Read Khumi Chin 2 NENG SATANG 26 Bible Online

2 NENG SATANG 26 - Khumi Chin bible

2 NENG SATANG 26

¹Juda khumi mipuichi ly Amazia i chapo saneng holai tariurei awm nai Uzia ai vawi iy, ampo i meingtym samrang y palyn u bo.

²(Elath mary ai Uzia my peang ali teang iy mary palum teang nai ly Amazia dei chum nai bo y ne.)

³Uzia ly saneng holai tariurei khala samrang lyn i, Jerusalem mary y saneng 52 rei peang nai ne. Ni i amhm ly Jerusalem mary i Jekolia ne.

⁴Ni ly ampo i sa nai saichi amtiu i, ARENG i mei ka-niu y hawi nairachi sa nai ne.

⁵Ni ly my i reita leaungsai tau pei nai keung Zekhariah heng nai ryrei ly ARENG ai ka-ym awm naimy chiu nai deaungkho y, Tameuh ly ni ai amtheaung hai bo.

⁶Uzia ly Philistia chengchi ai tiu i, Kath mary, Jamania mary hawi Ashado mary apaichi taphra iy, Ashado mary sahawi hawi, Philistia pri meingtym takhrachira y apai sa nai marychi palum nai ne.

⁷Tameuh ly ni ai Philistia chengchi, Kurabala mary y awm nai Arab chengchi, Meunit chengchi ai tiu ai nai sabawm.

⁸Ammon chengchi ly Uzia teng y langseaungchi pei u nai ne. Ni ly khri pa-rei sa thai naira len parai nai deaungkho y, ni i satang ly Aikupta pri mang khrairei amthang bo.

⁹Uzia ly mary apai takira i pa-kho, leaunghawi katheu pa-kho hawi mary apai takichi salo y angdeangrachi sa nai hawimy, Jerusalem mary ai khaw hai nai ne.

¹⁰Samrang ly nidym mang mawi kheutangra awm nai mawi tangbiuchi hawi, angdymchira y si kanghuchi khawn nai deaungkho y, daichi ka-vymra i marychi ai angdeangrachi hawi vanrei apai tapang iy, tuikan neangneang tai u. Samrang ly li hlau sa ai nai paleung apei nai deaungkho y, mawi aheungchira y kreip akho sa naichi hawi khaileaung kahawichira y li, hlau sa naichi ai atho pei nai ne.

¹¹Ni teng y tavai thau ai nai angveirym nai tavaimi kamkawm pui awm. Tavaimi recordchi ai secretarychi napi nai Jeiela hawi Maseja nini my kry bo. Nini ai miteaung keh ananiah my kalop pacheang nai ne.

¹²Tavaimi kamkawm theung y tavailu areng leaung 2,600 awm.

¹³Nichi i aniu y samrang i paleung ka-echi ai tiu pajau nai sorai risa leaung 307,500 rei awm.

¹⁴Uzia ly tavaimichi teng y khupui, tivi, tamo lukhym, tamo baichu, thailiho hawi lijai hawi ko ai nai lengseaungchi pei pi nai ne.

¹⁵Mary apai taki hawi angdeangrachi mang dengdairei, thailiho hawi lengseaung puichi pali nairachi py, Jerusalem mary theung y sa kawp nai keungchi my sa pi yb bo. Tameuh teng i lyh ai awm nai kasabawmra nga nai deaungkho y, samrang ly sa thai naira lenra lenra iy, ni i satang ly meingtym tleirei y amthang nai ne.

¹⁶Na i py samrang Uzia ly sa thai naira len ryh len ryh nai khala y, amlyh am-e nai deaungkho y jy bo. Ni ly Achura yhm theung y kun iy maicham salo y mui katuichi leng patlum nai molam y, my i ARENG tlang tleaung y kamngo sa nai ne.

¹⁷Pathyp pi nai keung Azariah hawi vam parai nai pathyp pi nai keung leaung 80 reichi ly samrang teng y,

¹⁸paka ai nai chei u i, nichi my, “Aw samrang Uzia awi, nang ly ARENG teng y mui katuichi leng patlum ai nga nai ny y. Hini kalop sa ai nai a-au yb naichi ly Aron i kangpreang pathyp pi nai keungchi ne khyh. Hini meingtym kachaira i dengdairei theu ba. Samrang nang ly ARENG i tlang tleaung y kamngo sa bo. Hunai deaungkho y nang ly ARENG Tameuh teng i amtheaung naira ngo y leang bo,” napi.

¹⁹Uzia ly mui katuichi leng patlum ai nai mai-ai takip iy, Achura yhm mui katui leng patlum nai maicham sahawi y angdo. Ni ly pathyp pi nai keungchi ai kado theu hai nai deaungkho y, ni i lupang ly vaimy ka-jei awm nai keaungsi man nai ne.

²⁰Azariah hawi takhra pathyp pi nai keungchi ly lei nai meimai hawimy, samrang i lu kati y khen u ripati nai bo y, ni ai Achura yhm i dengdairei patheu u. Samrang py mymy ai ARENG my ang pajeng bo, nanai pany iy, theu kaliki nai ne.

²¹Samrang Uzia ly huna khala i ka-so dei pa-rei, huni keaungsi molam Reita leaungsai deaungkho y chai y nai khumi lawm bo. Ni ly huni bo baly Achura yhm theung y kun ai nai ngo ali bi y leang bo. Mymy ly chapo Jotham ai my i kalopchi au. Chapo my pri peang nai thym khala, ni ly mymy i yhm y awm bo.

²²Samrang Uzia i peang nai jeungrei sa nai leaungsai bawibawichi ai Amoz i chapo amo Isaia my record khai nai ne.

²³Samrang Uzia dei nai khala Davida mary y up teu i py, my i roka molam y samrangchi tapreaung y up y nai ne. Ni i chapo Jotham ly ampo i meingtym y amtym i samrang lyn bo.