Read Khumi Chin 2 NENG SATANG 7 Bible Online

2 NENG SATANG 7 - Khumi Chin bible

2 NENG SATANG 7

¹Huna nai kamta samrang Solomon chiu sa pajau nai khala, kani mang dengdairei mai tla iy, katalamrachi kang hai. Naibaly Achura yhm ly ARENG i phum-ang kangvang hawi kawi na bo.

²Hunaibaly pathyp pi nai keungchi ly ARENG i Achura yhm theung y kun pajau y bo.

³Israela chengchi ly kani khusang mang dengdairei mai tla iy, Achura yhm ly phum-ang kangvang hawi kawi nanai niu nai khala, angsaveaung paichira ambeu naimy, “Nang ly hawi nai ne iy, tamen naira ly deungtasarei ne,” nanai ARENG ai palo u bo.

⁴Naibaly samrang Solomon hawi khumi mipui bawibawichi ly ARENG teng y kapathyprachi talam u bo.

⁵Samrang ly si 22,000 rei hawi, beram 120,000 reichi ai amkawm nai kapathypra palawn iy talam. Hina nai kamta samrang hawi mipui bawibawichi ly ARENG ai chiu nai Achura yhm khai takhra nai ne.

⁶Pathyp pi nai keungchi ly mymychi i vui khai pi nai meingtym ra y angdo u bo. Levi theaungchi ly pathyp pi nai keungchi hawi mo atha naimy angdo iy, samrang Davida i sa nai katyn kapauchi hawi ARENG ai palo u. Samrang Davida i sa yb nai kamta, “Mymy i tamen naira ly deungtasarei ne,” nanai khulym thui u nai ne. Khumi bawibawichi angdo nai thym khala, pathyp pi nai keungchi ly bawchi eng u bo.

⁷Solomon ly Achura yhm mo y awm nai sala i ly-um khai takhra chum baly, huni meingtym y leng patlum nai kapathypra, amti amjang talam nai, amkawm nai katalamra i thauchi talam bo. Hina nai sa nai ly samrang i sa nai kheupaja maicham ly huni katalamra bawibawichi i vui theang ala nai deaungkho y ne.

⁸Samrang Solomon hawi tosyh mang Hamath aleaung dengdai Aikupta khujyh khrairei, meingtym tleirei ra y awm nai Israela mipui bawibawichi jeu u bo.

⁹Taichy pawi kani saryhrei sa u chum baly, achu pui sa u. Maicham ai khai takhra nai kani saryhrei, pawi sa nai py kani saryhrei ne.

¹⁰Saryh lo, kani 23 rei kani y Solomon ly mipuichi ai yhm mang y vawi hai bo. ARENG ly mymy i khumi Israela chengchi, samrang Davida hawi samrang Solomon teng y amtheaung hai nai deaungkho y, khumichi ly amo theu naimy vawi u nai ne.

¹¹Samrang Solomon ly mymy i paran yb nai kamta, Achura yhm hawi samrang yhm sa nai amcheang iy, angym be nai khala,

¹²ARENG ly vum y Solomon teng y jeu iy, “Kai ly nang i chiu sa nai thai. Hunai deaungkho y hini Achura yhm ly kai teng y apathyp nai meingtym ne, nanai kang kawn pi mang.

¹³Kai ly kani khang hai nai khala py ne sy, amti amjangchi taphra ai nai akhutama kanghuchi ai kaimy pato khala py ne sy, kai i khumichi napi nai nangchi teng y chym thai nai no michi tym hai nai khala py ne sy,

¹⁴Nichi ly kai teng y chiu sa naimy uikheih iy, mymychi i sa nai kamngo khai u su baly, kai ly kani pri mang dengdairei nichi i chiu sa nai tangai pi ai. Nichi i kamngo palawi pi iy, nichi i pri y paitiu thym hai teang ai.

¹⁵Kai ly hini Achura yhm kry pi ai. Hini Achura yhm y chiu sa naichi pathang pi ai.

¹⁶Ati mana nai mo na baly kai ly hini Achura yhm ai vawi takhra iy, kai ai deungtasarei chiu nai meingtym palawn nai khai takhra bo. Kai ly hini meingtym y typ iy deungtasarei kry ai.

¹⁷Nang ly ngampo Davida kamta kai i reitachi tangai iy, kai i leu pei nai ngiereichi sa naimy kai ai ym baly,

¹⁸nang i ampo Davida teng y, ‘Israela pri y nang i samrang kangpreang ly mana khala py tem ai ny y,’ nanai kai i adeu nai khaw hai ai.

¹⁹Na i py nang hawi nang i khumichi ly kai i Reitachi hawi leu pei naichi taphra iy, tameuh takhrachi ai chiu u lawh baly,

²⁰kaimy pei nai pri i dengdairei nangchi ai patheu vui ai. Kai ai chiu nai meingtym palawn iy khai takhra nai hini Achura yhm py, khai su ai. Meingtym tleirei i khumichi my khen nau ai i, panui pachem hai ai.

²¹“Vai hini Achura yhm ly khri pa-rei tahm awm nai ne i py, huna nai khala ly sahawi mang tako nai khumichi ly lyh parai naimy, ‘ARENG ly ati mana nai hini pri hawi hini Achura yhm ai, hina nai sa lawh mo?,’ nanai deng u ai.

²²Khumichi my, ‘Israela chengchi ly mymychi i amsi pajochi ai Aikupta pri i dengdairei pahawi nai ARENG Tameuh ai khai u su nai deaungkho y ne. Nichi ly tameuh takhrachi teng y paleungbie vui iy, huni tameuhchi ai chiu u. Hunai deaungkho y ARENG ly nichi ai ka-jeira tym hai bo,’ nanai pathang u ai,”