Read Khumi Chin 2 NENG SATANG 1 Bible Online

2 NENG SATANG 1 - Khumi Chin bible

2 NENG SATANG 1

¹Samrang Davida i chapo Solomon ly Israela pri y khaw parai naimy peang i, ni i ARENG Tameuh my ni ai amtheaung naira pei nai deaungkho y, ni ly khri pa-rei sa thai naira awm bo.

²Samrang Solomon ly khumi leaung sangrei kamkawm, leaung chungvairei kamkawmchi ai lu sa ai nai tavailu arengchi, miteaung kehchi, yhm dengtheung luchi hawi khumi mipuichi teng y,

³mymy hawi vanrei Kibeon mary i chiu sa nai meingtym y chei u ai nai leu pei bo. Huni meingtym y chei u nai aly ly daichi ka-vym theung y ARENG i miseaung Mosi my sa pi yb nai, ARENG i awmra Tabynako meingtym ne nai deaungkho y ne.

⁴(Na i py Leu Maikawm Pawm ly Jerusalem mary y awm. Huni Pawm ai samrang Davida ly Kiria Jarim mary i dengdairei la iy, mymy i sa nai taichyra y khai nai ne.)

⁵Kibeon mary y awm nai ARENG i awmra taichy mo y, Hura nupai theung i Uri i chapo Bezalela my sa nai kheupaja maicham py awm. Huni meingtym y samrang Solomon hawi khumi mipui bawibawichi ly ARENG ai chiu u nai ne.

⁶Samrang ly apathyp ai nai tawnbawi sangrei tleh iy, bom verei leng patlum nai kapathypra palawn nai, ARENG i awmra Taichy mo y kheupaja maicham salo y talam bo.

⁷Huni vum Tameuh ly Solomon teng y amteng i, ni teng y, “Nang ai ati kang pei ai nai ngai mo?,” nanai deng.

⁸Solomon my, “Nang ly kai i ampo Davida teng y tamen naira len parai nai amteng pi jojo iy, vai kai ai py ni meingtym y samrang lawm hai bo.

⁹Aw ARENG Tameuh, nang ly kai i ampo teng y leu adeu nai ly khaw hai. Nang ly kai ai kati leila y na pa-rei nawi nai hini khumichi i samrang lawm hai bo.

¹⁰Hunai deaungkho y huni khumichi ai peang ai nai cheng naira hawi pany thai naira pei kyh ba. Ti y baly kai ly hina tanrei nawi nai nang i khumichi ai ati mana peang pajau ai mo?,” nanai pathang.

¹¹Tameuh my Solomon teng y, “Nang i hnei nai ly teng parai. Nang ly yhmtheaung katui nang ai nai hawi amyn amthang ai nai py, paleung ka-echi ai padei pajau ai nai py hnei y naimy, nang ai kang pei nai khumi mipuichi ai peang pajau ai nai cheng naira hawi pany thai naira hnei bo. Hunai deaungkho y nang ai cheng naira hawi pany thai naira kang pei mang.

¹²Huni bo y jangni y py, vai mo mang y py samrang leaungrei py ngo y nai yhmtheaung katuichi hawi amyn amthang nai py kang pei bi ai,” napi.

¹³Hunai deaungkho y Solomon ly ARENG i taichy awm nai Kibeon mary chiu sa naira dengdairei theu iy, Jerusalem mary y vawi bo.

¹⁴Naibaly ni ly tavai ka-ri 1,400 rei hawi tavai keaungngo 12,000 rei awm nai tavaimi kamkawm sa iy, phyreichi ai Jerusalem mary y, phyreichi ai ly takhra marychira y khai nai ne.

¹⁵Ni i peang nai deung y Jerusalem mary y muku hawi tangka ly lengseaung kamta, saitleang keung ly Juda mawi kheutang ra y prau nai thaidu keung kamta nawi nai ne.

¹⁶Samrang i ka-paichi ly Musari pri[1] hawi Kilikia pri[2] ra i keaungngochi,

¹⁷Aikupta pri i tavai ka-richi pakun y ai nai paka bo. Hiti samrang hawi Suria samrangchi ly tavai ka-ri harei y tangka chang 600 rei, keaungngo amairei y tangka chang 150 rei hawi jo u nai ne.