Read Khumi Chin 2 NENG SATANG 25 Bible Online

2 NENG SATANG 25 - Khumi Chin bible

2 NENG SATANG 25

¹Amazia ly saneng 25 rei khala y samrang lawm i, Jerusalem mary y saneng 29 rei peang bo. Ni i amhm ly Jerusalem mary i Jehoadin ne.

²Ni ly ARENG i mei ka-niu y kahawi sa teu i py, paleung hawi verei sa nai ny y.

³Ni ly sa thai naira nga phai nga baly mymy i ampo ai padei nai miteaung kehchi ai padei teang.

⁴Na i py nichi i cho chanauchi ai ly “Cho chanauchi i sa nai kamngo molam amhm ampo ai padei moh; amhm ampochi i sa nai kamngo molam y cho chanauchi ai padei moh,” nanai Mosi i reitara awm nai ARENG i Reita kamta padei y nai ne.

⁵Samrang Amazia ly Juda hawi Benjamin theaung bawibawichi teng y, mychi nupai kamkawm akachu iy, khumi leaung sangrei tavailu hawi leaung chungvairei tavai luchi khai pi bo. Huni risachi ly saneng apomrei hawi leng awm naichi ne i, bawibawi leaung 300,000 rei awm. Nichi ly tivi hawi khopuichi teaung kawp iy, tavai atiu ai nai angveirym nai hawi vawi patyp nai risachi ne.

⁶Amazia ly huni khumichi bo y Israela pri i tavaimi leaung 100,000 rei ai py, tangka sie 6225 rei pei iy alai yb bo.

⁷Na i py amo ly samrang teng y chei i, ni teng y, “Hini Israela risachi ai nangmy hawi vanrei hawi moh. ARENG ly hini tosyh mang i khumichi teng y awm hai y leang.

⁸Tavai keung y nichi abawi nai deaungkho y, atho awmra ai, nanai nang ly athang khai lym ai. Na i py Tameuh ly tavai eaung naira hawi sum naira pei pajau nai keung ne nai deaungkho y, nang ly huni khumichi hawi amkawm lawh baly, nang ly paleung ka-echi i kiu y sum ai,” napi.

⁹Huna nai khala Amazia my amo teng y, “Huni khumichi teng y pei nai tangka ly jawm sum ai bo a?,” nanai deng. Amo my, “ARENG my huni tangka tleaung y nawi nai ang pei ai mang!” napi.

¹⁰Hunai deaungkho y Amazia ly alai yb nai risachi ai mymychi i yhm mang y vawi hai bo. Hunaibaly nichi ly Juda khumichi tlang tleaung y khri pa-rei kado theu naimy, mymychi yhm mang y vawi u nai ne.

¹¹Amazia ly atho ala iy mymy i tavaimi kamkawm ai lu sa naimy, pangli kadei tokalawi palawi leaunghawi mang y amsa bo. Huni meingtym y tavai atiu u i, Edom risa leaung 10,000 rei padei u bo.

¹²Juda tavaimichi my khumi leaung 10,000 rei patiu iy, nichi ai Selah mary lengseaung para salo y pahawi i, huni salo mang nui iy dei hai be bo.

¹³Huna nai thym khala y Amazia my tavai keung y abawi ai nai pei y nai Israela risachi ly Samari mary hawi Beth Horon mary sala y awm nai Juda marychi ai tiu i, khumi leaung 3,000 reichi ai padei iy, vawnsai neangneangchi la pi pawn nai ne.

¹⁴Amazia ly Edom chengchi ai tiu naira i vawi nai khala, huni khumichi i chiu nai mynchi syn. Samrang ly hunichi ai chiu nai, mui katuichi leng patlum nai ne.

¹⁵Hunai deaungkho y ARENG ly kado theu i, amo ai Amazia teng y pato bo. Amo my, “Nang kiu i khumichi ai atleu pajau y nai cheng takhra khumichi i tameuhchi ai, nang ly ati mana nai chiu lawh mo?,” napi.

¹⁶Huna nai khala y Amazia my, “Kaimy nang ai mana khala samrang ai tau pei nai keung y kang khai mo? Nang ly awm pypy, ti y baly kang padei vui ai!” napi. Amo my ly “Nang ly hini atitichi sa iy kai i tau pei nai dawndan y lawh baly, Tameuh my nang ai padei ai nai dawn yb nai vai ly kai pany bo,” nanai thui chum baly sai py katheu y naimy awm pypy bo.

¹⁷Juda samrang Amazia ly Israela pri y tiu ai nai kangviu y dawn pasym chum baly Jehu i katu, Jehoaha i chapo samrang Jehosha teng y savai pato i, mymy hawi tavai atiu ai nai palau teang.

¹⁸Jehosha my Amazia teng y pathang pi nai ly “Tlenrei nai khala Lebanon mawi saleung y aleng keung my saitleang keung teng y savai pato i, ‘Nang i chaniu ai kai i chapo teng pei ba,’ nanai thui hai nai thym y, huni sahawi mang aleaung nai mawi kasi ly huni aleng phreung ai chiu piupa bo.

¹⁹Amazia awi, vai nang ly Edom chengchi ai tiu nai pajau, nanai amlyh bo. Na i py kaimy tau kang pei ai ngai nai ly nangmy i yhm y phai awm pypy ba. Ati mana nai y nang hawi nangmy i khumichi tama hai ai nai ka-jeira hau lawh mo?,” napi.

²⁰Na i py ni i leu ai Amazia ly tangai y. Ni ly Edom chengchi chiu nai mynchi ai chiu nai deaungkho y, Amazia ai tavai sum hai ai nai Tameuh i kangai ne.

²¹Hunai deaungkho y Israela samrang Jehosha ly Juda samrang Amazia hawi tavai atiu bo. Juda pri Beth Sheme mary y atiu i,

²²Juda tavaimi kamkawm ly sum nai deaungkho y, tavaimi risachi ly mymychi i yhm mang y preang u bo.

²³Jehosha ly Amazia ai patiu i, Jerusalem mary y tha chum baly, mary apai Ephraim katheu pa-kho dengdai taki katheu pa-kho ryrei, miu 400 rei taphra nai ne.

²⁴Ni ly Obed Edom i kangpreangchi my kry nai Achura yhm theung i muku, tangka, Achura yhm ateaung alang ngiereichi hawi samrang yhm i yhmtheaung katuichi la iy, Samari mary y vawi hai bo. Samrang ly tavai keung y patiu nai langhengchi py, mymy hawi vanrei hawi nai ne.

²⁵Juda samrang Amazia ly Israela samrang Jehosha dei nai bo y, saneng holai pangrei heng rai.

²⁶Samrang lyn khyp khala i dengdai tem pa-rei Amazia i sa nai leaungsai bawibawichi ai Juda hawi Israela samrangchi i cha-iu theung y tajiu pi typ bo.

²⁷Amazia ly ARENG i tlang tleaung y kamngo sa khyp khala i dengdairei, Jerusalem mary y ni ai padei ai nai dawn paviu nai awm. Kangkhym y ni ly Lakhisa mary y preang. Na i py ni i paleung ka-echi ly huni mary y preang i, padei u bo.

²⁸Naibaly ni i veu ai keaungngo tleaung y tang iy syn i, Davida mary samrangchi i tapreaung y up nai ne.