jakob i chapo chalu Ruben i kangpreangchi ne. (Ati mana nai mo na baly ni ly ampo i aju katheang leaungrei hawi i ahawi lawh nai deaungkho y, chapo chalu amtym nai ly tama vui i, Josepha ai chapo chalu kamtym pei vui nai ne.

²Juda cheng theaung ly atho awm keh nai lawm i, cheng theaung bawibawichi i vui samrang amthawn nai ne.)

³Jakob i chapo chalu Ruben ly Hanoh, Pallu, Hezaron hawi Kami napi nai chapo leaung palyhrei awm.

⁴Hini ly deung kang thau tleirei, Joela i kangpreangchi ne. Shemaiah, Koka, Shimei, Mikha, Reaiah, Bala hawi Berachi ne. Asuria pri y peang nai empara samrang Tiklath Pilesa ly cheng theaung lu Bera ai patiu iy pri pala vui bo.

⁷Yhm dengtheung record charangchi ra y Ruben cheng theaung luchi ly Jeiela, Zekhariah hawi

⁸Belachi ne. Bela ly Aza i chapo Shem i katu ne iy, Joela i nupai ne. Huni nupai ly Aroe mary ra py, huni mary tosyh ngan mang i Nebo mary, Balamon marychi ra khrairei awm nai khu ka-peang ra py awm u nai ne.

⁹Kilead pri y nichi i beram kanghu, si kanghuchi peung dudu nai deaungkho y, nichi i khu ka-peang ly nisi ngan mang khutaha daichi ka-vym katem, Euphrat tavo tym pa-rei kau bo.

¹⁰Samrang Solomon deung y Ruben cheng theaungchi ly Hakara chengchi ai tiu i, Kilead pri nisi ngan peang vui nai ne.

¹¹Kad theaungchi ly Ruben theaungchi awm nai tosyh ngan mang i Bashan pri y awm u. Nichi i meingtym ly Salekah mary tym pa-rei kau nai ne.

¹²Joela ly nupaichi ai lu sa nai khu keung ne iy, Shapham ly pa-nyh lu sa nai nupaichi i khu keung ne. Bashan pri y takhra nupaichi ai lu sa nai khu keung ly Janei hawi Shaphat ne.

¹³Takhra theaungchi ra y hini nupaichi napi nai Mikhala, Meshulam, Sheba, Jorai, Jakan, Zia hawi Ebachi abawi nai ne.

¹⁴Nichi ly Hura i chapo Abihaila i kangpreangchi ne. Abihaila i amsi pajochi ly Huri, Jaro, Kilead, Mikhala, Jeshishai, Jado, Buzachi ne.

¹⁵Abadiela i chapo Kuni i katu Ahi ly huni nupaichi i lu ne.

¹⁶Nichi ly Bashan pri hawi Kilead pri i marychi ra py, Sharon acha prangchi jeungrei py awm u bo.

¹⁷(Hini recordchi ly Juda samrang Jotham hawi Israela samrang pa-nyh Jeroboam nini i deung y tajiu naichi ne.)

¹⁸Ruben, Kad hawi nisi mang Manase theaungchi theung y thailiho, haisau, khupui teaung kawp nai tavaimi risa leaung 44,760 rei awm.

¹⁹Nichi ly Hakara theaung napi nai Jetura, Naphisa hawi Nodab nupaichi hawi tavai atiu u bo.

²⁰Huna nai khala nichi ly Tameuh ai ym i, sabawm ai nai chiu sa u. Tameuh my py pathang pi nai deaungkho y, nichi ly Hakara theaungchi hawi nichi ai sabawm nai tavaimichi ai eaung vui bo.

²¹Nichi ly paleung ka-echi teng i kula-iu 50,000 rei, beram 250,000 rei hawi keaungngo kano kasau 2,000 rei patiu vui bo. Langheng y khumi leaung 100,000 rei py patiu nai ne.

²²Hini tavai ly Tameuh i kangai ne nai deaungkho y, paleung ka-echi neangneang dei. Naibaly Israela chengchi ly pri palara avum nai neng tym y nai ryrei ly huni pri y awm u jo bo.

²³Nisi mang Manase khumichi ly Bashan pri tosyh mang Balaheramon, Senira hawi Heramon mawi tym pa-rei ahei iy, khuteng sa u. Nichi i khumi vuikanai py peung dudu nai ne.

²⁴Nichi i nupai lu sa naichi ly Epha, Ishi, Eliel, Azariela, Jeremia, Hodaviah hawi Jadielachi ne. Huni khumi bawibawichi ly sorai risachi ne i, mymychi i nupaichi theung y amyn amthang naichi ne.

²⁵Na i py nichi ly mymychi amsi pajochi i Tameuh ai ym u y bo. Nichi ly mychi i pri dengdairei Tameuh my patheu pawn nai khumichi i tameuhchi ai chiu ai nai mymy ai khai u su nai ne.

²⁶Hunai deaungkho y mymy ly (Tiklath Pilesa, nanai py amyn nga nai) Asuria pri empara samrang Pula ai, mychi i pri y kun hai bo. Mymy ly Ruben theaung, Kad theaung hawi nisi mang manase theaungchi ai pri pala iy, Hela, Habo hawi Hara khuchi ra py, Kozan tavo sahawi y py, khuteng sa iy awm hai nai ne.