Read Khumi Chin 2 NENG SATANG 14 Bible Online

2 NENG SATANG 14 - Khumi Chin bible

2 NENG SATANG 14

¹Abijah dei nai khala ni ai ly Davida mary samrangchi i tapreaung y up u nai ne. Naibaly ni i chapo Asa ly ampo i meingtym samrang y lyn bo. Huni samrang i deung y pri ly saneng horei tlamsa nai ne.

²Asa ly hawi nai kalop hawi kateng kataw sa nai deaungkho y, ARENG i mo y meimai nga.

³Ni ly cheng takhra khumichi i maichamchi hawi myn chiu nai meingtymchi taphra iy, leungchengchi hawi tamkhawnchi taphra piupa pawn nai ne.

⁴Juda khumichi ai mymychi amsi pajochi i ARENG Tameuh i kangai sa u iy, mymy i reita hawi reita leu pei naichi tangai ai nai leu pei bo.

⁵Juda pri mary tleirei i myn chiu nai meingtymchi hawi rimui patawi nai maichamchi taphra nai deaungkho y, huni samrang i peang nai deung y, pri ly tlamsa nai ne.

⁶Ni ly my i samrang yhm y awm nai thym khala, lengseaung apai tapang hai. ARENG ly ni ai tlamsa naira pei nai deaungkho y, saneng neangneang tavai atiu nai by y.

⁷Samrang my Juda khumichi teng y, “Mary apaichi, angdeangrachi, katheu lengteaungchi tai nai mary katheuchi awm angym nai marychi so u sina. Achi ly Tameuh i kangai sa nai ne i, pri peang pajau ai. ARENG my py achi ai kry iy, meingtym tleirei y chymme naira ang pei bo,” nanai thui nai kamta, khaw parai nai marychi sa i, eaung naira nga bo.

⁸Samrang Asa ly khupui hawi tivi syn nai Juda risa leaung 300,000 rei hawi Benjamin risa leaung 280,000 rei abawi nai tavaimi kamkawm awm. Hunichi bawibawi ly sorai paleung awm iy, hawihai palai acham yb naichi ne.

⁹Ethiopia cheng Zerah napi nai khumi ly risa leaung 100,000,0 rei, tavai ka-ri 300 rei hawi Juda pri y kun i, Maresha mary y tym pa-rei tavai tiu nai ne.

¹⁰Huna nai khala Asa ly nichi ai tiu ai nai theu i, Zephathah leaunghawi y meingtym la.

¹¹Asa ly ARENG Tameuh teng y, “Aw ARENG, nang ly atho awm nai tavaimi kamkawm ai sabawm nai kamta, atho di nai tavaimi kamkawm ai py sabawm pajau. Aw kaichi i ARENG Tameuh, kaichi ly nang ai paleung pado naimy nang i amyn y a-ym iy, hini khri pa-rei nawi nanai tavaimi kamkawm ai tiu ai nai theu u nai ne. Aw ARENG, nang ly kaichi i Tameuh ne. Nang ai ly ami my py tiu pajau y leang,” nanai chiu sa bo.

¹²Asa hawi Juda tavaimi kamkawm ly Ethiopia chengchi ai tiu nai khala, ARENG ly Ethiopia chengchi ai sum hai bo.

¹³Huni khumichi ai Asa hawi ni i risachi ly Kera mary y khrairei preang nai ne. Ethiopia cheng neangneang dei nai deaungkho y, nichi ly tiu ali teang ai nai khumi kachu pajau y bo. ARENG hawi Juda tavaimi kamkawmchi i kiu y tavai sum u nai ne. Juda tavaimi risachi ly vawnsai neangneang nga u bo.

¹⁴Naibaly Kera mary sahawi i marychi ly ARENG ai jei hyn u nai deaungkho y, Juda tavaimi risachi ly huni marychi taphra pajau nai ne. Nichi ly huni mary bawibawichi ai tiu u i, vawnsai neangneang pakym u bo.

¹⁵Nichi ly beram typ nai meingtym phyreichi ai py tiu u iy, beram hawi kula-iu neangneang nga u. Naibaly Jerusalem mary y vawi u bo.