Read Khumi Chin 2 NENG SATANG 24 Bible Online

2 NENG SATANG 24 - Khumi Chin bible

2 NENG SATANG 24

¹Josha ly saneng saryhrei awm nai khala samrang lyn i, Jerusalem mary y saneng 40 rei peang nai ne. Ni i amhm ly Berasheba mary i Zibia ne.

²Ni ly pathyp pi nai keung Jehojada heng nai ryrei, ARENG i kangai sa.

³Jehojada ly samrang Josha i vui aju leaung nyhrei vawi pi. Ni ly huni ajuni hawi cho chanauchi nga nai ne.

⁴Josha ly samrang lawm nai kra kyh nai bo y, Achura yhm palum ai nai dawn bo.

⁵Ni ly pathyp pi nai keungchi hawi Levi theaungchi ai, Juda pri mary tleirei y pato iy Achura yhm saneng tleirei palum ai nai molam, khumi mipuichi teng i tangka ka-lawn pa-rei cheaung hai bo. Samrang ly hini kalop sa kaliki ai nai leu pei i py, Levi theaungchi ly aninaw nai ne.

⁶Hunai deaungkho y ni ly huni khumi bawibawichi i lu Jehojada ai palau iy, “ARENG i awm naira Tabynako i vui y khumichi my pei ai nai, ARENG i miseaung Mosi my khai yb nai kamta, tangka cheaung ai nai Levi theaungchi ai ati mana nai Juda pri hawi Jerusalem mary i nai theu iy cheaung hai y lawh mo?,” napi.

⁷(Neampachy kaphra Athalia i khumichi ly Achura yhm taphra iy, khai takhra nai vawnsai ateaung alangchi la i, Bala tameuh ai chiu nai achura yhm y teaung u nai ne.)

⁸Samrang ly Levi theaungchi ai khai achu tangkachi khai naira tengta sa hai iy, Achura yhm katheu pa-khora khai hai bo.

⁹Nichi ly Jerusalem mary hawi Juda pri verei y awm nai khumichi teng y, daichi ka-vym theung y Tameuh i miseaung Mosi i sa nai kamta, ARENG teng y khumi luteng talam u ai nai satang ahei hai.

¹⁰Khumi mipuichi hawi nichi i lu sa naichi ly amo theu parai naimy, mymychi i tangkachi syn iy tengta kawi pa-rei pala u.

¹¹Levi theaungchi ly kani tleirei, huni tengta ai miteaung kehchi teng y tym hai bo. Tengta kawi bo na baly samrang i secretary hawi pathyp pi nai keung kalen keh i jengthai, nini ly jeu i, huni tangkachi la iy tengta ly meingtymra khai teang ai nai tla. Hina nai kamta nichi ly cheaung u i, tangka neangneang nga u nai ne.

¹²Samrang hawi Jehojada nini ly huni tangkachi ai, Achura yhm palum naira y lu sa naichi teng y au pi bo. Lu sa naichi ly sa palum nai molam iusai kakawpchi, lasamachi, paiphichi, myn oh nai keungchi ai alai nai ne.

¹³Huni kalop sa keung bawibawichi ly kalop sa naira y atho sa u i, Achura yhm ai angchei i kamta, hawihai palai palum u teang bo.

¹⁴Nichi ly sa palum teang nai kalop pajau nai khala, samrang hawi Jehojada nini ly palai nai muku hawi tangkachi ai Achura yhm i vui khauchi hawi takhra ateaung alangchi sa naira y pasum nai ne. Jehojada heng nai ryrei ly Achura yhm y kapathyprachi talam jojo nai ne.

¹⁵Ni ly khri pa-rei miteaung acheang i, saneng 130 rei khala dei bo.

¹⁶Khumi mipuichi my ni i veu ai ly Davida mary samrangchi i tapreaung y up. Mymy ly Israela khumichi i vui, Tameuh i vui hawi Achura yhm i vui kahawi sa pi nai deaungkho y ne.

¹⁷Na i py Jehojada dei nai bo y Juda cheng lu sa naichi ly samrang Josha ai nichi i leu tangai ai nai parawi u bo.

¹⁸Hunai deaungkho y khumi mipuichi ly Achura yhm y amsi pajochi i ARENG Tameuh ai chiu nai khai su iy, mynchi hawi Asherah tameuhnu i tamkhawnchi ai chiu u. Hina nai nichi i sa nai kamngo molam y. ARENG i kado theu nai ly Juda pri hawi Jerusalem mary tlang tleaung y tym bo.

¹⁹ARENG ly amochi ai pato iy huni khumichi ai mymy teng y ali u teang ai nai pany hai teu i py, nichi ly tangai u y.

²⁰Huna nai khala Tameuh i phailo ly pathyp pi nai keung Jehojada i chapo Zekhariah i tlang tleaung y tym nai deaungkho y, Zekhariah ly khumi mipuichi ka-niura angdo iy, “Nangchi ly nangmychi i tlang tleaung y ka-jeira tym hai ai nai, ati mana nai kai ARENG i leu pei nai tangai u y lawh mo? Kai ai nangchi my khai su nai deaungkho y, kai py nangchi ai khai su bo!” napi.

²¹Samrang Josha ly Zekhariah i tlang tleaung y hawi y sa ai nai ka-dawn mang y abawi i, ni i leu pei nai kamta khumichi ly Zekhariah ai Achura yhm apai theung i ly-um y, lengseaung hawi aphi u kha bo.

²²Samrang ly Zekhariah i ampo Jehojada i mymy teng y ka-ym awm parai naimy kalop sa nai tami vui i, chapo ai padei bo. Zekhariah ly dei enten nai khala, “ARENG ly nang i sa nai kalop niu iy nang ai kamngo pajeng na sy!,” nanai thui nai ne.

²³Huni saneng kaseih tym nai khala Suria tavaimi kamkawm ly Juda pri hawi Jerusalem mary y tiu i, miteaung keh bawibawichi ai padei iy, yhmtheaung katuichi Damaska mary y syn pawn nai ne.

²⁴Suria tavaimi kamkawm ly theang teu i py, ARENG my khri pa-rei len nai Juda tavaimi kamkawm ai eaung ai nai pei bo. Ati mana nai mo na baly Juda khumichi ly mymychi amsi pajochi i ARENG Tameuh ai khai u su nai deaungkho y ne. Hina nai kamta samrang Josha ly kamngo pajeng naira avum bo.

²⁵Ni ly tamo kalem nga i hu y awm jo. Paleung ka-echi anaw pawn nai khala, miteaung keh leaung nyhrei ly pathyp pi nai keung Jehojada i chapo ai padei nai molam y, vawitheung tha nai kangviu y, mymy i ira tleaung y padei bo. Ni i veu ai ly Davida mary y up i py, samrangchi i tapreaung y up y leang.

²⁶(Ni ai kangviu y padei nai khumi ly Ammon cheng neampachy Shimeath i chapo Zabad hawi Moba cheng neampachy Shimeath i chapo Jehozaba ne.)

²⁷Areng keh cha-iu theung y Josha i chapochi satang, ni i vui amo leuchi satang hawi ni my Achura yhm sa palum teang nai satangchi abawi nai ne. Chapo Amazia ly ni i meingtym amtym i, samrang lawm bo.