Read Khumi Chin 2 NENG SATANG 21 Bible Online

2 NENG SATANG 21 - Khumi Chin bible

2 NENG SATANG 21

¹Jehoshapha dei nai khala y Davida mary y awm nai samrangchi i tapreaung y up bo. Chapo Jehoram ly ampo i meingtym y amtym i, samrang lawm bo.

²Juda samrang Jehoshapha i chapo Jehoram ly Azariah, Jehiela, Zekhariah, Azariahu, Mikhaela hawi Shephatiah napi nai amnau leaung tariurei awm.

³Ampo ly nichi teng y muku, tangka neangneangchi hawi takhra vang kateng vawnsaichi pei pi iy, Juda pri khaw parai nai mary ha harei peang ai nai pei pi bo. Na i py Jehoram ly chapo chalu ne nai deaungkho y, ni ai Jehoshapha my mymy i meingtym amtym hai nai ne.

⁴Jehoram ly pri y hawihai palai peang pajau nai khala, amnau bawibawichi hawi Israela miteaung keh phyreichi ai padei pawn bo.

⁵Jehoram ly saneng 32 rei saneng y samrang lyn i, Jerusalem mary y saneng tajarei peang.

⁶Ni ly Ahab i chaniu leaungrei hawi apom lawh nai deaungkho y, samrang Ahab hawi takhra Israela samrangchi i hawi y sa nai lam y abang iy, ARENG i tlang tleaung y kamngo sa nai ne.

⁷Na i py ARENG ly Davida hawi Leu Maikawm asa iy, ni i samrang kangpreang avaw hai y ai nai adeu pi nai deaungkho y, samrang Davida i kangpreang phra hai ai nai nga y.

⁸Jehoram i peang nai deung y Edom khumichi ly law tleaung nai pri lawm ai nai tavai ang thau u bo.

⁹Jehoram hawi ni i tavailu arengchi ly tavai ka-richi hawi theu iy, Edom pri y tiu u. Nichi ly huni meingtym y Edom tavaimichi my katanmeuh nai ne i py, vum y preang u nai ne. Huni neng dengdairei Edom pri ly law tleaung nai pri lawm bo.

¹⁰Jehoram ly mymy i amsi pajochi i ARENG Tameuh ai khai su nai deaungkho y, huna nai thym khala my Libana mary i khumichi my py tiu nai ne.

¹¹Ni ly Juda mawi aheungchira y myn chiu nai meingtymchi sa iy, Juda khumichi hawi Jerusalem mary i khumichi ai, ARENG i tlang tleaung y kamngo sa ai nai lam patei bo.

¹²Amo Elija ly Jehoram teng y cha harei pa bo. Huni cha theung y ly “Nang ly ngampo samrang Jehoshapha hawi ngamsipui samrang Asa i sa nai lam y tako y naimy, Israela samrangchi i sa nai lam y tako lawh nai deaungkho y, nang i amsi pajo Davida i ARENG Tameuh ly nang ai kamngo pajeng nai ne.

¹³Ahab hawi ni i meingtym y amtym u nai samrangchi ly Israela chengchi ai Tameuh i tlang tleaung y kamngo sa ai nai lam patei nai kamta, nang ly Juda khumichi hawi Jerusalem mary i khumichi ai kamngo sa ai nai lam patei bo. Nang ly nangmy tleaung y hawi nai ngamnauchi ai py padei bo.

¹⁴Hunai deaungkho y ARENG ly nang i khumichi, nang i cho chanauchi hawi nang i ajuchi ai khri pa-rei pajeng ai i, nang i yhmtheaung katuichi py phra hai pawn ai.

¹⁵Nangmy py tavaira y khri pa-rei no nai mi, kani tleaung kanirei nora nora ai,” nanai ne.

¹⁶Pangli peang y khuteng sa u nai Ethiopia chengchi sahawi y, Philistia chengchi hawi Arab cheng phyreichi awm u nai ne. ARENG ly huni khumichi ai Jehoram ai tiu hai bo.

¹⁷Nichi ly Juda pri theung y kun iy samrang yhm y lawm u bo. Naibaly chapo kasawi Ahazia ai naini khai su i, huni bo i chapochi hawi ajuchi ai patiu iy langheng y hawi nai ne.

¹⁸Naibaly hina nai leaungsaichi tym nai bo y ARENG ly samrang teng y tivi no tym hai bo.

¹⁹Huni no ly saneng nyhrei vi, kani tleaung kanirei tyra tyra i, kangkhym y samrang ly khri pa-rei no naimy dei bo. Khumichi my ly ni i amsi pajochi ai sa pi nai kamta, paleung si nai ka-ma-ra maiteaung pawi so pi y nai ne.

²⁰Jehoram ly saneng 32 rei saneng y samrang lawm i, Jerusalem mary y saneng tajarei peang nai ne. Dei nai khala ly ni i molam y ami py paleung si u y. Ni i veu ai Davida mary y up teu i py, samrangchi i tapreaungra up y leang.