Read Khumi Chin 2 NENG SATANG 5 Bible Online

2 NENG SATANG 5 - Khumi Chin bible

2 NENG SATANG 5

¹Samrang Solomon ly Achura yhm sa nai kalop bawibawi pajau nai khala, ARENG teng y ampo Davida my talam nai muku, tangka hawi takhra vawnsai ateaung alangchi ai, vawnsai khai nai takun puichira y khai me bo.

²Naibaly samrang Solomon ly Leu Maikawm Pawm ai Zion napi nai Davida mary i dengdairei angjeaung ai nai, Israela cheng theaungchi hawi nupai lu bawibawichi ai Jerusalem mary y angym ai nai palau bo.

³Huni khumi bawibawichi ly Taichy pawi kani khala angym u.

⁴Lu sa nai bawibawichi angym u nai khala, Levi theaungchi ly Leu Maikawm Pawm angjeaung u iy,

⁵Achura yhm mang y syn u bo. Pathyp pi nai keungchi hawi Levi theaungchi ly ARENG i awm nai Tabynako py, huni i vawnsai ateaung ngiereichi py vanrei, Achura yhm mang y pyn u bo.

⁶Samrang Solomon hawi Israela khumi mipui bawibawichi ly Leu Maikawm Pawm mo y awm achu iy, kati leila y na pa-rei nawi nai beramchi, sichi hawi apathyp u nai ne.

⁷Naibaly pathyp pi nai keungchi ly Leu Maikawm Pawm ai Achura yhm theung y pakun u iy, khri pa-rei chai nai meingtym kherubenchi sala y khai u bo.

⁸Kheruben nini i pakhichi ly Pawm hawi samtleangchi ai khiu meuh na.

⁹Samtleang kadeaungchi ai meingtym kachaira kun nai katheu pa-kho mang niu pajau khyh; takhra mani mang py niu pajau y. Huni samtleangchi ly vaini khrairei, huni meingtym y awm.

¹⁰Leu Maikawm Pawm theung y Leu Maikawm lengseaung phei nyhrei ny y baly, takhra ati sai py by y. Israela chengchi ly Aikupta pri i dengdairei theu u nai neng, ARENG my nichi hawi Leu Maikawm asa nai thym khala, Mosi ly huni lengseaung phei nyhrei ai Leu Maikawm Pawm theung y khai pi nai ne.

¹¹Pathyp pi nai keung bawibawichi ly mani kamkawm theung y abawi i py ne sy, mymychi ai aau chum naichi ne. Levi theaung katyn kapau beu kawp naichi napi nai Asap, Heman, Jeduthun hawi nichi nithun abang naichi ly ateaung kangleung amthyp iy, sa-rachi, tarochi syn naimy, baw eng nai pathyp pi nai keung leaung 120 reichi ly nichi hawi vanrei, maicham nisi mang y angdo u bo. Khulym thui nai khumichi ly baw katyn, sa-ra katyn hawi takhra katyn kapau katynchi hawi raawi kamlym, ARENG ai palo nai khulym thui u nai ne. Nichi my, “ARENG ly hawi nai deaungkho y palo u, mymy i tamen naira ly deungtasarei ne,” nanai thui u bo. Pathyp pi nai keungchi Achura yhm i dengdairei theu u nai khala, Achura yhm ly vaimy tamai kawi miu na i, ARENG i phum-ang angvang nai deaungkho y, nichi i chiu sa achu nai ly anawn na veng bo.