Read Khumi Chin 2 NENG SATANG 36 Bible Online

2 NENG SATANG 36 - Khumi Chin bible

2 NENG SATANG 36

¹Juda mipuichi ly Josia i chapo Joaha ai vawi iy, Jerusalem mary y samrang palyn nai asitui leih u bo.

²Joaha ly saneng 23 rei awm nai khala y Juda samrang lawm i, Jerusalem mary y lo thomrei peang nai ne.

³Aikupta samrang Niko ly ni ai patiu vui iy, Juda mipuichi teng i langseaung tangka chang kaji sie 5,200 rei hawi muku chang kaji sie 50 rei hnei.

⁴Niko ly Joaha i amnau Eliakim ai Juda samrang y palyn iy, Jehojakim, nanai amyn kangtha pei nai ne. Joaha ai ly Aikupta pri y Niko my hawi jo bo.

⁵Jehojakim ly saneng 25 rei awm nai khala y Juda samrang lawm i, Jerusalem mary y saneng holai harei peang nai ne. Ni ly mymy i ARENG Tameuh tlang tleaung y kamngo sa.

⁶Babulon samrang Nebukhadnezar ly Juda pri theung y kun i, Jehojakim ai patiu iy, sengkry hawi pakheng naimy Babulon pri mang y hawi jo nai ne.

⁷Achura yhm i yhmtheaung katui phyreichi py la iy, my i Babulon samrang yhm y khai bo.

⁸Jehojakim i amso ngai hawi nai sa nai saichi hawi, hawi y naira sa naichi raurei, ni i takhra sa nai leaung sai bawibawichi ai Juda samrangchi i cha-iu theung y tajiu pi typ nai ne. Ni i chapo Jehojakhin ly ampo i meingtym y atym i, samrang lyn bo.

⁹Jehojakhin ly saneng holai tajarei awm nai khala y, Juda pri samrang lawm i, Jerusalem mary y lo thomrei peang nai ne. Ni py ARENG i tlang tleaung y kamngo sa.

¹⁰Kanipui theu nai khala y samrang Nebukhadnezar ly Jehojakhin ai patiu iy Babulon pri y hawi vui bo. Samrang yhm i yhmtheaung katuichi py la pi pawn nai ne. Naibaly Nebukhadnezar ly Jehojakhin i ampochy Zedekiah ai Juda samrang y palyn i, Jerusalem mary y peang hai bo.

¹¹Zedekiah ly saneng 21 rei awm nai khala y Juda samrang lawm i, Jerusalem mary y saneng holai harei peang nai ne.

¹²Ni ly ARENG i tlang tleaung y kamngo sa iy, ARENG i leu thui pi nai keung amo Jeremia i leu ai tahm apanem iy tangai y bo.

¹³Zedekiah ly samrang Nebukhadnezar ai tiu. Nebukhadnezar ly mymy tlang tleaung y ka-ym awm ai nai, ni ai athorei my Tameuh i amyn y, vaineng abeu hai bo. Zedekiah ly paleung tang i uikheih y. Israela chengchi i ARENG Tameuh teng y ali teang y naimy awm bo.

¹⁴Juda chengchi ai lu sa naichi, pathyp pi nai keungchi hawi mipuichi py, mymychi saleaung deaungpa khumichi i sa nai kamta mynchi chiu iy, mymy i kachai khai takhra nai Achura yhm y chai hai y bo.

¹⁵Nichi amsi pajochi i ARENG Tameuh ly mymy i khumichi hawi Achura yhm law tleaungra nga ai ngai hai nai deaungkho y, nichi ai pany hai pi ai nai amochi pato pi bi nai ne.

¹⁶Na i py nichi ly Tameuh i amtaw thauchi ai panui hai iy, leu pei nai tangai u y. Amochi ai panui hai u bo. Na i py kangkhym y ARENG ly khri pa-rei kado theu nai deaungkho y, nichi tleaung pajau ai nai pei y.

¹⁷Hunai deaungkho y ARENG ly Babulon samrang ai tiu hai nai ne. Huni samrang ly Juda thawndeang deaungdichi ai Achura yhm theung y tleh bo. Tameuh my miteaung deaungdi, neampacho neampachy, no naichi, no y naichi ai pahen y naimy, Babulon samrang i kiu y au nai ne.

¹⁸Babulon samrang ly Achura yhm theung i ateaungchi py, muku tangkachi py, samrang hawi miteaung kehchi i muku tangka ngiereichi py, la pi pawn bo.

¹⁹Ni ly Achura yhm hawi mary ai mai leng iy, Jerusalem mary apaichi py taphra bo. Samrang yhmchi hawi vang kateng vawnsaichi hawi vanrei, mai leng pawn nai ne.

²⁰Samrang ly dei kamthum khumichi ai Babulon pri mang y hawi iy, Pasian empara pri amthawn nai neng tym nai pa-rei, mymy hawi my i kangpreangchi teng y miseaung achei hai bo.

²¹Na i py amo Jeremia dengdairei ARENG my thui pi nai leu angym hai nai ly “Anawn kani y ja y[8]vui lawh nai y, pany jo ai nai molam, huni pri y saneng vui saryhrei, khumi angso savai angau ai,” napi.

²²Pasia empara samrang Kuru[9]my peang nai angchei saneng y, ARENG my ni teng y leu pei nai cha patheu hai iy, ni i empara pri verei y phain hai nai ne. Hina nai sa nai ly amo Jeremia dengdairei, ARENG my leu pei nai kamta tym hai ai nai ne.

²³“Hini ly Pasia empara samrang Kuru i leu pei nai ne. Kani pri mang y awm nai ARENG Tameuh my, kai ai khaileaung pri verei peang hai iy, Juda pri Jerusalem mary y mymy i vui Achura yhm sa ai nai kalop kai teng y au bo. Tameuh i khumichi napi nai khumi bawibawichi ly Jerusalem mary y chei u. Tameuh ly nangchi hawi vanrei awm hai sy,” napi.