Read Khumi Chin 2 NENG SATANG 30 Bible Online

2 NENG SATANG 30 - Khumi Chin bible

2 NENG SATANG 30

¹Khumi mipuichi ly Katlen Vui Nai Pawi sa reng nai kamta, angchei lo y sa ai nai vo u y bo. Ati mana nai mo na baly Reita leaungsaira awm nai kamta, kachai sa chum nai pathyp pi nai keungchi di ala nai deaungkho y py, Jerusalem mary y tym nai khumichi di ala nai deaungkho y py, sa ai avo y nai ne. Hunai deaungkho y samrang Hezekia hawi vanrei, miteaung kehchi hawi Jerusalem mary i khumi bawibawichi ly huni pawi ai pa-nyh lo tleaung y sa ai nai ka-vo dawn u bo. Naibaly samrang ly Israela pri hawi Juda pri i khumi bawibawichi teng y satang thai hai nai ne. Ni ly Ephraim theaung hawi Manase theaungchi teng y, Israela chengchi i ARENG Tameuh ai tahm khai ai hawi nai Katlen Vui Nai Pawi sa ai nai molam, Jerusalem mary Achura Yhm y jeu u ai nai, palau nai chachi py pa patyp nai ne.

⁴Samrang hawi khumi mipuichi ly mymychi i ka-vo dawn yb nai ngai u nai deaungkho y,

⁵Reita leu pei nai kamta, Katlen Vui Nai Pawi ai, vaichi khala i sa naichi tleaung y hawi keh pa-rei sa ai i, Tosyh mang i Dan mary dengdai tokalawi mang Berasheba mary khrairei, Israela cheng bawibawichi ai palau nai ne.

⁶Samrang hawi miteaung kehchi i leu pei nai kamta, savaichi ly palau nai chachi syn u iy, Juda pri hawi Israela pri verei y chei u bo. Palau nai cha ra y, “Aw Israela chengchi awi, nangchi ly Asuria samrang kiu i tleaung nai dei kamthomchi ne. Abraham, Isaka, Jakobchi i ARENG Tameuh teng y ali u teang jau; mymy py nangchi teng y ang jeu teang ai mang.

⁷Nangchi ly ARENG Tameuh i leu atangai y nai amsi pajochi hawi, takhra Israela chengchi kamta so u moh. Nangchi pany u nai kamta mymy ly huni khumichi ai pajeng nai ne.

⁸Nangchi ly nichi kamta paleung tang u moh. ARENG i leu tangai u. Nangchi ly nangchi i ARENG Tameuh my khai takhra nai Jerusalem mary y jeu u iy, mymy ai chiu u. Hunaibaly mymy ly nangchi ai kado ang theu hai ai ny y.

⁹Nangchi ly ARENG teng y jeu u ali teang baly patiu iy langheng y hawi nai nangmychi i amjo amnauchi ai nichi my pahen ai i, nangchi i pri y vawi hai ali teang ai. Nangchi i ARENG Tameuh ly tamen nai hawi pahen nai keung ne. Nangchi ly mymy teng y jeu u ali teang baly, mymy ly nangchi ai kawn ai,” nanaichi abawi nai ne.

¹⁰Savaichi ly Ephraim hawi Manase theaungchi i khu ka-peang mary ngiereichi hawi, tosyh mang Zebulun khu ka-peangchi ra chei u teu i py, khumichi ly nichi ai panui hai nai ne.

¹¹Na i py Asha, Manase hawi Zebulun theaungchi theung i phyrei khumichi ly Jerusalem mary y jeu u bo.

¹²Samrang hawi miteaung kehchi i leu pei nai tangai u nai kamta, khumichi ly adyh adawi naimy leu atangai ai nai, Tameuh ly Juda khumichi i paleung amtlau hai nai ne.

¹³Khumichi ly pa-nyh lo tleaung y tako angbo abawi y nai pawi sa u ai nai Jerusalem mary y angym u bo.

¹⁴Nichi ly Jerusalem mary i kapathyprachi talam nai hawi mui katui leng patlum nai maicham ngiereichi la achu iy, Kidron leaunghawi theung y aphi u nai ne.

¹⁵Naibaly nichi ly lo si kani holai palyhrei kani y Katlen Vui Nai apathyp ai nai i vui y beramchi tleh u. Reita leaungsaira awm nai kamta kachai aso y nai pathyp pi nai keungchi hawi Levi theaungchi ly khri pa-rei kangji nga u i, ARENG teng y kachai sau teang nai deaungkho y, vai ly Achura yhm theung y leng patlum nai kapathyprachi talam u pajau nai ne.

¹⁶Nichi ly Tameuh i khumi Mosi i Reita leu pei nai theung y thui pi nai kamta, Achura yhm theung y meingtym la u bo. Levi theaungchi my tawnbawichi i thi ly pathyp pi nai keungchi teng y talam pi iy, pathyp pi nai keungchi my huni thi ai maicham tleaung y katheng u nai ne.

¹⁷Khumi neangneangchi malawn py, Reita leaungsaira thui nai kamta kachai so y naichi ne nai deaungkho y, Katlen Vui Nai beramchi tleh ai nai ngo y. Hunai deaungkho y nichi i jeng y Levi theaungchi my beramchi tleh pi iy, ARENG teng y talam pi bo.

¹⁸Ephraim, Manase, Isakhar hawi Zebulun theaung neangneangchi py, Reita leaungsaira thui nai kamta kachai so y naimy, Katlen Vui Nai Pawira abawi naichi ne. Huni khumichi i vui y samrang Hezekia my,

¹⁹“Aw kaichi amsi pajochi i ARENG Tameuh, huni khumichi ly kachai aso y teu i py, nang ai paleung hawi verei chiu naichi ne nai deaungkho y, nang ly neaung hawi parai nai saho y, nichi ai ly pahen pi kyh ba,” nanai chiu sa bo.

²⁰ARENG ly Hezekia i chiu sa nai pathang pi nai ne. Mymy ly nichi i kamngo pahen pi iy, nichi ai patang naira tym hai y bo.

²¹Jerusalem mary theung y awm angym nai khumichi ly khri pa-rei amo theu parai naimy, tako angbo abawi y nai pawi kani saryhrei sa u nai ne. Levi theaungchi hawi pathyp pi nai keungchi ly kani tlei tleirei, ham parai naimy ARENG ai palo u bo.

²²ARENG ai chiu naira y tamang y naimy pahawi pi nai deaungkho y, samrang Hezekia ly Levi theaungchi ai palo nai ne. Nichi ly mymychi amsi pajochi i ARENG Tameuh ai palo iy, kani saryh ryrei apathyp u chum nai khala,

²³huni bo y pawi kani saryhrei sa bi ai nai leu pacheang u i, amo theu parai naimy pawi sa u bi nai ne.

²⁴Samrang Hezekia ly khumichi cha ai nai si katai amai 1,000 rei hawi beram amai 7,000 rei sabawm pi. Miteaung kehchi my py si katai amai 10,000 rei hawi beram amai 1,000 rei sabawm u nai ne. Pathyp pi nai keung neangneangchi py reita leaungsaira thui nai kamta, apachai u bo.

²⁵Hunai deaungkho y Juda khumichi, pathyp pi nai keungchi, Levi theaungchi, tosyh mang dengdairei jeu nai khumichi, Israela pri hawi Juda pri theung y khuteng sa nai cheng takhra khumichi py amo theu u nai ne.

²⁶Jerusalem mary i khumichi ly Davida i chapo samrang Solomon deung i dengdai vaini khrairei, hina nai pawi so u vai y nai deaungkho y, khrikhri pa-rei amo theu u bo.

²⁷Pathyp pi nai keungchi hawi Levi theaungchi ly mipuichi i vui, ARENG teng i amtheaung naira hnei pi nai deaungkho y, Tameuh ly mymy i awm nai kani pri mang dengdairei, nichi i chiu sa nai pathang pi nai ne.