Read Khumi Chin 2 NENG SATANG 13 Bible Online

2 NENG SATANG 13 - Khumi Chin bible

2 NENG SATANG 13

¹Israela samrang Jeroboam i peang nai saneng holai tajarei saneng y, Abijah ly Juda pri y peang i,

²Jerusalem mary y saneng thomrei peang. Ni i amhm ly Kibeah mary Uriah i chaniu Mikaia ne. Abijah hawi Jeroboam nini ly tavai atiu hawi bo.

³Abijah ly tavaimi risa leaung 400,000 rei hawi tiu iy, Jeroboam ly tavaimi risa leaung 800,000 rei hawi amtang nai ne.

⁴Tavaimi kamkawm nyhrei ly mawi nawi nai Ephraim pri y avum u. Samrang Abijah ly Ephraim mawi salo y lyn iy, Jeroboam hawi Israela chengchi teng y, “Tangai u!

⁵Israela chengchi i ARENG Tameuh ly taphra pajau y nai Leu Maikawm sa iy, Davida hawi ni i kangpreangchi ai Israela pri y deungtasarei peang ai nai pei bo, nanai ly nangchi pany u y a?

⁶Neba i chapo Jeroboam ly my i samrang Solomon ai tiu iy,

⁷khumi hawi y naichi ai kachu bo. Nichi ly Solomon i chapo Rehoboam ai mymychi ngai nai kamta sa hai bo. Rehoboam ly saneng nau iy, pany nai sai di nai deaungkho y, nichi ai ei pajau y.

⁸Vai, nangchi ly Davida i kangpreangchi teng y ARENG my pei nai sa thai naira ai tiu ai nai tau u lawh. Nangchi teng y atho awm nai tavaimi kamkawm hawi, nangchi chiu ai nai Jeroboam my sa nai sicho mynchi awm.

⁹Nangchi ly Aron i kangpreang pathyp pi nai keungchi hawi Levi theaungchi ai patheu pawn iy, nichi i meingtym y cheng takhra khumichi i reita teaung iy, khumi takhrachi ai pathyp pi nai keung y khai u lawh bo. Ami py ne sy, si katai amairei, ti y baly beram amai saryhrei syn baly, nangchi i chiu nai tameuhchi i pathyp pi nai keung nga pajau lawh nai ne.

¹⁰“Na i py kaichi ly kaimychi i ARENG Tameuh ai khai su y naimy kachiu u jojo. Aron kangpreang pathyp pi nai keungchi ly mychi i kalopchi sa naimy awm u. Nichi ai Levi theaungchi my sabawm nai ne.

¹¹Nichi ly dym tlei, khawn tlei mui katuichi hawi bom verei leng patlum nai kapathyprachi, ARENG teng talam u. Reita leaungsai hawi sabawi kachai salo y khai takhra nai takochi talam u bo. Dym tleirei muku maisi yhm khaira tleaung y maisichi thawn u. Kaichi ly ARENG i leu pei naichi tangai u. Nangchi ly mymy ai khai u su bo.

¹²Tameuh ly kaichi ai lu sa iy pahawi nai keung ne. Mymy i pathyp pi nai keungchi py kaichi tavai tiu ai nai bawchi eng iy, ka-ma-ra patei ai nai angveirym bo. Israela khumichi awi, nangchi i ARENG Tameuh hawi acham nai tavai atiu u moh! Nangchi pajau y leang!” napi.

¹³Huni thym y Israela tavaimi kamkawm ly Juda tavaimi kamkawm ai motha naimy awm nai thym ne i, Jeroboam ly risa phyreichi ai Juda tavaimi kamkawm nithun mang kangviu y tiu ai nai pato bo.

¹⁴Juda chengchi ly nithun mang y khen alengli nai khala, mymychi ai katanmeuh nai niu nai deaungkho y, ARENG teng y, “Sabawm kyh ba,” nanai aeu u. Pathyp pi nai keungchi ly bawchi eng u.

¹⁵Juda chengchi ly Abijah my lu sa i, athorei my aeu iy tiu u nai ne. Huna nai khala Israela chengchi ly Juda chengchi teng i nai preang u bo.

¹⁶Tameuh ly Juda chengchi teng y Israela chengchi ai pajau ai nai pei bo.

¹⁷Abijah hawi ni i tavaimi kamkawm ly Israela chengchi ai tiu pajau nai deaungkho y, Israela sorai risa leaung 500,000 rei dei nai ne.

¹⁸Juda chengchi ly mymychi i ARENG Tameuh ai ym u nai deaungkho y Israela chengchi tlang tleaung y eaung naira nga u nai ne.

¹⁹Abijah ly Jeroboam i tavaimi kamkawm ai preng i, Bethela mary, Jeshana mary, Ephron mary hawi huni marychi sahawi i avangchi ai py nga nai ne.

²⁰Abijah i peang nai deung y Jeroboam ly sa thai naira jum bo. Kangkhym y ly ARENG my pajeng nai deaungkho y dei bo.

²¹Abijah ly sa thai naira lenra lenra. Ni ly aju leaung holai palyhrei, chapo leaung 22 rei hawi chaniu leaung holai tariurei awm.

²²Abijah i thui nai leuchi, ni i sa nai leaungsaichi hawi huni i satangchi ly amo Iddo i cha-iu theung y tajiu pi typ nai ne.